ارنايى دەلەگاتسيا قۇرامىن جامبىل وبلىسىنىڭ اكىمى كارىم كوكىرەكباەۆ وبلىس شەكاراسىنان كۇتىپ الدى. بۇدان كەيىن جانسەيىت تۇيمەباەۆ «بۋرنوە سولار-1» كۇن ەلەكتر ستانتسياسىنا باردى. نەگىزگى قىزمەت ءتۇرى ەلەكتر ەنەرگياسىن وندىرەتىن سەرىكتەستىك جۋالى اۋدانى, نۇرلىكەنت اۋىلىندا ورنالاسقان. جوبالىق قۋاتى 50 مۆت بولاتىن مەكەمە ەلىمىزدەگى ەڭ ءىرى ەلەكتر ستانتسياسى بولىپ سانالادى. ارنايى دەلەگاتسيا جۋالى اۋدانىنان شىققان سوڭ اتباسىن جامبىل اۋدانىنا بۇرىپ, ايشا ءبيبى كەسەنەسىنە كەلدى. ايشا ءبيبى كەسەنەسى اۋليەاتا ءوڭىرىنىڭ نەگىزگى تاريحي نىشاندارىنىڭ ءبىرى. بۇل ورايدا جانسەيىت قانسەيىت ۇلى باستاعان توپ ورتاعاسىرلىق تاريحي ەسكەرتكىشتى تاماشالاپ, كوپشىلىكپەن پىكىرلەستى. سونىمەن قاتار, وڭتۇستىكقازاقستاندىق دەلەگاتسيا «قازاق حاندىعىنا 550 جىل» مونۋمەنتىمەن دە تانىستى. مۇندا قازاق حاندىعىنىڭ تۋىن تىككەن كەرەي مەن جانىبەكتىڭ بەينەلەرى كورىنىس تاۋىپ, ەلدىكتىڭ بەينەسىن تانىتىپ تۇر.
وليمپيادا جەتكىنشەكتەرىن دايىندايتىن «اتلەتيك» وقۋ-جاتتىعۋ كەشەنى 2011 جىلى سالىنعان. مۇندا كەلۋشىلەر ءۇشىن امبەباپ زالى, اۋىر اتلەتيكا, گرەك-ريم كۇرەس, كيكبوكسينگ, تاەكۆوندو, ارمرەستلينگ جانە ەركىن كۇرەس زالى جۇمىس ىستەيدى. اتالعان نىساندى ارالاپ كورگەن دەلەگاتتار «تاراز-ارەنا» سپورت كەشەنىنىڭ دە جۇمىسىمەن تانىستى. بۇدان كەيىن جانسەيىت تۇيمەباەۆ «قازفوسفات» جشس مينەرالدى تىڭايتقىشتار زاۋىتىندا, «كونە تاراز» مۋزەيىندە, «قاراحان» كەسەنەسىندە جانە جامبىل اتىنداعى «رۋحانيات» ورتالىعىندا بولدى. ارىپتەستىكتى دامىتۋ, تاجىريبە الماسۋ ماقساتىندا اۋليەاتادا كەزدەسكەن ەكى وبلىستىڭ باسشىلارى مۇنداي ءۇردىس الداعى ۋاقىتتاردا دا جالعاسا بەرەتىنىن ايتتى.
حاميت ەسامان,
«ەگەمەن قازاقستان»
جامبىل وبلىسى