ەكىجاقتى كەزدەسۋ بارىسىندا تاراپتار ءىرى ينفراقۇرىلىمدىق جوبالاردى ىسكە اسىرۋ سالاسىنداعى ءوزارا ءتيىمدى ىنتىماقتاستىقتىڭ بىرقاتار وزەكتى ماسەلەلەرىن تالقىلادى. ەققدب قازاقستان رەسپۋبليكاسىنا 1993 جىلدان بەرى جالپى كولەمى 7,3 ملرد ەۋرونى قۇرايتىن 222 جوبانى قارجىلاندىرعان.
ەققدب ەنەرگەتيكا جانە تابيعي رەسۋرستار جونىندەگى باسقارۋشى ديرەكتورى نانديتا پارشادتىڭ پىكىرىنشە, اتالعان بانكتىڭ قازاقستان ەكونوميكاسىنا بۇگىنگە دەيىن سالعان 7,3 ملرد ەۋرونىڭ 40 پايىزى ەنەرگەتيكا سالاسىنا, سونىڭ ىشىندە ءداستۇرلى قۋات كوزدەرىنە ينۆەستيتسيالانسا, سوڭعى كەزدەرى ەلدىڭ بالامالى ەنەرگيا كوزدەرىنە دە بۇل بانك قارجى بولە باستاعان. اتاپ ايتار بولساق, بانك بۇگىنگە دەيىن ەكىباستۇزداعى جەل ەلەكتر ستانتسياسى مەن بۋرنوە ەلەكتر ستانتسياسىن قارجىلاندىرعان. قوس ستانتسيادا 50 مۆت قۋات شىعارۋعا قاۋقارلى. ەكى جوباعا بانك شامامەن 150 ملن دوللار بولگەن.
گ.ابدىقالىقوۆا مەملەكەت باسشىسىنىڭ حالىقارالىق قارجى ينستيتۋتتارىمەن ىنتىماقتاستىققا ەرەكشە ءمان بەرەتىنىن اتاپ ءوتتى.
مەملەكەتتىك حاتشى بانك ازىرلەگەن ەققدب-نىڭ 5 جىلعا ارنالعان قازاقستانداعى ىنتىماقتاستىقتى دامىتۋ ستراتەگياسىنىڭ مەملەكەتتىك جانە جەكە سەكتوردىڭ ءرولىن رەتتەۋ, قارجى كوزدەرىنە قولجەتىمدىلىكتى كەڭەيتۋ, بانك سەكتورىن كۇشەيتۋ جانە جەرگىلىكتى كاپيتال نارىعىن دامىتۋ, وڭىرارالىق ءىس-قيمىلدى جانە حالىقارالىق ينتەگراتسيانى كۇشەيتۋ, جاسىل ەكونوميكاعا كوشۋدى جەدەلدەتۋ سياقتى سالالاردا ءوزارا ءتيىمدى ىنتىماقتاستىقتىڭ ورناعانى ايتىلدى.
تاراپتار ەكىجاقتى ارىپتەستىكتىڭ قازىرگى دەڭگەيىن جوعارى باعالاي وتىرىپ, تابيعي رەسۋرستار مەن ەنەرگەتيكا سەكتورىنداعى ەققدب جوبالارىن ىسكە اسىرۋ ماسەلەلەرىن, سونىڭ ىشىندە گەندەرلىك تەڭدىك جانە ايەلدەردىڭ وسى سەكتورداعى ءرولىن ارتتىرۋ ماسەلەلەرىن تالقىلادى.
سونداي-اق, قازاقستان رەسپۋبليكاسى ۇكىمەتى مەن ەققدب اراسىنداعى كەلىسىم شەڭبەرىندە «ايەل بيزنەستە» اتتى جوبا ىسكە اسىرىلىپ جاتقانى ايتىلىپ, بۇگىندە وسى جوبا بويىنشا 7 مىڭنان استام شاعىن جانە ورتا بيزنەس سۋبەكتىلەرىنە 5,8 ملرد تەڭگە كولەمىندە قارىز بەرىلگەنى تىلگە تيەك ەتىلدى. قارجىلاندىرۋدان بولەك, اتالعان بانك بيزنەستەگى جاڭا تەحنولوگيالاردىڭ يگەرىلۋىن قامتاماسىز ەتۋ جولىندا دا جۇمىس ىستەيدى.
باۋىرجان مۇقانوۆ,
«ەگەمەن قازاقستان»