جيىندا 2016 جىلعى جۇمىس جوسپارىنىڭ قورىتىندىلارى مەن 2017-2018 جىلدارعا ارنالعان جۇمىس جوسپارى تالقىلاندى. وعان قازاقستان, رەسەي, قىتاي, قىرعىزستان, تاجىكستان, بەلارۋس, پاكىستان جانە ءۇندىستان ەلدەرىنىڭ وكىلدەرى قاتىستى. بۇل فورۋم ەلىمىزدىڭ شانحاي ىنتىماقتاستىق ۇيىمىنا توراعالىعى اياسىندا ءوتتى.
جيىندا ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ بۇل فورۋمنىڭ جاستارعا ءتۇرلى سالادا ىنتىماقتاستىق ورناتۋى مەن تاجىريبە الماسۋىنا سەپتىگىن تيگىزەتىنىن مالىمدەدى. ول, سونداي-اق, ەكسترەميزم ماسەلەسىن قوزعاپ, ونىڭ الدىن الۋ جولدارىن دا ۇسىندى.
– بۇل وتىرىستاعى ماسەلەلەر شىۇ ءسامميتىنىڭ تاقىرىپتارىنا ساي كەلەدى. ينۆەستيتسيالىق, ەكونوميكالىق, گۋمانيتارلىق ءبىلىم بەرۋ, عىلىم سالالارىنداعى كوكەيكەستى ماسەلەلەر قامتىلىپ وتىر. فورۋم بارىسىندا ۇسىنىلاتىن يدەيالارىڭىز اراداعى ءوزارا بايلانىستى نىعايتىپ, جاستار ساياساتىندا جاڭا مەحانيزمدەردىڭ جاسالۋىنا مۇمكىندىك بەرەدى. سونىمەن قاتار, جاستاردى جۇمىلدىرىپ, ەكسترەميزمگە جول بەرمەۋ ءىسى دە نازارعا الىنۋى ءتيىس. اسىرەسە, لاڭكەستىك ۇيىمدار جاستاردىڭ ساناسىن ۋلاپ, قاتارلارىنا قوسىپ الۋعا تىرىسادى. سوندىقتان, وسى ماسەلەدە كاسىپكەرلەر, بەلسەندىلەر, سپورت جاناشىرلارى ارنايى شارالار, جوبالار ۇيىمداستىرىپ, جۇمىسسىز قوعامدا ءوز ورنىن تابا الماي جۇرگەن جاس بۋىنعا سەپتىگىن تيگىزسە, نۇر ۇستىنە نۇر بولار ەدى, – دەدى نۇرلان ەرمەكباەۆ.
باسقوسۋدىڭ باستى ماقساتتارىنىڭ ءبىرى – شىۇ-عا مۇشە ەلدەردىڭ جاستارىمەن تىعىز بايلانىس ورناتۋ. ايتا كەتەرلىگى, 2015 جىلدىڭ شىلدە ايىندا ۇيىمعا ءۇندىستان مەن پاكىستان ەلدەرىن قابىلداۋ ءراسىمى قولعا الىنعان بولاتىن. شاراعا قاتىسقان قىتاي دەلەگاتسياسىنىڭ باسشىسى تسزيا بو پاكىستان مەن ءۇندىستان مۇشە بولعاننان كەيىن ەۋرازيا كەڭىستىگىندە تۋريزم, سپورت, ت.ب. سالالاردا ىنتىماقتاستىق ورناتۋعا مۇمكىندىك كوبىرەك بولاتىنىن العا تارتتى. ول, سونداي-اق, 2017-2018 جىلدارعا ارنالعان ءتيىمدى جوبا قۇرىلاتىنىنا سەنىم ءبىلدىردى.
پاكىستان يسلام رەسپۋبليكاسى دەلەگاتسياسىنىڭ باسشىسى كيران اكبار ۇيىمعا مۇشە ەلدەردىڭ جاستارىمەن تىعىز قارىم-قاتىناس ورناتۋ ءۇشىن پىكىرتالاس الاڭىن ۇسىنۋعا دايىن ەكەندىكتەرىن مالىمدەدى. سونىمەن قاتار, ول ءوز ەلى ەكونوميكا سالاسىنىڭ تۇراقتى دامۋىنا ەرەكشە قىزىعۋشىلىق تانىتىپ وتىرعانىن ايتا كەلىپ, مادەني بايلانىستاردى دا نىعايتۋعا نيەتتى ەكەنىن جەتكىزدى.
– قىسقا عانا ۋاقىت ىشىندە بىرنەشە سالادا تاجىريبە الماستىق, كوپتەگەن جوبالاردى جۇزەگە اسىردىق. ءتۇرلى ۇيىمداردىڭ باسشىلارى جىلى لەبىزدەرىن ءبىلدىرىپ جاتتى. شىۇ مادەني-گۋمانيتارلىق ىنتىماقتاستىققا باسا ءمان بەرىپ كەلەدى. سوندىقتان, وسى باعىتتىڭ قارقىن الىپ, ودان ءارى نىعايا تۇسۋىنە نازار اۋدارۋىمىز كەرەك. ۇيىمعا مۇشە ەلدەردىڭ جاستارى اراسىندا موبيلدىك قابىلەتتەرىن ارتتىرۋىنا كومەك بەرۋىمىز قاجەت. وسى ماقساتتا ارنايى جوبا قۇرىپ, سونى ىسكە اسىرساق دەگەن ۇسىنىسىمىز بار, – دەدى رەسەي دەلەگاتسياسىنىڭ باسشىسى دەنيس كراۆچەنكو.
ايتا كەتەيىك, شىۇ جاستار كەڭەسى 2009 جىلى قۇرىلىپ, بۇگىنگە دەيىن ەلەۋلى جۇمىستار اتقارىپ كەلەدى. كەڭەستىڭ ءبىر ەرەكشەلىگى – قانداي ماسەلەنى دە تەك كونسەنسۋس ارقىلى عانا شەشۋ. ياعني, ۇيىمعا مۇشە ەلدەر وسكەلەڭ ۇرپاققا پايداسى تيەتىن جاڭا باعىتتاردى بىرگە تالقىلاپ, ءبىراۋىزدان شەشىم شىعارادى.
ايان ءابدۋالي, «ەگەمەن قازاقستان»