«بيىلعى ماۋسىمنىڭ ەرەكشەلىگى - ماۋسىم ايىنىڭ ورتاسىندا ەسىل وزەنىندە تۇنگى سەرۋەندى ۇيىمداستىرۋدى كوزدەپ وتىرمىز. بۇل تاسىمالدىڭ قوسىمشا قۋاتى مەن كولەمىن ارتتىرادى. سايكەسىنشە, ءبىزدىڭ كاسىپورىننىڭ قىزمەتىنە كوپ ادام جۇگىنە الادى», - دەدى مەديا ورتالىقتىڭ تىلشىسىنە بەرگەن سۇحباتىندا «ەسىل استانا» مكقك ديرەكتورى قانات الين.
سونداي-اق ول بيىلعى ەسىلدەگى كەمە ماۋسىمى 11 مامىردا باستالعانىن ايتتى. قالا تۇرعىندارى مەن قوناقتارىنا سىيىمدىلىعى ءارتۇرلى 6 جولاۋشىلار تەپلوحودى قىزمەت ەتەدى. تۇنگى تاسىمال كەزىندەگى جايلىلىق پەن قاۋىپسىزدىك ماقساتىندا جولاۋشىلار كەمەلەرىندە جارىقتاندىرۋ قۇرالدارىمەن جابدىقتالعان ارنايى ناۆيگاتسيالىق بەلگىلەر ورناتىلادى. بيلەت باعاسى وزگەرىسسىز بۇرىنعى قالپىندا قالدى. بالالار ءۇشىن – 500, ۇلكەندەر ءۇشىن 1000 تەڭگە. جالپى, كەمەدەگى سەرۋەن قىزمەتىن شامامەن 20 مىڭ جولاۋشى پايدالانادى.
«جاقىندا جاڭا تەپلوحود ساتىپ الىندى. جاڭا تيەگىش كاتەرگە «باتىر» دەگەن اتاۋ بەردىك. بۇل ءبىزدىڭ كەمە پاركىمىزدەگى تەپلوحودتاردىڭ ىشىندەگى ەڭ مىقتىسى دەۋگە بولادى. ول وتكەن جىلى ساتىپ الىنعان بارجدى تىركەپ سۇيرەۋگە مۇمكىندىك بەرەدى. ءارى ەكولوگيالىق تالاپتاردى ساقتاي وتىرىپ, ەسىل وزەنى ارناسىن تازارتۋعا مۇمكىندىك بەرەدى», - دەدى ق.الين.