ونىڭ ىشىندە يندۋستريالىق-يننوۆاتسيالىق باعدارلامانى جۇزەگە اسىرۋ جايى باستى تاقىرىپ جەلىسىنە اينالىپ, تەحنولوگيالىق جاڭعىرتۋ جايىنا ەرەكشە باسىمدىق بەرىلدى. ويتكەنى, يندۋستريالاندىرۋ كارتاسىنا 65 ميلليارد تەڭگەنى قۇرايتىن 36 جوبا ەنگەنىمەن, بىلتىر 12-ءسى وندىرىستىك قۋاتىن تولىق يگەرە الماعان. ال بيىل تورتەۋىنىڭ جۇمىسى ماۋسىمدىق سيپاتپەن عانا شەكتەلگەن. ءتورت ايدا 32,2 ميلليارد تەڭگە ينۆەستيتسيا تارتىلىپ, ءوڭىر رەسپۋبليكادا ەكىنشى ورىندى يەلەنگەنمەن, وسىناۋ ماڭىزدى ىسكە اۋدانداردىڭ اتسالىسۋى كوڭىل كونشىتپەيدى. وبلىس باسشىسى جەرگىلىكتى جەرلەر ءۇشىن قولايلى, ەكونوميكالىق جاعىنان ءتيىمدى يندۋستريالىق-يننوۆاتسيالىق جوبالاردى وندىرىسكە كەڭىنەن قوسۋدى, جاقسى ۇلگىلەردى ناسيحاتتاۋدى تاپسىردى.
ءبىز جيىننان كەيىن يندۋستريالىق-يننوۆاتسيالىق دامۋ باسقارماسىنىڭ جەتەكشىسى جانات سادۋاقاسوۆتى اڭگىمەگە تارتىپ, وزىق تەحنولوگيالاردى ەركىن مەڭگەرۋ باعىتىندا اتقارىلىپ جاتقان شارالار تۋرالى ايتىپ بەرۋىن سۇراعانبىز. ەلباسى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا تسيفرلى تەحنولوگيانى قولدانۋ ارقىلى قۇرىلاتىن جاڭا يندۋستريالاردى وركەندەتۋ تالابىن قويدى. قازاقستاندا 3D پرينتينگ, ونلاين-ساۋدا, ءموبيلدى بانكينگ, تسيفرلى قىزمەت كورسەتۋ سەكىلدى دەنساۋلىق ساقتاۋ, ءبىلىم بەرۋ ىسىندە قولدانىلاتىن جانە باسقا دا پەرسپەكتيۆالى سالالاردى دامىتۋ قاجەتتىگىن اتاپ ءوتتى, دەي كەلىپ, وسى مىندەتتەردى شەشۋ اياسىندا جاڭا يننوۆاتسيالىق ونىمدەر شىعارۋمەن جۇيەلى اينالىسىپ كەلە جاتقان كاسىپورىندار قاتارىنا الدىمەن س.كيروۆ اتىنداعى زاۋىتتى جاتقىزدى. مۇندا مۇناي مەن گاز سالاسىنا قاجەت قوندىرعىلار, قورعانىس مينيسترلىگىنىڭ ارنايى تاپسىرىسىمەن كوپ ارنالى راديوستانسا سەكىلدى التى ۇتقىرلى بايلانىس جۇيەسى كەشەندەرى, تەمىر جول قاۋىپسىزدىگىن قامتاماسىز ەتەتىن اسپاپتار جاسالادى. بىلتىر 2 ميلليارد تەڭگەنىڭ جاڭعىرتۋ جۇمىستارى اتقارىلعان. زاۋىت سونىمەن قاتار «وتاۋ تۆ» تسيفرلى تەلەۆيزياعا ارنالعان «STY» قۇرىلىسىن شىعارۋعا مامانداندىرىلعان. وعان قىتايدىڭ, تايۆاننىڭ, وڭتۇستىك كورەيانىڭ ماتەريالدارى قولدانىلادى. كۇنىنە 1000-1500 دانا قوندىرعى جاساپ شىعارىلىپ, رەسەيدىڭ كورشى ايماقتارىنا دا ساتىلادى.
ەندى «قازاقتەلەراديو» اق-تىڭ ەلىمىزدىڭ سولتۇستىك وڭىرلەرىندە جەرسەرىكتىك ينفراقۇرىلىمىن قالىپتاستىرۋ تاپسىرىسىن الىپ وتىر. جوبا قۇنى – 8 ميلليارد تەڭگە. بيىلدان باستاپ 3D پرينتەرلەرىن شىعارۋ قولعا الىندى. العاشقى ۇلگىلەرى سىناقتان ءساتتى ءوتتى. زاماناۋي تەحنيكا ارقىلى كەز كەلگەن زاتتىڭ 3D فورماتتاعى پلاستماسسا كوشىرمەسىن شىعارۋعا بولادى. بارلىق بولشەكتەر وزىمىزدە قۇراستىرىلادى. جىلىنا ءونىمنىڭ ءۇش مىڭ داناسى شىعارىلماق.
«بلوك» جشس – جوعارى سۇرانىسقا يە ەلەكتر وقشاۋلاعىش ماتەريالدار شىعاراتىن ەلىمىزدەگى ەكى زاۋىتتىڭ ءبىرى. رەسەي, ۋكراينا نارىعىنا ەركىن شىعىپ, ەكسپورتقا ابدەن توسەلىپ العان. ءونىمنىڭ نەگىزى سانالاتىن سليۋدا مينەرالى ءارتۇرلى قىسىمدارعا ءتوزىمدى, جاقسى ىدىرايدى. مۇندا ەلەكتر وقشاۋلاعىش ماتەريالداردىڭ وننان استام ءتۇرى ازىرلەنسە, جارتىسىنا جۋىعىن لاكوتكان, ميكانيت قۇرايدى. ساتىلىم مولشەرى 75 پايىزعا ارتقان. «بيزنەستىڭ جول كارتاسى–2020» باعدارلاماسى شەڭبەرىندە قۇرال جابدىقتار جاڭارتىلعان. تمد ەلدەرىندە بالاماسى جوق جوبا قازىر وندىرىستە كەڭىنەن قولدانىلادى. دالىرەك ايتقاندا, وتە ساپالى ريزولين دەپ اتالاتىن قۇرىلىس ماتەريالىنىڭ وزىق تەحنولوگياسى تابىس كوزىنە اينالعان.
جولداۋدا ەلىمىزدىڭ كەن مەتاللۋرگياسى مەن مۇناي-گاز كەشەندەرىن جاڭا نارىقتارعا شىعارۋ, ءونىم جەتكىزۋ اۋماعىن كەڭەيتۋ, گەولوگيالىق بارلاۋ جۇمىستارىن بەلسەندى جۇرگىزۋ تاپسىرمالارى جۇكتەلگەنىنە توقتالعان جانات عابباس ۇلى پايدالى قازبالار قورىن يگەرۋ سالاسىنا حالىقارالىق ستاندارتتاردى ەنگىزۋ شارالارىن كەشەندى ۇشتاستىرۋدىڭ ماڭىزدىلىعىن جەتكىزدى. وڭىردە 300-گە جۋىق بارلانعان كەن ورنى بار. تايىنشا اۋدانىندا تيتان-تسيركوني, ايىرتاۋ اۋدانىندا قالايى, ءۋاليحانوۆ اۋدانىندا ۋران وندىرىلەتىن بولادى. وسىعان وراي شەتەلدىك ارىپتەستەرمەن كەلىسسوزدەر جۇرگىزىلىپ, ناتيجەسىندە ينۆەستيتسيا- لار تارتۋ, بىرلەسكەن كاسىپورىندار قۇرۋ ۋاعدالاسىنا قول جەتكىزىلگەن. ەلباسىنىڭ قىتايمەن بىرلەسكەن ينۆەستيتسيالىق باعدارلامالاردى ءتيىمدى جۇزەگە اسىرۋ تاپسىرماسى بويىنشا اسپاناستى ەلىنەن «ايتسزيۋ» كومپانياسى تايىنشا اۋدانىنا كەلىپ, ماي زاۋىتىن سالۋعا كىرىسكەن. پرەزيدەنتتىڭ قاتىسۋىمەن وتكەن بىلتىرعى جالپىۇلتتىق تەلەكوپىردە مايلى داقىلداردى قالدىقسىز وڭدەيتىن كەشەننىڭ ءبىرىنشى كەزەگى ىسكە قوسىلعان. جىلدىق جوبالىق قۋاتى – 300 مىڭ توننا. ونىمدەر ەكسپورتقا باعدارلانعان. بۇدان باسقا تاعى ءبىر قىتايلىق «Wuhan Shilinfuxing Techology Development Co Ltd» كومپانياسى ع.مۇسىرەپوۆ اۋدانىندا ەگىنشىلىك سالاسىندا زاماناۋي تەحنولوگيالاردى پايدالانۋ ارقىلى استىق وڭدەۋ, ءونىم قالدىقتارىن كادەگە جاراتۋ سياقتى تولىق تسيكلدى ءوندىرىس ورنىن ۇيىمداستىرۋعا بەل بۋىپ وتىر. قوسىمشا مال فەرماسى مەن تىڭايتقىشتار وندىرەتىن زاۋىت تا سالىنادى. سوندا جارتى مىڭعا جۋىق ادام جۇمىسپەن قامتىلاتىن بولادى.
ج.سادۋاقاسوۆتىڭ سوزىنە قاراعاندا, ونەركاسىپتە جوعارى تەحنولوگيالىق ءوندىرىس قۇرۋ جۇمىستارى ودان ءارى جالعاسادى. ەكىنشى بەسجىلدىقتا ەكونوميكانىڭ باسىم سەكتورلارىنداعى جوبالاردى ەكى ەسەگە دەيىن كوبەيتۋ كوزدەلگەن. بۇل رەتتە جاڭاشىلدىق, باسەكەگە قابىلەتتىلىك الدىمەن ەسكەرىلەدى. وتكەن جىلى 8,8 ميلليارد تەڭگەنىڭ 9 جوباسى پايدالانۋعا بەرىلىپ, 300 جۇمىس ورنى اشىلسا, بيىل 43 جوبا ىسكە اسىرىلۋدا. تۇتاستاي العاندا, 100 ميلليارد تەڭگەنى قۇرايتىن 60 جوبا وندىرىسكە ەنگىزىلەدى.
تاعى ءبىر ماسەلە توقتاپ تۇرعان كاسىپورىندار جايى بولدى. سوڭعى ءبىرجارىم جىلدىڭ ىشىندە 15 كاسىپورىننىڭ جۇمىسى قايتادان جاندانىپ, 300-دەن استام ادام جۇمىس تاپقان. ەندى يندۋستريالاندىرۋ كارتاسى اياسىندا تاعى التى كاسىپورىن تولىق قۋاتىنا قوسىلماق. ولاردىڭ قاتارىندا اعاش وڭدەيتىن, كىرپىش شىعاراتىن, تەمىر-بەتون ونىمدەرىن جاسايتىن, استىق قابىلدايتىن ءارى ساقتايتىن وندىرىستەر, ەت كومبيناتى, «بيوحيم» كەشەنى بار.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى