شارادا تارمپي رەكتورى داريا قوجامجاروۆا مەرەيتوي يەسىن ينستيتۋت ۇجىمىنىڭ اتىنان قۇتتىقتاپ, ونىڭ ۇلت رۋحانياتىنا, قازاق ادەبيەتى مەن ونەرىنىڭ دامۋىنا قوسقان ولشەۋسىز ۇلەسىن جەتكىزدى. – مىرزاتاي جولداسبەك ۇلى – ۇلتتىق يدەولوگيانى نەگىزدەۋدە ۇلتقا قىزمەت ەتۋدىڭ سونى ۇلگىسىن كورسەتىپ جۇرگەن ازاماتتاردىڭ بىرەگەيى. ول – ءتۇپ-تامىرىمىز سانالار تۇرىك قاعاناتى كەزىندەگى ورحون-ەنيسەي جازبا ەسكەرتكىشتەرىن قازاق عالىمدارى اراسىندا العاشقىلاردىڭ ءبىرى بولىپ جاڭاشا زەرتتەپ, ونى قازاق تىلىندە سويلەتتى. ول – كوپشىلىك «جىر الىبى» دەپ ات قويىپ, ايدار تاققان جامبىلدىڭ شىعارماشىلىعىن تىڭنان تۇرەن سالىپ زەردەلەي ءبىلدى. مىرزاتاي جولداسبەك ۇلى – ەگەمەندىكتىڭ ەلەڭ-الاڭ كەزىنەن ەلباسىنىڭ قاسىنان, تالاي يگىلىكتى ءىستىڭ باسىنان تابىلدى. ۇلاعاتتى عالىم, ءتالىمدى ۇستاز, بىلىكتى باسشى رەتىندە ءسىز بىرنەشە بۋىن ۇرپاقتى تاربيەلەپ, ەلىمىزدە تاجىريبەلى فيلولوگتار مەن تاريحشىلار مەكتەبىن قالىپتاستىرا الدىڭىز. ادامزاتتىڭ ابايى «ادامنىڭ ادامشىلىعى جاقسى ۇستازدان بولادى» دەيدى. وسى رەتتە ءسىز سياقتى عالىمنىڭ بىزگە شامشىراق ىسپەتتەس جول باستاپ جۇرگەنى جۇرەگىمىزگە قۋانىش ۇيالاتادى. ءسىزدىڭ ءجۇرىپ وتكەن سەكسەن جىلدىق عۇمىرىڭىز – ءسىز ءۇشىن جاي جىلدار جيىنتىعى ەمەس, ىزدەنىس پەن ەڭبەكتىڭ, تالپىنىس پەن تابىستىڭ, ۇيرەنۋ مەن ۇيرەتۋدىڭ جىلدارى بولدى. بۇگىنگى مەرەيلى جاسىڭىزعا تاعى دا ۇزاق عۇمىر تىلەي وتىرىپ, جەتكەن جەتىستىكتەرىڭىزدىڭ بارلىعىن – ەتكەن ەڭبەگىڭىزدىڭ جانعانى, ماقساتتارىڭىزدىڭ ورىندالعانى دەپ بىلەمىز. ۇلتتىق مۇددە جولىندا اتقارىلار ماڭىزدى ىستەرگە سوزىمەن دە, ىسىمەن دە سۇبەلى ۇلەس قوسىپ كەلە جاتقان ەڭبەك جولىڭىز بۇگىندە جەمىستى جالعاسىن تاۋىپ كەلەدى. سوندىقتان دا, ءسىزدى كەيىنگى بۋىنعا ۇلاعاتتى ۇلگى كورسەتىپ كەلە جاتقان زيالى تۇلعالاردىڭ ءبىرى دەپ باعالايمىز, – دەدى د. قوجامجاروۆا. سونىمەن قاتار, ينستيتۋت باسشىسى م. جولداسبەكوۆتىڭ ەل الدىنداعى ەلەۋلى ەڭبەگىن ەسكەرىپ, قوعام قايراتكەرىن «تاراز مەملەكەتتىك پەداگوگيكالىق ينستيتۋتىنىڭ 50 جىلدىعى» مەرەكەلىك مەدالىمەن ماراپاتتاپ, سىي-سياپات كورسەتتى. سونداي-اق, سالتاناتتى جيىندا عۇمىرى عيبراتتى, تاعدىرى تاعىلىمدى تۇلعانى «قازاقستان – تاراز» جامبىل وبلىستىق تەلەارناسىنىڭ ديرەكتورى مەيرامبەك تولەپبەرگەن, د. قوناەۆ اتىنداعى حالىقارالىق قوردىڭ جامبىل وبلىستىق بولىمشەسىنىڭ توراعاسى امانكەلدى قارەنتاەۆ سىندى ازاماتتار قۇتتىقتادى. ال, اتاقتى كومپوزيتور ءارى ونەر زەرتتەۋشىسى, قازاقستاننىڭ ەڭبەك سىڭىرگەن مادەنيەت قايراتكەرى يليا جاقانوۆ تۇركىتانۋشى عالىمنىڭ سازگەرلىك قىرى توڭىرەگىندە كەڭىنەن اڭگىمە ءوربىتىپ, اسەرلى ەستەلىگىمەن ءبولىستى. قازىنالى قارت قاراتاۋدىڭ قويناۋىندا, تالاستىڭ بويىندا, اقتوبە اتتى اۋىلدا دۇنيەگە كەلگەن مىرزاتاي جولداسبەك ۇلى 1955 جىلى الماتىعا كەلىپ, قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە وقۋعا تۇسەدى. ول ءبىلىم مەن عىلىمنىڭ قاراشاڭىراعى اتانعان وردالى وقۋ ورنىندا مۇحتار اۋەزوۆ, الكەي مارعۇلان, ەسماعامبەت ىسمايىلوۆ, بەيسەنباي كەنجەباەۆ, مۇحامەتجان قاراتاەۆ, نىعمەت ساۋرانباەۆ, زەينوللا قابدولوۆ سەكىلدى عۇلاما عالىمداردان ءدارىس الىپ, عىلىم جولىنا ءبىرجولا بەت بۇرادى. كوزىقاراقتى كوپشىلىك قاۋىم مىرزاتاي جولداسبەكوۆتى تۇرىك قاعاناتى كەزىندەگى ورحون-ەنيسەي جازبا ەسكەرتكىشتەرىن قازاق عالىمدارى اراسىندا العاشقىلاردىڭ ءبىرى بولىپ جاڭاشا زەردەلەپ, قازاق تىلىندەگى اۋدارماسىن عىلىمي اينالىمعا ەنگىزگەن, جىر الىبى جامبىل جاباەۆ پەن كەنەن ازىرباەۆتىڭ شىعارماشىلىعىن زەرتتەۋگە مول ۇلەس قوسقان, ولاردىڭ اقىندىق مەكتەبىن جان-جاقتى تالداعان عالىم, كوپتەگەن مەملەكەتتىك قىزمەتتەردى اتقارعان قايراتكەر رەتىندە جاقسى بىلەدى. جيىن بارىسىندا مەرەيتوي يەسى اقپەيىل ىستىق ىقىلاسى ءۇشىن جامبىلدىق جۇرتشىلىققا ريزاشىلىعىن ءبىلدىرىپ, تاعىلىمى مول عيبراتتى اڭگىمە ايتتى. اسىرەسە, جاستاردىڭ ساناسىنا ۇلتتىق رۋحتى ءسىڭىرۋ, ولاردى ۇلتجاندى ازامات بولۋعا ۇندەۋ جانە ءتول تاريحىمىزدى قايتا زەردەلەۋدە عاسىرلار قويناۋىنان تامىر تارتاتىن قازاق مەملەكەتىنىڭ قالىپتاسۋى مەن دامۋى جايىندا دا سىر شەرتتى. كەش سوڭى پەداگوگيكالىق وقۋ ورنىنىڭ ونەر ۇجىمدارىنىڭ كونتسەرتىنە ۇلاستى. – تاراز مەملەكەتتىك پەداگوگيكالىق ينستيتۋتىندا باستاۋ العان «جانىڭدا ءجۇر جاقسى ادام» جوباسى اياسىندا ءوزىنىڭ ەرەن ەڭبەگىمەن, تەرەڭ بىلىمىمەن, ءورىستى ونەرىمەن وزىق شىققان تۇلعالارمەن كەزدەسۋلەر ۇيىمداستىرۋ قولعا الىندى. مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىن جۇزەگە اسىرۋ ماقساتىنداعى شارا جاستاردىڭ ومىرگە شىنايى كوزبەن قاراپ, ءوز تاعدىرلارىنا وزدەرى يەلىك ەتە الاتىن ازاماتتار بولۋىنا مۇرىندىق بولماق. بۇگىنگى جيىن دا اتالعان جوبا اياسىندا وتكىزىلىپ وتىر, – دەدى تارمپي-دىڭ اقپاراتتىق-يميدجدىك قىزمەتىنىڭ جەتەكشىسى جاندار اسان.
تاراز مەملەكەتتىك پەداگوگيكالىق ينستيتۋتىندا مەملەكەت جانە قوعام قايراتكەرى, كورنەكتى عالىم مىرزاتاي جولداسبەكوۆپەن كەزدەسۋ ءوتتى. الاش ارداقتىسىنىڭ 80 جىلدىق مەرەيتويى قارساڭىندا ۇيىمداستىرىلعان جيىنعا بەلگىلى ازاماتتار, زيالى قاۋىم وكىلدەرى جانە وقۋ ورنىنىڭ پروفەسسور-وقىتۋشىلارى مەن ستۋدەنتتەرى قاتىستى.