جۋىردا ءيىرىمى تەرەڭ ينتەرنەتتى پاراقتاپ وتىرىپ, الەمدەگى ەڭ بيىك تۋتۇعىرلاردىڭ رەيتينگىن كوزىم شالىپ قالدى. ونى جاريالاۋشى «Sputnik» سايتى. سان ەلدىڭ تۋ بايلاعان تۇعىرىن سالىستىرعان اتالمىش سايت ءبىزدىڭ بايراعىمىزدىڭ بيىك ورنالاسۋ رەيتينگىن توعىزىنشى دەپ باعالاپتى. ەندى مىنا سايكەستىككە سۇيسىنبەي كورىڭىز: تەرريتورياسىنىڭ اۋقىمى بويىنشا الەمدە توعىزىنشى ورىندى يەلەنەتىن قازاقستان بۇل رەيتينگتە دە تۋرا سول ورنىنا تۇراقتاپتى. كوڭىلىمىز ءوسىپ, كەۋدەمىز كوتەرىلىپ قالدى. راسىندا دا, ەلوردامىز استانانىڭ قاق تورىندەگى 111 مەترلىك تۋتۇعىردان جەلبىرەگەن كوك بايراعىمىز قالانىڭ قاي قىرىنان دا مەنمۇندالاپ كوزگە شالىناتىنداي بيىك ەمەس پە؟! ال الگىلەر تۇزگەن رەيتينگتەگى كوشتىڭ باسىن 171 مەترلىك تۇعىرعا تۋ تىككەن ساۋد ارابياسىنىڭ جيددا شاھارى باستايدى. ءدال سودان كەيىنگى ورىندى دۋشانبەدەگى 165 مەترلىك تاجىكستاننىڭ باس بايراعى يەمدەنىپتى. ۇشتىكتى تۇيىندەۋ ازەربايجاننىڭ باكۋ قالاسىنا بۇيىرعان سياقتى. مۇنداعى تۋدىڭ بيىكتىگى – 162 مەتر. ودان كەيىنگى ورىنعا كحدر-ءدىڭ كيدجوندون قالاسى جايعاسقان. بۇل ەلدىڭ الىپ تۋى 160 مەترلىك دەڭگەيدە. جوعارىداعى ءتىزىمدى ودان ارمەن تۇرىكمەنستاننىڭ اشحابادى جالعايدى. بۇل ەلدىڭ باس بايراعى 133 مەتر بيىكتىكتەن جەلبىرەيدى ەكەن. ءتىپتى, ءبىر-بىرىنەن اسىرىپ, قوس-قوستان تۋتۇعىر قويعان مەملەكەتتەر دە تابىلدى. ماسەلەن, 2003 جىلى يوردانيانىڭ استاناسى اممان قالاسى ءۇشىن 128,5 مەترلىك فلاگشتوك ارنايى جاسالعان. ال كەيىننەن وسى ەلدىڭ اكابا شاھارىندا ودان دا بيىك تۋ پايدا بولدى. ونىڭ بيىكتىگى 136 مەتردى قۇرادى. تاعى ءبىر مەملەكەتتىڭ باس تۋى 122 مەترلىك دەڭگەيدە ورنالاسىپتى. بۇل بىرىككەن اراب امىرلىكتەرىنىڭ ءابۋ-دابي شاھارى بولاتىن. مىنە, سايت تۇزگەن ءتىزىم وسىلاي تىزبەكتەلىپ كەتە بارادى. توعىزىنشىعا تۇراقتى جايعاسقان قازاقستاننان كەيىنگى ورىنداردى مالايزيا, تاعى دا تۇرىكمەنستاننىڭ اۆازا قالاسى, قىرعىزستان, بەلارۋس, ۋكراينا, برازيليا مەملەكەتتەرى ءوزارا ءبولىستى. ءبىر ەسكەرەتىنى, نەگىزىنەن بۇل رەيتينگ ازيا مەن شىعىس ەۋروپا ەلدەرىن عانا قامتىعان سياقتى. ال اقش پەن ەۋروپا جۇرتى بۇل تالاستان تىسقارى قالعانداي كورىندى.
امانگەلدى قياس, «ەگەمەن قازاقستان»