«جۋىردا ەكسپو اشىلادى, وسىعان بايلانىستى استانانىڭ جاڭا ماقتانىشى بولاتىن جاڭا نىسانداردى ارالاپ ءجۇرمىن. بۇل بۇرىنعى كەڭەس ەلدەرى اراسىنداعى وسىنداي جالعىز ۆوكزال, مەن ءتىپتى ەۋروپادا مۇندايدى كورگەن جوقپىن. ول بولاشاققا ارنالىپ سالىنعان. قازاقستاننىڭ بارلىق ءوڭىرىن «تالگو» جۇردەك پويىزىمەن بايلانىستىردىق, ولار ساعاتىنا 150-200 شاقىرىم جىلدامدىقپەن جۇرە الادى. بۇرىن الماتىدان 24 ساعاتتا جەتەتىن بولساق, قازىر 11 ساعات جەتكىلىكتى», دەدى پرەزيدەنت. ۆوكزال جولاۋشىلار اعىنىن, كەزەگىن, قاۋىپسىزدىگىن, ەلەكتروندى بيلەت ساتۋ پروتسەسىن ينتەللەكتۋالدى باسقارۋ جەلىسىمەن قامتىلعان. ۆوكزالدىڭ ءبىرىنشى جانە ەكىنشى قاباتتارىندا 740 كولىككە ارنالعان اۆتوتۇراق بار. سونىمەن قاتار, ول جەردە قىزمەتتىك-تەxنيكالىق بولمەلەر ورنالاسقان. ءۇشىنشى قاباتتا شاتىر استىندا پەررون ورنالاسقان. ءتورتىنشى قابات ەڭ نەگىزگىسى بولىپ سانالادى. مۇندا باستى كىرەبەرىس پەن 10 بيلەت كاسساسى, انىقتاما بيۋروسى, ساۋدا ورىندارى بار. بەسىنشى قاباتتا تاماقتانۋ ورىندارى بولسا, التىنشى قاباتتا اكىمشىلىك كەڭسەلەر بولادى. سونىمەن قاتار, ۆوكزالدا انا مەن بالا بولمەلەرى, قوناق ءۇي, مەديتسينالىق پۋنكت بار. ۆوكزالدىڭ قاۋىپسىزدىگىنە دە كوپ كوڭىل بولىنگەن. عيماراتتا ادامداردى تەكسەرىستەن وتكىزەتىن 16 كىرەبەرىس بار. ونىڭ ۇستىنە اقىلدى جۇيەمەن باسقارىلاتىن 510 شاقتى كامەرا ورناتىلعان. بۇل ۆوكزالعا نەگىزىنەن سوڭعى ايالداماسى استانا بولاتىن پويىزدار قاتىنايدى. ال ەسكى ۆوكزالدا ترانزيتتىك پويىزدار مەن قالا ماڭى قاتىناسىنا باسىمدىلىق بەرىلمەك. كەلەسى جىلى قالانىڭ ورتالىعىن, ەكسپو, نازارباەۆ ۋنيۆەرسيتەتى مەن اۋەجايدى قوساتىن جەڭىل رەلستى كولىك (LRT) جەلىسى تارتىلاتىنى ءمالىم. وسى ورايدا, جاڭا ۆوكزال جانىنان قالاارالىق اۆتوبۋستار ايالدايتىن ارنايى عيمارات سالىنىپ جاتىر. ولاردىڭ ءوز كاسسالارى بولادى. قالالىق تاكسيگە دە جەكە ورىن جاسالماق. «نۇرلى جول» تەمىر جول ۆوكزالىنىڭ قۇرىلىسى كەزىندە 2 مىڭ جۇمىس ورنى اشىلسا, نىسان پايدالانۋعا بەرىلگەننەن كەيىن 1,8 مىڭ ادام تۇراقتى جۇمىسپەن قامتىلماق.
باۋىرجان مۇقانوۆ, «ەگەمەن قازاقستان»
سۋرەتتەر پرەزيدەنتتىڭ باسپاسوز قىزمەتىنەن الىندى