سارسەنبى كۇنى New York Times گازەتى وقيعا ورنىنان تابىلعان جارىلعىش زاتتاردىڭ قالدىقتارىنىڭ سۋرەتىن جاريالاعان بولاتىن. ۇلىبريتانيا بيلىگى تەرگەۋ كەزىندە مۇنداي ماتەريالداردىڭ جارىققا شىعۋى قىلمىستى اشۋعا كەدەرگى جاسايدى دەپ سانايدى. اقش رەسمي وكىلدەرى مانچەستەردەگى تەراكتىگە قاتىستى مالىمەتتەر تۋرالى امەريكالىق جۋرناليستەرگە وقيعا بولعان سوڭ كوپ ۇزاماي-اق حابارلاي باستادى. سەيسەنبى كۇنى اقش باسىلىمدارى جارىلىستان قانشا ادامنىڭ ولگەنى, ونى جانكەشتىنىڭ جاساعانىن جازدى. بىرنەشە ساعات وتكەن سوڭ تەررورشىنىڭ اتىن جاريا ەتتى. ال ۇلىبريتانيا ۇكىمەتى جارىلىستى جاساۋشى سالمان ادەبيدىڭ تەرگەلۋى ءتيىس تۋىستارى, دوستارى الدىن-الا ءبىلىپ قويماۋى ءۇشىن قىلمىسكەردىڭ اتىن قۇپيا ۇستاعىسى كەلگەن. ودان كەيىن فرانتسيانىڭ ىشكى ىستەر ءمينيسترى جەرار كوللومب فرانتسۋز تەلەۆيدەنيەسىنە بەرگەن سۇحباتىندا ادەبيدىڭ ليۆيادا جانە سيريادا بولعانى تۋرالى ايتتى. بۇل اقپاراتتى بريتان وكىمەتى جاريالاعىسى كەلمەگەن. (سۋرەتتە وقيعا ورنىنان بريتان پوليتسياسى اكەتكەن, New York Times جاريالاعان دەتوناتور)
بۇدان بىرنەشە ساعات وتكەن سوڭ ۇلىبريتانيانىڭ ىشكى ىستەر ءمينيسترى ەمبەر رادد اقش وكىمەتىنەن تەراكتىگە قاتىستى اقپاراتتاردى جاريالاۋدى توقتاتۋدى تالاپ ەتتى. «بريتان ۇكىمەتى تەرگەۋ جۇمىستارىنىڭ قۇپيا ساقتالۋى, جوسپارلاردىڭ جاريا بولماۋى ءۇشىن اقپاراتتار اعىنىن باقىلاۋدان شىعارماۋدى قالايتىنىن انىق بىلدىرگەن بولاتىن. سوندىقتان ولاردىڭ باسقا دەرەككوزدەر ارقىلى جارىققا شىعىپ كەتۋى قىنجىلتادى. مەن ارىپتەس دوستارىمىزعا ونداي ارەكەتتىڭ ەندى قايتالانباۋى كەرەكتىگىن انىق جەتكىزدىم» دەگەن ەمبەر راددتىڭ ءسوزىن The Guardian كەلتىرەدى. باسىلىمنىڭ ايتۋىنشا, بريتان رەسمي ادامدارىنىڭ اقش-قا مۇنداي وكپە ايتۋى سيرەك كەزدەسەتىن وقيعا. الايدا, اقش باسىلىمدارى تەراكتىگە قاتىستى مالىمەتتەردى جاريا ەتۋدى توقتاتپادى. كەشە New York Times مانچەستەردەگى شابۋىلدا قولدانىلعان بومبا دەتالدارىنىڭ, بومبا سالىنعان ريۋكزاك قالدىقتارىنىڭ جانە بومبانى جارۋعا قولدانىلعان دەتوناتوردىڭ سۋرەتىن جاريالادى. The Guardian-نىڭ ايۋتىنشا, بۇلار – سوتتا دالەل رەتىندە قولدانارلىق اسا ماڭىزدى دايەكتەر. بريتان تاراپى بۇل ماتەريالداردى دا امەريكالىق جۋرناليستەرگە اقش بيلىگى بەردى دەگەن پىكىردە. بۇگىن ءمالىم بولعان اقپاراتتار بويىنشا, بريتان پرەمەرى تەرەزا مەي ناتو سامميتىندە بولاتىن كەزدەسۋدە اقش پرەزيدەنتى دونالد ترامپپەن وسى ماسەلەنى تالقىلاۋى مۇمكىن. ەرجان ءابدىرامان, «ەگەمەن قازاقستان».