بۇۇ وركەنيەتتەر ءاليانسىنىڭ (UNAOC) جوعارى وكىلى ناسير ابدۋلازيز ءال-ناسەر قازۇۋ رەكتورى عالىم مۇتانوۆپەن ىنتىماقتاستىق جانە بىرلەسىپ جۇمىس ىستەۋ جونىندە كەلىسىمگە قول قويا وتىرىپ, 2020 جىل ءال-فارابي جىلى بولۋى كەرەك دەگەن ۇسىنىس ايتتى.
قازاقستاندىق جوعارى وقۋ ورنىنا رەسمي ساپارمەن العاش رەت كەلىپ وتىرعان بۇۇ جوعارى مارتەبەلى وكىلى قاتىسقان ءىس-شاراعا قازۇۋ باسشىلىعى, وقىتۋشىلار مەن ستۋدەنتتەر, ديپلوماتيالىق ميسسيا, قوعام جانە بۇقارالىق اقپارات قۇرالدارىنىڭ وكىلدەرى قاتىستى. قازۇۋ رەكتورى, اكادەميك عالىم مۇتانوۆ قادىرلى مەيماندى ۋنيۆەرسيتەت قىزمەتىمەن جانە جەتىستىكتەرىمەن, بۇۇ-نىڭ تۇراقتى دامۋ جونىندەگى «اكادەميالىق ىقپال» باعدارلاماسىنىڭ جاھاندىق حابى جايلى جۇمىستارىمەن كەڭىنەن تانىستىردى. كەزدەسۋدە ناسير ابدۋلازيز ءال-ناسەر بۇۇ وركەنيەتتەر ءاليانسىنىڭ جۇمىسى, قىزمەتىنىڭ نەگىزگى باعىتتارى مەن اكادەميالىق بىرلەستىكتىڭ اليانس باعدارلامالارىنا قاتىسۋى تۋرالى ايتتى. «ۇزدىك جوعارى وقۋ ورىندارىنىڭ ءبىرى بولىپ تابىلاتىن مۇنداي بەدەلدى ۋنيۆەرسيتەتتىڭ وقىتۋشىلارى مەن ستۋدەنتتەرىنىڭ الدىندا ءسوز سويلەۋ مەن ءۇشىن ۇلكەن مارتەبە. UNAOC سىزدەردىڭ ۋنيۆەرسيتەتتەرىڭىز ءتارىزدى وقۋ ورىندارىنىڭ مادەنيەتتەر ديالوگىندا ومىرلىك ماڭىزدى ءرول اتقاراتىنىن مويىندايدى», – دەدى بۇۇ وركەنيەتتەر ءاليانسىنىڭ باسشىسى. ول ءوز سوزىندە, سونداي-اق, ءبىلىم بەرۋدىڭ اليانس جۇمىسىنداعى باستى باسىمدىقتىڭ ءبىرى ەكەندىگىن اتاپ ءوتتى. «جاستارعا ۇلكەن كوڭىل بولىنۋدە, جاھاندىق ءتۇرلى جوبالارعا كوپتەگەن ۋنيۆەرسيتەتتەر قوسىلۋدا جانە ولار ۇيىمنىڭ مادەنيەتارالىق ديالوگ, بەيبىتشىلىك پەن وركەنيەتتى ساقتاۋ جونىندەگى باستامالارىنا قولداۋ كورسەتۋدە», – دەدى ول. ناسير ابدۋلازيز ءال-ناسەر عالامدىق كۇن تارتىبىندەگى سۇراقتارعا تولىققاندى جاۋاپ بەردى. ول قازاقستاننىڭ الەمدىك قوعامداستىقتىڭ قولداۋىنا يە بولعان يادرولىق قارۋدى تاراتپاۋ جانە ايماقتىق قاۋىپسىزدىكتى ساقتاۋ جونىندەگى بەيبىت باستامالارىن, سيرياداعى جاعدايدى رەتتەۋگە قوسقان مەملەكەتتىڭ ۇلەسىن ايرىقشا اتاپ ءوتتى. «راديكالدى ەكسترەميستەر وزدەرىن جاقتاۋشىلاردى جاستار اراسىنان ىزدەيدى, وعان سەبەپ – ساۋاتسىزدىق, كەدەيلىك جانە جۇمىسسىزدىق. مەكتەپتە جانە ۋنيۆەرسيتەتتەردە جاستاردى مادەنيەتتىلىككە ۇيرەتۋ ماڭىزدى, ءبىز ءبىر-ءبىرىمىزدى قۇرمەتتەي ءبىلۋىمىز كەرەك. ءبىلىم, عىلىم جانە جاڭا تەحنولوگيالار الەمنىڭ تۇراقتى دامۋىنىڭ نەگىزى بولۋى ءتيىس. بۇل ۇجىمدىق كۇشتى تالاپ ەتەدى. قازاقستان بەيبىتشىلىك پەن تۇراقتىلىقتى ساقتاۋعا كوپ كۇش سالۋدا, ءبىز ونى باعالايمىز», – دەدى بۇۇ وركەنيەتتەر ءاليانسىنىڭ جەتەكشىسى. بۇل كەزدەسۋدەگى قوزعالعان باستى تاقىرىپتىڭ ءبىرى – يۋنەسكو قولداۋىمەن 2020 جىلدى ء«ال-فارابي جىلى» دەپ جاريالاۋ باستاماسى بولدى. ۇلى فيلوسوفتىڭ 1150 جىلدىق مەرەيتويىنا وراي حالىقارالىق دەڭگەيدە ءىس-شارالار وتكىزۋ تۋرالى قازۇۋ يدەياسىنا قولداۋ بىلدىرگەن بۇۇ وركەنيەتتەر ءاليانسىنىڭ جوعارى وكىلى: «بۇۇ-نىڭ تۇراقتى دامۋ بويىنشا «اكادەميالىق ىقپال» جاھاندىق حابىن باسقاراتىن ءال-فارابي اتىنداعى قازاق ۇلتتىق ۋنيۆەرسيتەتى – الەمگە تانىمال عىلىم مەن ءبىلىم ورتالىعى. بۇل ۇلى ويشىل جانە ۇزدىك فيلوسوف يبن ءابۋ ناسىر ءال-ءفارابيدىڭ قۇر- مەتىنە اتالعان جالعىز وقۋ ورنى. ونىڭ مۇراسى كۇنى بۇگىنگە دەيىن اقىل مەن جۇرەكتى بايىتىپ, ءبىلىمنىڭ قايتا جاڭارعان كۇشىنىڭ جارقىن ۇلگىسى بولىپ تابىلادى», – دەدى. عىلىمي كەڭەستىڭ شەشىمىمەن ءبىلىم مەن عىلىمنىڭ دامۋىنا قوسقان ايرىقشا ۇلەسى ءۇشىن ناسير ابدۋلازيز ءال-ناسەرگە ۋنيۆەرسيتەتتىڭ قۇرمەتتى دوكتورى اتاعى بەرىلدى. ونى راستايتىن قۇجات پەن مانتيانى جوو رەكتورى عالىم مۇتانوۆ بۇۇ وركەنيەتتەر ءاليانسى جەتەكشىسىنە سالتاناتتى تۇردە تابىستادى.
ميرا بايبەك,
«ەگەمەن قازاقستان»
الماتى