جيىندا پرەمەر-ليگانىڭ سەگىزىنشى تۋرى مەن ءبىرىنشى ليگانىڭ التىنشى تۋرىنىڭ ەپيزودتارى قاراستىرىلدى. كلۋبتار جالپى كولەمى 1 ميلليون 150 مىڭ تەڭگە ايىپپۇل تولەيتىن بولدى.
ماتچتىڭ رەسمي وكىلدەرىنە قاراستى ايتىلعان بالاعات سوزدەرى ءۇشىن «ەرتىس» فۋتبول كلۋبىنىڭ باس جاتتىقتىرۋشىسى ديميتار ديميتروۆ پەن ونىڭ اسسيسەنتى پەتار كولەۆتىڭ ارقايسىسىنا 300مىڭ تەڭگە ايىپپۇل تاعايىندالدى.
ءبىر ويىن بارىسىندا بەس جانە ودان كوپ ويىنشىسى سارى قاعاز الىپ ۇلگەرگەن «اتىراۋ» جانە «وقجەتپەس» كوماندالارى 150 مىڭ تەڭگە ايىپپۇل تولەمەك.
«توبىل» كلۋبىنىڭ قورعاۋشىسى سەرگەي مالىي «وقجەتپەسپەن» قاشىقتىقتان كەزدەسۋدەگى ءتارتىبى ءۇشىن ەكى ماچتتان الاستاتىلدى. سول ويىندا قىزىل قاعاز العان انتون كۋكسين ءبىر ويىندى جىبەرىپ الماق.
ەڭ ۇزاق مەرزىمدى ديسكۆاليفيكاتسيالاۋعا «تاراز» فۋتبول كلۋبىنىڭ قورعاۋشىسى ءارى كاپيتانى نۇرتاس قۇرعۋلين ۇشىرادى. ول «قايراتپەن» اراداعى ويىندا رەسمي وكىل تاراپىنا ايتقان بالاعات ءسوزى ءۇشىن جەتى بىردەي ماتچتان الاستاتىلماق.
ءبىرىنشى ليگادا ءبىر ويىندا بەس جانە ودان دا كوپ ويىنشىسى ەسكەرتۋ قاعازىن العان «قىزىل-جار سق» فۋتبول كلۋبى 150 مىڭ تەڭگە ايىپپۇل ارقالادى. دورەكى ويىنى ءۇشىن «قىران» قورعاۋشىسى ەركەبۇلان امانگەلدى ەكى ماتچتان, «شاحتەر-بولاتتىق» قورعاۋشى باۋىرجان ناۋرىزباەۆ ءۇش كەزدەسۋدەن الاستاتىلدى.
ايساۋلە سەزبەك