كەشە پارلامەنت سەناتىنىڭ توراعاسى قايرات ءماميدىڭ توراعالىق ەتۋىمەن وسكەمەندە پارلامەنت سەناتى جانىنداعى جەرگىلىكتى وكىلدى ورگاندارمەن (ماسليحاتتارمەن) ءوزارا ءىس-قيمىل جونىندەگى كەڭەستىڭ كوشپەلى وتىرىسى بولدى. شارا «قازاقستان رەسپۋبليكاسىنداعى جەرگىلىكتى ءوزىن ءوزى باسقارۋ جانە ونى زاڭنامالىق تۇرعىدا رەتتەۋدى جەتىلدىرۋدىڭ كەلەشەگى» تاقىرىبىنا ارنالدى, دەپ حابارلادى وسى پالاتانىڭ ءباسپاسوز قىزمەتى.
جەرگىلىكتى اكتيۆ الدىندا قايرات ءمامي ءسوز سويلەدى. بۇل كەزدەسۋدىڭ ەل تاۋەلسىزدىگىنىڭ 20 جىلدىعى قارساڭىندا ءوتىپ وتىرعانى ماڭىزدى ەكەنىن اتاپ وتە كەلىپ, توراعا قازاقستان مەملەكەتتىلىگىنىڭ قالىپتاسۋى مەن دامۋىنداعى 2011 جىلدىڭ تاريحي كەزەڭ ەكەنىن اتاپ ءوتتى.
ق.ءمامي تاۋەلسىزدىكتىڭ 20 جىلدىعى دەكلاراتسياسىن قابىلداۋ جونىندەگى پارلامەنتتىڭ باستاماسى تۋرالى اڭگىمەلەپ, وندا دەربەس دامۋ كەزەڭىندەگى قازاقستاننىڭ باستى جەتىستىكتەرى كورسەتىلەتىنى جايىنا توقتالدى.
جەرگىلىكتى بيلىك ورگاندارىنىڭ ءرولىن نىعايتۋ جانە جەرگىلىكتى ءوزىن ءوزى باسقارۋدى دامىتۋ ماسەلەلەرىنە قاتىستى ق.ءمامي «نۇر وتان» پارتياسىنىڭ ءحىىى سەزىندە ەلىمىزدىڭ پرەزيدەنتى ساياسي جۇيەنى ودان ءارى جاڭعىرتۋ قاجەتتىگىن ايتقانىن, ونىڭ ماڭىزدى قۇرامى پارلامەنت وكىلەتتىگىن كەڭەيتۋ مەن جەرگىلىكتى بيلىك ورگاندارىنىڭ ءرولىن نىعايتۋ ەكەنىن اتاپ كورسەتتى.
– «جەرگىلىكتى ءوزىن ءوزى باسقارۋ مەملەكەتتىك باسقارۋ جۇيەسىنىڭ تولىققاندى جانە كۇشتى بۋىنى بولۋى ءتيىس», – دەدى توراعا. جوعارعى زاڭ شىعارۋ ورگانىندا جەرگىلىكتى ءوزىن ءوزى باسقارۋدى دامىتۋ ماسەلەلەرىنە ەرەكشە نازار اۋدارىلادى. پارلامەنت سەناتىندا جەرگىلىكتى وكىلدى ورگاندارمەن (ماسليحاتتارمەن) ءوزارا ءىس-قيمىل جونىندەگى قوعامدىق كەڭەس جانە «ءوڭىر» دەپۋتاتتىق توبى قۇرىلدى. بۇل قۇرىلىمداردىڭ جۇمىسى وسى سالاداعى زاڭنامانى جەتىلدىرۋ مەن ايماقتاردى دامىتۋعا جاردەمدەسۋگە باعىتتالعان.
ەلىمىزدە العاش رەت وسكەمەندە 1996 جىلى جەرگىلىكتى ءوزىن ءوزى باسقارۋ كوميتەتتەرى پايدا بولعان ەدى. جەرگىلىكتى ماڭىزى بار ماسەلەلەردى شەشۋگە ازاماتتاردى قاتىستىرۋدا وڭ تاجىريبەلەر جيناقتالدى. توراعا اتاپ وتكەندەي, وڭ ءتاجىريبەنى زەردەلەۋ جەرگىلىكتى ءوزىن ءوزى باسقارۋدىڭ قازاقستاندىق ۇلگىسىن جەتىلدىرۋگە قىزمەت ەتەتىن بولادى.
بيىلعى ءساۋىر ايىنداعى كەڭەيتىلگەن وتىرىستا مەملەكەت باسشىسى ۇكىمەت الدىنا جەرگىلىكتى ءوزىن ءوزى باسقارۋدى كەڭەيتۋ جونىندە بىرقاتار ناقتى مىندەت جۇكتەپ, مەملەكەتتىك وكىلەتتىكتەردىڭ ءبىر بولىگىن جەرگىلىكتى ءوزىن ءوزى باسقارۋ ورگاندارىنا بەرۋدى تاپسىرعان بولاتىن.
– «جەرگىلىكتى ءوزىن ءوزى باسقارۋدى دامىتۋ ازاماتتىق باستامالارعا جول اشادى, جەرگىلىكتى حالىقتىڭ الەۋمەتتىك بەلسەندىلىگىن, ولاردىڭ وزدەرى تۇرىپ جاتقان جەردىڭ جاعدايىنا ۇجىمدىق جاۋاپكەرشىلىگىن ارتتىرۋعا جاردەمدەسەدى», – دەدى ق.ءمامي.
كوشپەلى وتىرىس وn-line ءتۇرىندە ءوتىپ, 1500 ادامدى قامتىدى جانە تالقىلاۋعا بارلىق دەڭگەيدەگى ءماسليحاتتار دەپۋتاتتارى, جەرگىلىكتى اتقارۋشى ورگاندار مەن قوعامدىق بىرلەستىكتەردىڭ وكىلدەرى قاتىستى. اكتيۆ وتىرىسى كەزىندە سەنات توراعاسى وتىرىسقا قاتىسۋشىلار قويعان ساۋالدارعا جاۋاپ بەردى.