قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ پەن گەرمانيانىڭ فەدەرالدى پرەزيدەنتى حورست ك¿لەردىڭ 2008 جىلعى قىركۇيەكتە استاناداعى كەزدەسۋىندە مەملەكەتتەر باسشىلارى 2009 جىلدى قازاقستاننىڭ گەرمانياداعى جىلى, ال 2010 جىلدى گەرمانيانىڭ قازاقستانداعى جىلى دەپ جاريالاۋ تۋرالى شەشىم قابىلداعان ەدى. پرەزيدەنتتەردىڭ بۇل شەشىمى ەكى ەل اراسىنداعى ىنتاماقتاستىقتى, سونداي-اق قازاق جانە نەمىس حالىقتارىنىڭ بۇرىننان جالعاسىپ كەلە جاتقان تىعىز بايلانىستارىن ودان ءارى نىعايتۋعا نەگىز قالادى. وسىعان وراي, كەشە ەلوردادا گەرمانيانىڭ قازاقستانداعى توتەنشە جانە وكىلەتتى ەلشىسى راينەر شلاگەتەر جۋرناليستەرمەن ءباسپاسوز ءماسليحاتىن وتكىزىپ, گەرمانيانىڭ قازاقستانداعى جىلىندا جۇزەگە اسىرىلاتىن ءىس-شارالارمەن تانىستىردى.
ەلشىنىڭ حاباردار ەتۋىنشە, 2010 جىلعى 3 اقپاندا بەيبىتشىلىك جانە كەلىسىم سارايىندا گەرمانيانىڭ قازاقستانداعى جىلى رەسمي تۇردە اشىلادى. جىل اياسىنداعى وتەتىن ءتۇرلى شارالاردى گەرمانيانىڭ سىرتقى ىستەر مينيسترلىگى مەن الماتىداعى گەتە ينستيتۋتى ۇيىمداستىراتىن بولادى. باعدارلاما بويىنشا جىل ءىشىندە 67 ءىس-شارا وتكىزۋ جوسپارلانىپ وتىر. وسى شارالار بارىسىندا قازاقستاندىقتار گەرمانيانىڭ قوعامى مەن مادەنيەتى, ساياساتى مەن ەكونوميكاسى تۋرالى كەڭ اۋقىمدى ماعلۇمات الىپ, ولارمەن جان-جاقتى تانىساتىن بولادى.
گەرمانيانىڭ قازاقستانداعى جىلىنىڭ اشىلۋ سالتاناتىندا كوپشىلىككە برەمەن قالاسىنداعى نەمىس كامەرالىق فيلارمونياسىنىڭ كونتسەرتى جانە “قازىرگى گەرمانيا” اتتى جىلجىمالى كورمە ۇسىنىلماق. بۇل كورمەدەن قازاقستاندىقتار گەرمانيانىڭ ارحيتەكتۋرالىق عيماراتتارىمەن, لاندشافتارىمەن, سونداي-اق كورىكتى ورىندارىمەن فوتوسۋرەتتەر ارقىلى تانىسا الادى. ال مادەني شارالار ارقىلى قازاقستان جۇرتشىلىعى قازىرگى نەمىس ونەرى مەن نەمىس قوعامىنىڭ جانە نەمىس حالقىنىڭ تاريحي مادەنيەتىمەن بەتتەسەدى. ولاردان بولەك, جىل اياسىندا گەرمانيا گەتە, شيللەر, بەتحوۆەن جانە باحتىڭ وتانى رەتىندە ولاردىڭ ونەرىن جانە كينەماتوگرافيا سالاسىنداعى جەتىستىكتەرىن دە تاماشالايتىن بولادى.
ال الماتىداعى گەتە ينستيتۋتىنىڭ ديرەكتورى باربارا فرەنكەل-تونەت حانىمنىڭ ايتۋىنشا, جىل ىشىندە اتالعان مادەني شارالارمەن قاتار, ەكونوميكالىق جانە ەكولوگيالىق تاقىرىپتاردى قامتيتىن جيىندار دا ۇيىمداستىرىلادى. وتكىزىلەتىن ءىس-شارالار استانا مەن الماتى قالالارىندا عانا ەمەس, قاراعاندى, وسكەمەن جانە پاۆلودار قالالارىن دا قامتىماق. گەرمانيانىڭ قازاقستانداعى جىلى اياسىندا وتكىزىلەتىن ءىس-شارالار قازاقستان مەن گەرمانيانى, ونىڭ ىشىندە قازاق پەن نەمىس حالىقتارىن ودان ءارى جاقىنداستىرۋعا قىزمەت ەتەتىن بولادى.
ءباسپاسوز ءماسليحاتىندا, سونداي-اق ەكونوميكا جانە بيۋدجەتتىك جوسپارلاۋ مينيسترلىگىنىڭ دەپارتامەنت ديرەكتورى الىبەك باقاەۆ پەن مادەنيەت جانە اقپارات مينيسترلىگى مادەنيەت كوميتەتى توراعاسىنىڭ ورىنباسارى ءىلياس قوزىباەۆ تا ءسوز الىپ, جىل اياسىندا وتكىزىلەتىن شارالاردىڭ ويداعىداي وتۋىنە ءوز ۆەدومستۆولارى تاراپىنان بارىنشا قولداۋ كورسەتىلەتىندىگىن ايتتى.