تاۋەلسىزدىكتىڭ 25 جىلدىعىنا وراي الماتى وبلىسىندا جاڭا شاعىن گەس اشىلدى. سارقان اۋدانىنىڭ لەپسى وزەنىندە قۋاتتىلىعى 17 مۆت بولاتىن شاعىن گەس-2 ىسكە قوسىلدى. جاڭا نىساننىڭ سالتاناتتى اشىلۋىنا وبلىس اكىمى اماندىق باتالوۆ قاتىستى, دەپ حابارلادى الماتى وبلىسى اكىمىنىڭ ءباسپاسوز قىزمەتى.
نىساننىڭ اشىلۋىندا ا. باتالوۆ قازاقستانداعى تاۋ سۋلارىنىڭ گيدروەنەرگەتيكالىق قورىنىڭ 65% الماتى وبلىسىندا ەكەنىن تىلگە تيەك ەتىپ, وبلىستا سۋ جانە جەل ەنەرگەتيكاسىن دامىتۋدىڭ ارنايى باعدارلاماسى ازىرلەنگەنىن, سونىڭ اياسىندا جاڭا گەس اشىلىپ وتىرعانىن اتاپ ءوتتى.
«وسى گەس-ءتى ىسكە قوسۋدىڭ ناتيجەسىندە وڭىردەگى ەلەكتر ەنەرەگياسىنىڭ تاپشىلىعى ساعاتىنا 68 ملن كۆت-قا ازايدى. بۇل وتە ماڭىزدى جەتىستىك, دەگەنمەن مەجە ەمەس. قازىرگى كەزدە قورا وزەنىندە قۋاتتىلىعى 26-29 مۆت-قا دەيىنگى تاعى 3 گەس-ءتىڭ قۇرىلىسى ءجۇرىپ جاتىر. وعان قوسا تاعى بىرنەشە نىساننىڭ قۇرىلىسى جوسپارلانعان. مۇنىڭ بارلىعى ءوزىمىز وندىرەتىن ەلەكتر ەنەرگياسىنىڭ تاپشىلىعىن ازايتىپ, وبلىستىڭ ەلەكتر قۋاتى ءۇشىن سىرتقا تاۋەلدى بولماۋىنا جانە جاڭارتىلعان ەنەرگيا كوزدەرىن دامىتۋعا ىقپال ەتپەك. سونىمەن قاتار, كومپانيالار جوسپارلاپ سالعان گەس-تار ەكسپو كورمەسىندەگى «قازاقستان» پاۆيلونىنان كورنەكتى ورىن الاتىن بولادى», – دەدى وبلىس اكىمى.
ايتا كەتەيىك, سارقان اۋدانى لەپسى وزەنىندەگى شاعىن گەس-2 جىلىنا ورتا ەسەپپەن 67,78 ملن كۆت/ساع. ەلەكتر ەنەرگياسىن وندىرەدى. قۇرىلىستىڭ سمەتالىق قۇنى – 4,2 ملرد. تەڭگە. قۇرىلىس جۇمىستارى 2014 جىلدىڭ تامىز ايىندا باستالعان. جاڭا نىسان ىسكە قوسىلعاننان كەيىن 17 ادام تۇراقتى جۇمىسپەن قامتىلدى.