موزامبيكتىڭ مينەرالدى رەسۋرستار جونىندەگى ءمينيسترى ەسپەرانسە لاۋريندا فرانتسيسكو بياس باستاعان رەسمي ادامدار مەن كاسىپكەرلەر ENRC كومپانياسىنىڭ شاقىرۋىمەن ءوندىرىستى ءوڭىرگە كەلىپ قايتتى. وبلىس اكىمى باقىتجان ساعىنتاەۆ افريكالىق ەلدەن كەلگەن قوناقتارمەن كەزدەسىپ, وبلىستىڭ الەۋمەتتىك-ەكونوميكالىق دامۋى جانە ءوڭىردىڭ ينۆەستيتسيالىق مۇمكىندىكتەرى تۋرالى اڭگىمەلەپ بەردى.
– وبلىس وركەندى دامىپ كەلەدى, ونەركاسىپ جانە اۋىل شارۋاشىلىعى وندىرىسىندە 166 جوبا جۇزەگە اسىرىلۋدا. بۇعان ەلىمىزدە جاسالعان ينۆەستيتسيالىق ۇدەرىس, سوعان ساي قابىلدانعان الەۋەتتى مەملەكەتتىك باعدارلامالار جول باستاۋدا, – دەدى وبلىس اكىمى ءوز سوزىندە.
ءوڭىردىڭ الەۋمەتتىك دامۋىنا ينۆەستورلار بەلسەنە قاتىسىپ, ولاردىڭ كوشباسشىسى – ENRC كومپانياسى تۇرعىن ۇيلەر مەن بالاباقشالار سالۋدا, اۋرۋحانالاردى مەديتسينالىق جابدىقتارمەن قامتاماسىز ەتۋدە. سونىمەن قاتار, مەكتەپتەرگە, مادەنيەت پەن سپورتتى دامىتۋعا ۇلەس قوسىپ كەلەدى. الىس قاشىقتىقتاعى ەكى ەل اراسىنداعى بايلانىس ۇستەل باسىنداعى اڭگىمەلەسۋدەن, تانىستىقتان ءورىس الاتىنى ءسوزسىز.
– موزامبيكتىڭ دە تابيعي بايلىقتارى جەتەدى. ولاي بولسا, ءوندىرىستى ءوڭىر مەن ءبىزدىڭ ورتاق ماسەلەلەرىمىز كوپ. ەندى ENRC كومپانياسى ارقىلى ەكى جاقتى قارىم-قاتىناسىمىز نىعايا ءتۇسەدى دەپ ويلايمىن, – دەدى ەسپەرانسە لاۋريندا فرانتسيسكو بياس.
افريكادان كەلگەن قوناقتار وبلىس ورتالىعىنداعى «قازاقستان ەلەكتروليز زاۋىتى» اق-تا جانە اقسۋ جەس-تە, ەكىباستۇزدىڭ «ۆوستوچنىي» رازرەزىندە جانە اقسۋ فەرروقورىتپا زاۋىتىندا بولىپ, ءوندىرىس ورىندارىنىڭ جۇمىسىمەن تانىستى.
فاريدا بىقاي.
پاۆلودار وبلىسى.