ەلىمنىڭ كەلەشەگىن ەلەستەتتىم

تاۋەلسىزدىكتىڭ تۋىن تىككەنىمىزگە دە شيرەك عاسىردىڭ شاماسى بولىپتى. قازاعىمنىڭ ىقىلىم زاماننان ارمان ەتكەن ازاتتىعىن العان كەزدەن باستاپ بۇگىنگى كۇنگە دەيىنگى جەتكەن دەڭگەيىمىز بەن دارەجەمىزدى سارالار بولساق, ەڭ الدىمەن ەسىلدىڭ بويىنان ەڭسەلى استانا سالعانىمىزدى اۋىزعا الۋعا بولادى. البەتتە, بۇگىنگى كۇن تۇرعىسىنان الىپ قا­را­عاندا, بۇل ءوزى زاماننىڭ ىڭعايى ءھام ۋا­قىتتىڭ تالابى بويىنشا دۇنيەگە كەلە سالعان كە­رە­مەتتىڭ ءبىرى سياقتى بولىپ كورىنۋى مۇمكىن. ال شىن مانىسىندە, مۇنىڭ استارىنا ۇڭىلەر بولساق, تا­ريحتا اسا سيرەك كەزدەسەتىن اقىل-وي, ارمان-ماق­ساتتاردىڭ تاۋ قوپارىپ, قامال العاننان دا زور كۇش-قۋاتىنان تۋىنداعان تەڭدەسسىز جوبا ەكە­نىن تۇيسىنەسىز. مىنە, وسىنداي ۇلى ىستەردىڭ باس­تاۋىندا ۇيىتقى بولىپ نۇرسۇلتان ءابىش ۇلى نازارباەۆتاي نار تۇلعانىڭ تۇرۋى تاريحتىڭ ءبىز­گە تارتقان عالامات سىيى ەكەنىن قالايشا ايتپاسقا؟! ەلباسىنىڭ «ەگەمەن قازاقستان» گازەتىندە جاريالانعان « ۇلى دالا ۇلاعاتتارى» ەڭبەگىنىڭ «ەڭسەسى بيىك ەلوردا» اتتى ءبولىمىن وقىپ شىق­قا­نىم­دا, وسىدان بىرنەشە جىل بۇرىنعى بۇيىعىپ جات­قان شاعىن عانا قالا اقمولاعا اعىلعان كوشتى ەسكە الدىم. جاسىراتىنى جوق, سول كەزدە تۇڭعىش پرەزيدەنتتىڭ سۇڭعىلا ساياساتىنا تەرەڭ بويلاعانىمىز, نارتاۋەكەلگە بەل بۋعان كوزسىز باتىرلىعىنا كۇمانسىز قاراعانىمىز كەمدە-كەم ەدى. سويتسەك, ەلدىڭ ەرتەڭىن ويلاعان كەمەڭگەر ءبىز تومەندە كۇڭكىلدەپ جۇرگەندەي بولعان شاقتا قول جەتپەس بيىكتەردەن بولاشاققا كوز تىگىپ, ءبارىن دە بولجاپ-ءبىلىپ وتىرعان ەكەن عوي. «بۇگىنگى جاھاندانۋ شاعىندا جاڭا قالا سالۋ­دىڭ ماسەلەسى اسا قيىندىق تۋعىزبايدى. نە كەرەكتىڭ ءبارى دە بار. راسىندا سولاي ما؟ اسى­عىس ويلاساڭ, وڭاي سەكىلدى كورىنىپ كەتەتىن ءىس­تىڭ ارتىندا ۇلكەن پروبلەمالار تۋىنداپ شى­عا كەلەدى. قالا سالۋ تۇگىلى, ءۇي سالۋدىڭ دا ما­شاقاتىن بالا كەزدەن كورىپ وسكەن ۇرپاقتىڭ وكى­لىمىز», دەپ جازادى ەلباسى كىتابىندا. راس-اۋ, ءبىر ءۇيدى سالۋدىڭ ءوزى ءبۇتىن ءبىر اۋلەتتى اۋرە-سارساڭعا سالىپ قوياتىنىن بىلەمىز, تالاي ءمار­تە كۋاسى دە بولدىق. ال اياعىنان ەندى قاز تۇرا باستاعان ەلدىڭ زاماننىڭ قيىن-قىستاۋ ۋا­قىتىندا باس قالاسىن تۇرعىزۋى – تاريحتان ىزدە­سەڭ تاپپايتىن مىسالدىڭ ءبىرى. كىتاپتى وقي وتىرىپ شىعارمانىڭ ءون­بويى­نان استانانىڭ ايشىعىن, ەلىمنىڭ ايبىنىن تانىتاتىنداي رۋحتى ەكپىن مەن قۋاتتى وي تاس­قىنىن سەزىنەسىڭ. قازاقستان دەگەن ەلدىڭ ەڭسە تىك­تەپ, ەندىگىدە كەلەشەككە قىرانشا كوز تىككەن بول­مىس-ءبىتىمىن تانيسىڭ! «قىلىش پەن نايزانىڭ زامانى ءوتتى. زىركىل­دە­گەن زەڭبىرەكتەرىڭىزدىڭ ءوزى قازىر قارۋ-جاراق مۇ­راجايىندا تۇر. قازىرگى رۋحتى ءسوز – ۇلتتىڭ تا­­نىمىن دا, تاريحىن دا تولعايتىن ءسوز «ءماڭ­گى­لىك ەل» بولۋى كەرەك. بۇل ءسوز حالىقتىڭ ءوز كوكى­رەگىنەن شىعىپ, ءار ادامنىڭ جۇرەكجاردى ءسو­زى­نە اينالۋى قاجەت, سوندا عانا ۇلى ماقسات ءوزى­نىڭ مەجەلى بيىگىنە شىعادى», دەپ جازعان ۇلت كوشباسشىسىنىڭ سوزىنە الىپ-قوسارىمىز جوق. بورانباي جۇمكە ۇلى, ەڭبەك ارداگەرى, «قۇرمەت» وردەنىنىڭ يەگەرى, شەت اۋدانىنىڭ قۇرمەتتى ازاماتى   قاراعاندى وبلىسى