شىنىن ايتاتىن بولساق, قازاقستان حالقى اسسامبلەياسىنىڭ XV سەسسياسىن اسىعىپ تا, تولعانىپ تا كۇتكەنىمىز راس. ەگەمەندى ەلىمىزدىڭ دۇنيە جۇزىندەگى الپاۋىت مەملەكەتتەرمەن تەرەزەسىن تەڭ ۇستاپ كەلە جاتقانى, حالىقارالىق قوعامداستىقتىڭ مويىنداپ, ەقىۇ-عا توراعالىققا سايلانۋى ءار قازاقستاندىقتىڭ جۇرەگىندە ۇلكەن قۋانىش سەزىمىن ۇيالاتقانى تۇسىنىكتى.
قازاقستاندا تۇرىپ جاتقان 130 ەتنوس وكىلىنە ۇلتىنا قاراماي, دىنىنە قاراماي بىردەي جاعداي جاسالىپ وتىرعانى ەلباسىمىز ن.ءا.نازارباەۆتىڭ سىندارلى ساياساتىنىڭ ارقاسىندا ەكەنى بارشامىزعا بەلگىلى ءجايت. سەسسيادا ۇسىنىلعان قازاقستاننىڭ ەل بىرلىگى دوكتريناسى كەلەشەگىمىزدىڭ ستراتەگيالىق باعدارلاماسى جانە تەڭدەسى جوق قۇجات بولاتىنى ەشكىمنىڭ كوڭىلىنە كۇمان كەلتىرمەس دەپ ويلايمىن. سەسسيا جۇمىسىنا وبلىسىمىزدان اسسامبلەيا مۇشەلەرىمەن قاتار, ەتنومادەني بىرلەستىكتەردىڭ وكىلدەرى قاتىناسىپ قايتتى. قازاقستان حالقى اسسامبلەياسىنىڭ ءبىرىنشى سەسسياسىنان قاتىسىپ كەلە جاتقان, ءتۇرى باسقا بولسا دا, تىلەگى ءبىر ەرتىس ءوڭىرىنىڭ وركەندەۋىنە ءوز ۇلەستەرىن قوسىپ جۇرگەن پاۆلودار قالاسىنىڭ قۇرمەتتى ازاماتى, ءازىربايجان ۇلتىنىڭ وكىلى د.ماحمۋدوۆ, ۋكراين ۇلتىنىڭ پەرزەنتى م.پاريپسا, ەۆرەي ۇلتىنىڭ وكىلى ف.سۆەچينسكايا جانە باسقا دا ارىپتەستەرىم سەسسياعا دايىندىقتىڭ جاقسى جۇرگىزىلگەنىن, ونىڭ بارىسىندا بوس سوزدەن گورى ناقتى ۇسىنىس كوپ ايتىلعانىن اتاپ كورسەتتى. ال دوكترينانى ەلىمىزدەگى ەتنوسارالىق بىرلىكتى قامتاماسىز ەتۋدە مەملەكەتتىك ساياساتتىق ۇزاق مەرزىمدى ستراتەگيالىق باسىمدىعى دەڭگەيىنە كوتەرۋ بۇگىنگى كۇننىڭ باستى مىندەتتەرىنىڭ ءبىرى بولىپ تابىلادى. قازىر پاۆلودار وبلىسىندا جۇزدەن استام ەتنوس وكىلدەرى تاتۋ-ءتاتتى ءومىر ءسۇرىپ جاتىر. اسسامبلەيا قۇرىلار 1995 جىلى ءۇش ەتنوس وكىلى عانا وزدەرىنىڭ مادەني ورتالىقتارىن قۇرعان بولسا, بۇگىندە وبلىسىمىزدا 19 ەتنومادەني بىرلەستىك ەتنوسارالىق جانە كونفەسسياارالىق تۇسىنىستىكتى قامتاماسىز ەتۋگە ءوز ۇلەستەرىن قوسىپ كەلەدى. وبلىس اسسامبلەياسىنىڭ التى فيليالى قالىپتاسقان, ولاردىڭ ىشىندە ەلىمىزدىڭ ەنەرگەتيكا سالاسىنىڭ الىبى بولىپ تابىلاتىن ەكىباستۇز قالاسىندا جانە ءوڭىرىمىزدىڭ ءىرى اۋىل شارۋاشىلىعى دامىعان, كوپ ەتنوس وكىلدەرى تۇراتىن شارباقتى, اقتوعاي جانە قاشىر اۋداندارىندا قىزمەت ىستەۋدە. سونىمەن قاتار, ءار ەتنوس وكىلدەرى ورنالاسقان اۋدان ورتالىقتارى مەن اۋىل-سەلولاردا وڭىرىمىزدەگى ەتنومادەني بىرلەستىكتەردىڭ 47 فيليالى بار. ماسەلەن, اقسۋ قالاسىندا, لەبياجى اۋدانىنداعى بەسقاراعاي اۋىلىندا وتكەن اسسامبلەيا كۇندەرى قاتارداعى ەتنوس وكىلدەرىنىڭ ەڭسەسىن ءبىر كوتەرىپ تاستاعانىن ايتۋ قاجەت. وسى كەزدەسۋلەردە ءار ەتنوستىڭ مادەنيەتىن, سالت-ءداستۇرىن, قول-ونەرىن جان-جاقتى ناسيحاتتاۋعا بار مۇمكىندىك پايدالانىلدى. بيىلعى جىلدىڭ وزىندە “دوستىق ۇيىندە” نەمىس جاستارىنىڭ فەستيۆالى, “ەلپيدا دوستارىن شاقىرادى” اتتى گرەك ۇلتتىق بىرلەستىگىنىڭ ون جىلدىعىنا وراي وتكەن رەسپۋبليكالىق فەستيۆالى جانە پولشا مادەنيەتىنىڭ كۇندەرى پاۆلودارلىقتاردىڭ ەستەرىندە كوپكە دەيىن قالارى ءسوزسىز. دوكترينادا ايقىن كورسەتىلگەندەي, ءتىل ساياساتى, ءبىلىم بەرۋ مەن تاربيە سالالارىندا ىسكە اسىرار شارا-ماقساتتار كوپ, ءبىز ونى وبلىس اسسامبلەياسى سەسسياسىندا جان-جاقتى تالقىلاپ, ناقتى-ناقتى شەشىمدەر قابىلدايتىن بولامىز. سەسسيادا قابىلدانعان ۇندەۋدى تالقىلاۋ شەڭبەرىندە مەن شارباقتى, ۋسپەن جانە اقتوعاي اۋداندارىندا كوپتەگەن ەتنوس وكىلدەرىمەن كەزدەسكەنىمدە كوزىمنىڭ جەتكەنى – ءار ەتنوس وكىلدەرى قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ سەسسيادا ايتىلعان قاعيدالارىن تولىقتاي قولدايتىنى. ال ءبىزدىڭ ەڭ ءبىر باعا جەتپەس بايلىعىمىز – بىرلىگىمىز دەپ بىلەمىز. يديات ابدىحالىقوۆ, پاۆلودار وبلىسى قازاقستان حالقى اسسامبلەياسى توراعاسىنىڭ ورىنباسارى. پاۆلودار.