استانادا بوكستان ءوتىپ جاتقان قازاقستان چەمپيوناتى ودان ءارى جالعاسۋدا. دۇيسەنبى كۇنى جەكپە-جەكتەر تۇسكە دەيىن 48, 60, ال تۇستەن كەيىن 54 جانە 69 كگ. سالماق دارەجەسى بويىنشا ءوتتى.
الدىمەن شارشى الاڭداعى كەزدەسۋلەر تۋرالى ايتپاس بۇرىن وسىنىڭ الدىندا رەسپۋبليكا بوكس فەدەراتسياسىنىڭ كەڭسەسىندە وتكەن مانداتتىق كوميسسيانىڭ وتىرىسى مەن فەدەراتسيا باسشىلىعىنىڭ باپكەرلەر قۇرامىمەن ءوتكىزگەن كەزدەسۋلەرى جونىندە بىرەر ءسوز ايتا كەتەلىك. العاشقىسىندا ەكى عانا ماسەلە, بيىلعى چەمپيوناتتىڭ باس تورەشىسى بولاتىن ماماندى انىقتاپ الۋ جانە تورەشىلەردىڭ قىزمەتىن ۇيلەستىرۋ ماسەلەسى قارالدى. مۇندا فەدەراتسيانىڭ ۆيتسە-پرەزيدەنتى جانبولات سارسەنوۆ شارشى الاڭنىڭ باس تورەشىسى بولاتىن ماماننىڭ ەسىمىن جاريا ەتتى. ول حالىقارالىق دارەجەدەگى تورەشى ۆالەري راچكوۆ ەكەن. فەدەراتسيا وكىلىنىڭ ۋاجىنە قاراعاندا, الەمدىك دودالاردا بىلىكتىلىگىمەن كوزگە ءتۇسكەن بۇل رەسەي مامانى چەمپيوناتتىڭ ماڭىزدى دەگەن جەكپە-جەكتەرىنە عانا تورەلىك جاسايتىنىن, ونى فەدەراتسيا باسشىلىعىنىڭ ارنايى شاقىرتۋىنىڭ سەبەبى وتاندىق تورەشىلەردىڭ دەڭگەيىن تومەندەتۋ ەمەس, كەرىسىنشە ءباسەكەلەردىڭ ءادىل تۇردە وتۋىنە جاعداي جاساۋمەن عانا بايلانىستى بولىپ وتىرعانىنان حاباردار ەتتى. وسىدان كەيىن ول وتىرىستا تورەشىلەردىڭ جالپى قىزمەتى جونىندە مالىمەت بەرىپ, استانا شارشى الاڭىنا وزىمىزدەگى 14 وبلىستان 30 رەفەريدىڭ شاقىرىلعانىن اتاپ ءوتتى.
ال فەدەراتسيا باسشىلىعىنىڭ باپكەرلەر قۇرامىمەن وتكىزگەن كەزدەسۋىندە بوكسشىلاردىڭ دەنساۋلىعى, ولاردىڭ وسى چەمپيوناتقا جانە الداعى جارىستارعا دايىندىعى جونىندە ماسەلە قارالدى. ءيا, بىلعارى قولعاپ يەلەرىنىڭ رەسپۋبليكا چەمپيوناتى سياقتى جاۋاپتى سىندارعا دايىندىعى كوپ رەتتە جاتتىقتىرۋشىلارىنا بايلانىستى. ەگەر باپكەرلەر شاكىرتىنەن تەك كورسەتكىشتى تالاپ ەتىپ, جاعدايىنا نەمقۇرايدى قارايتىن بولسا, بۇدان بوكسشى دا, جارىسقا سول وڭىردەن كەلىپ وتىرعان كوماندا دا بەرەكە تاپپايدى. سوندىقتان “ادامنىڭ كۇنى اداممەن” دەگەندەي, قازىر باپكەرلەردىڭ “كۇنى” شاكىرتىنە, ال بوكسشىنىڭ “كۇنى” باپكەرلەرىنە, ودان ءارى شىنىن ايتساق, سپورتتىڭ باسى-قاسىندا جۇرگەن ازاماتتاردىڭ قامقورلىعىنا تىكەلەي بايلانىستى. فەدەراتسيا باسشىلىعىنىڭ جوعارىداعى باپكەرلەرمەن كەزدەسۋىندە مىنە, وسى ماسەلە قابىرعاسىنان قويىلىپ, وتە قاتتى ايتىلدى.
ەندى دۇيسەنبىدەگى باسەكەلەرگە كەلەيىك. وسى كۇنى تۇسكە دەيىن وتكەن كەزدەسۋدە ۇلتتىق قۇرامانىڭ باس باپكەرى مىرزاعالي ايتجانوۆتىڭ شاكىرتى ءبىرجان جاقىپ 48 كگ. سالماق ءدارەجەسىندە قولعاپ ءتۇيىستىردى. ءبىرجان جانكۇيەرلەرگە بەلگىلى, حالىقارالىق دارەجەدەگى سپورت شەبەرى. سوندىقتان وعان جەكپە-جەكتە وزىنەن الدەقايدا ءتاجىريبەسى از, سپورت شەبەرلىگىنەن ۇمىتكەر جاندوس دۇيسەنوۆتى جەڭۋ قيىنعا سوقپادى. بۇل كەزدەسۋدە ەسەپ 6:0 بولىپ ب.جاقىپتىڭ پايداسىنا شەشىلدى. وسى سالماقتا ەڭ قىزىقتى وتكەن ايقاستاردىڭ قاتارىنا اقتوبەلىك اقنيەت بەكجانوۆ پەن قوستانايلىق دانيار مۇعالوۆ اراسىندا بولعان جەكپە-جەكتى جاتقىزۋعا بولادى. مۇندا دانيار 11:10 ەسەبىمەن قارسىلاسىنان باسىم ءتۇستى. وسىدان كەيىن شارشى الاڭعا كوتەرىلگەن 60 كگ. سالماق دارەجەسىندەگى ساڭلاقتار اراسىندا جامبىلدىق عاني جايلاۋوۆ, قاراعاندىلىق ەلدوس سايدالين, قوستانايلىق سامات باشەنوۆ پەن ماڭعىستاۋلىق جانداربەك يسانوۆ, استانالىق المات اعىباەۆ سياقتى بوكسشىلار جاقسى ونەر كورسەتىپ, قارسىلاستارىن تىزە بۇكتىردى.
كەلەسى 54 كگ. سالماق بويىنشا وتكەن سىندا قىزىلوردا وبلىسىنىڭ وكىلى, سپورت شەبەرلىگىنەن ۇمىتكەر المات ىسقاقوۆتى ايتۋعا بولادى. ول قارسىلاسىن الدىمەن قورعانا ءجۇرىپ, سوسىن شابۋىلعا شىعىپ, سوڭىنا قاراي سوققىنىڭ استىنا الىپ, 13:9 ەسەبىمەن ادەمى جەڭدى. سول سياقتى جانكۇيەرلەر شىعىسقازاقستاندىق مەيىرجان راقىمجانوۆ, استانالىق قانات ءابۋتالىپوۆ, قىزىلجارلىق باۋىرجان قۇدايبەرگەنوۆتىڭ كورسەتكەن ونەرلەرىن قىزىعا تاماشالادى. ال 69 كگ. سالماقتاعى باسەكەدە بىزگە “داۋلەت” سپورت كەشەنىنە جيىلعان جۇرتشىلىق تەك الەمنىڭ ەكى دۇركىن چەمپيونى سەرىك ساپيەۆتىڭ عانا قيمىل-قوزعالىسىن كورۋگە كەلگەن سياقتى بولىپ كورىندى. بىلتىر بەيجىڭ وليمپياداسىنا قاتىسىپ, جولى بولماسا دا كوپشىلىكتىڭ ىستىق ىقىلاسىنا بولەنىپ جۇرگەن ۇلتىق قۇرامانىڭ كاپيتانى قارسىلاسىن 10:1 ەسەپ ايىرماسىمەن ۇتتى. دەگەنمەن, بۇل جولعى جەڭىس سەرىككە وڭاي كەلگەنى كورىنىپ تۇردى. ونىڭ قارسىلاسى سپورت شەبەرلىگىنەن ۇمىتكەر ەكەن, بوكسپەن اينالىسىپ جۇرگەنىنە دە كوپ بولماعان.
وسىدان كەيىن شارشى الاڭعا شىققان ەلوردالىق نۇرسۇلتان مۇستافين, باقىتجان قوجابەكوۆ, سىر ەلىنىڭ وكىلى رۋستام سۆاەۆ, شىعىسقازاقستاندىق مانات ومىرزاقوۆ پەن اقتوبەلىك سۇلەيمەن بەردىقاەۆ ايقاستار اياقتالعان سوڭ, جانكۇيەرلەردىڭ قوشەمەتىمەن رينگتەگى ورىندارىن 81 كگ. سالماق دارەجەسىندەگى بوكسشىلارعا بوساتىپ بەردى. وسى سالماقتاعى كەزدەسۋلەر دە الدىڭعى جەكپە-جەكتەر سياقتى قىزىقتى جانە تارتىستى ءوتتى. اسىرەسە, “دينامو” قوعامىنىڭ وكىلى ارمان رىسبەكتىڭ جويقىن سوققىلارى كورەرمەندەردىڭ ەرەكشە قىزىعۋشىلىعىن تۋدىردى.
كەشە شارشى الاڭعا سونداي-اق 51 جانە 57 كگ. سالماقتاعى ساڭلاقتار دا شىقتى. مۇندا جامبىلدىق جاس تالانت, حالىقارالىق دارەجەدەگى سپورت شەبەرى ولجاس ساتتىباەۆ پەن استانالىق تاعى ءبىر بوكسشى جاندوس احمەتوۆ قارسىلاستارىنان باسىم ءتۇسىپ, كەلەسى اينالىمعا جولداما الدى.
وسى كۇنى بەت قاتتالىپ جاتقاندا 75 جانە 91 كگ. سالماقتاعى بىلعارى قولعاپ يەلەرى باسەكەگە ءتۇستى. ولاردىڭ اراسىندا جاراقاتىنا بايلانىستى كوپتەن بەرى كورىنبەي جۇرگەن ماڭعىستاۋلىق اۋىر سالماقتاعى بوكسشى ەردوس جاڭابەرگەنوۆ تە بولدى.
ءسوز سوڭىندا ەلوردا تورىندە ءوتىپ جاتقان قازاقستان چەمپيوناتىنا بىلىكتى باپكەرلەر تۇرسىنعالي ەدىلوۆ پەن نۇرعالي ءسافيۋلليننىڭ, ماسكەۋ وليمپياداسىنىڭ كۇمىس جۇلدەگەرى سەرىك قوناقباەۆتىڭ, سيدنەي, افينا جانە بەيجىڭ وليمپيادالارىنىڭ چەمپيوندارى, ەسىمدەرى قازاق بوكسىنىڭ شەجىرەسىنە جازىلعان ەرماحان ىبىرايىموۆ, باقتيار ارتاەۆ پەن باقىت ءسارسەكباەۆتىڭ وسكەلەڭ ۇرپاقتىڭ ونەرلەرىن تاماشالاپ, ولاردىڭ جەكپە-جەكتەرىنە ءوز باعالارىن بەرىپ جاتقاندارىن ايتىپ وتكىمىز كەلەدى.
داستان كەنجالين.