الماتىدا «التىن قالام - 2016» تاۋەلسىز ادەبي جۇلدەسىنىڭ جەڭىمپازدارى ماراپاتتالدى, دەپ حابارلادى جۇلدەنىڭ ۇيىمداستىرۋ كوميتەتى.
«ىقىلاس اتىنداعى حالىق مۋزىكالىق اسپاپتار مۇراجايىندا جەڭىمپازداردىڭ ەسىمى جاريالاندى. جۇلدەنىڭ قىسقا تىزىمىنە قازاقستاننىڭ ءار وڭىرىنەن قاتىسىپ وتىرعان اۆتورلاردىڭ ورىس جانە قازاق تىلدەرىندە جازعان 30 شىعارماسى 6 اتالىم بويىنشا ەنگىزىلدى», - دەلىنگەن تاراتىلعان حابارلامادا.
جۇمىستار 2016 جىلدىڭ 1 شىلدەسىنەن باستاپ 15 قازانعا دەيىن قابىلداندى. كەيىن وقىرماندار 31 قازانعا دەيىن داۋىس بەردى. بارلىق شىعارما akalam.kz سايتىنا ورنالاستىرىلدى. بيىل ادەبي جۇلدەگە 446 اۆتور ءارتۇرلى جانردا جازىلعان 863 شىعارمانى ۇسىندى. ۇيىمداستىرۋ كوميتەتىنىڭ جانە قازىلار القاسىنىڭ قۇرامىنا قۋات دومباي, دوسىم ساتپاەۆ, كەنجە جۇمان ۇلى, ايدوس سارىم, ارمان شوراەۆ, راسۋل جۇمالى, ايگەرىم رايىمقۇلوۆا, تاتيانا فيليپچيك جانە باسقالار ەندى.
بۇدان بولەك, بيىل قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي قازاقتىڭ ۇزدىك رومانىنا العاش رەت ارنايى بايگە جاريالاندى. «جىلدىڭ ۇزدىك رومانى» اتالىمى بويىنشا «مەن جىندىمىن» شىعارماسىمەن جەڭىمپاز اتانعان ساۋكەتاەۆ تۇرىسبەك مەتسەنات كەڭەس راقىشەۆ تاعايىنداعان 1 000 000 تەڭگەگە يە بولدى.
سونىمەن قاتار, QAZKOM بانكىنىڭ قارجىلاي قولداۋىمەن بايقاۋدىڭ تاڭداۋلى شىعارمالارى 2017 جىلى جارىق كورەتىن «التىن قالام 2016» ادەبي جۇلدەسىنىڭ جيناعىنا ەنەدى.
سونداي-اق بيىل بايقاۋعا قازاقستاندىق اۆتورلاردان بولەك اقش, مالايزيا, گەرمانيا, چەحيا, ۋكراينا, رەسەي, وزبەكستان, قىرعىزستان جانە يزرايل ازاماتتارى دا قاتىستى.
«بيىل ءبىزدى QAZKOM بانكىنەن بولەك, «ZHERSU» ينۆەستيتسيالىق-وندىرىستىك كورپوراتسياسى باقىلاۋ كەڭەسىنىڭ توراعاسى, بەلگىلى مەتسەنات باۋىرجان وسپانوۆ, سونداي-اق, قازاقستان ءباسپاسوز كلۋبى مەن قازاق راديوسى قولداپ وتىر», - دەلىنگەن حابارلامادا.