سايىندى قازاق ساعىنىپتى (جازۋشىنىڭ 80 جىلدىعىنا كەش ءوتتى)

استاناداعى قازاق ۇلتتىق ونەر ۋنيۆەرسيتەتىندە قازاقتىڭ كلاسسيك جازۋشىسى سايىن مۇراتبەكوۆتىڭ تۋعانىنا 80 جىل تولۋىنا وراي ەسكە الۋ كەشى ءوتتى. اقپاراتتار تاسقىنى تولاسسىز, اسىعىپ-اپتىققان وسى ءبىر الاساپىران ۋاقىتتا مۇنداي رۋحاني كەشتىڭ كورەرمەنى بولۋدىڭ ءوزى تۇسىنگەن ادامعا كەرەمەت ءبىر كەڭ تىنىس سىيلاپ, وي دۇنيەڭدى ازىراق ايال تاپقىزعانداي, راحات تا ساعىنىشتى كۇيگە بولەگەندەي اسەرمەن تەربەيدى... قانشا دەگەنمەن ونەر ورداسى عوي, كەشتىڭ ورنەگى وزگەشە بولدى. اكتورلىق ماماندىقتا وقيتىن ستۋدەنتتەر جازۋىشىڭ اڭىزعا اينالعان «جۋسان ءيىسى», «جابايى الما» شىعارمالارى جەلىسىمەن بەينە كورىنىس كورسەتتى. ءار جانردىڭ وزىندىك ەرەكشەلىگى دە وسى شىعار, كەشەگى الاپات سوعىس ۋاقىتىنداعى قازاق اۋىلى, قانشاما ارماندارى كوكىرەگىندە تۇنشىققان قازاق بالالارىنىڭ ىشكى جان دۇنيەسى, ءتىپتى قارا قانشىقتىڭ («جابايى الما» شىعارماسىنداعى) تاعدىرىمەن استاستىرىلا باياندالعان اياۋلى جان مەن اياۋسىز تىرشىلىك ايقاسىن 10-15 مينۋتتىق ساحنالىق كورىنىستە كوز الدىڭىزعا الىپ كەلگەندە جانارلاردان ەرىكسىز جاس دومالايدى ەكەن. «بۇل سايىن شىعارمالارىنىڭ شىنايىلىعى, شىنايى بولعاندا قازاقتىڭ بوياماسىز شىنايى جان دۇنيەسى. سوندىقتان دا سايىندى وقىپ وتىرىپ شىن كۇلەسىڭ, سايىندى وقىپ وتىرىپ شىن جىلايسىڭ» دەپتى الدىن الا دايىندالعان بەينە كورىنىستە وسى وقۋ ورنىنىڭ پروفەسسەرى, كەشتى وتكىزۋگە مۇرىندىق بولعان جازۋشى-دراماتۋرگ روزا مۇقانوۆا. ايتۋلى كەشتىڭ تورىندە سايىننىڭ جان دوسى, جازۋشى-دراماتۋرگ اكىم تارازي, اكادەميك سەيىت قاسقاباسوۆ, مىرزاتاي جولداسبەكوۆ باستاعان اقساقالدار وتىرعانى ءوز الدىنا ءبىر مەرەي. مەملكەتتىك سىيلىقتىڭ يەگەرى, اقىن نەسىپبەك ايت ۇلى كەش شىمىلدىعىن ايگىلى «بەس تاپالعا» (اكىم تارازي, سايىن مۇراتبەكوۆ, قاليحان ىسقاق, رامازان توقتاروۆ, قابدەش ءجۇمادىلوۆ) ارناعان ولەڭىمەن اشىپ, ارى قاراي سايىن جايىندا ساعىنىش پەن سىرعا تولى اڭگىمەلەر ايتىلدى. «سايىن وتكىر تاقىرىپ, وتپەلى تاقىرىپ دەپ ءار نەگە ۇرىنباي, تەك ادام بويىنداعى قوعام قالاي وزگەرەسە دە وزگەرىسسىز قالا بەرەتىن سەزىمدەر مەن قۇندى قۇندىلىقتاردى جازدى» دەدى ساۋىتبەك ءابدراحمانوۆ. «شىعارماشىل ادامدارى قىزىق, ءبىر توبىنىڭ شىعارماسى السىزدەۋ بىراق ادامشىلىعى, مادەنيەتى كەرەمەت بولادى. ال, ەكىنشى توبىنىڭ شىعارماسى عاجاپ بولعانىمەن وزىندە قۇداي سۇيەر قىلىعى جوق, يتمىنەز بولادى. ال, سايىن ءۇشىنشى توپ. شىعارماسى دا, ءوزى دە عاجاپ» دەيدى بايانعالي اقىن. سونداي-اق, ءسوز سويلەۋشىلەر روزا مۇقانوۆانىڭ سايىن تۋرالى «ەگەمەن قازاقستان» گازەتىندە جارىق كورگەن «كلاسسيك» اتتى ماقالاسىن ەرەكشە ىقىلاسپەن اتاپ, العىستارىن ايتتى. اسەرلى كەشتىڭ سوڭىندا سايىننىڭ تۋعان جەرى تالدىقورعاننان كەلگەن تۋعان-تۋىستارى جۇرت الدىنا شىعىپ, كەشتى ۇيىماستىرۋشىلارعا العىستارىن ايتتى. «ءبىر ۋنيۆەرسيتەتتىڭ, ءبىر كافەدراسى («ونەرتانۋ» كافەدراسى) ۇيىمداستىرىپ وتىرعان كەشتى وسىنداي اسەرلى, وسىنداي بيىك دەڭگەيدە بولادى دەپ ويلاماپ ەدىك...» دەدى جازۋشىنىڭ ءىنىسى عالىم مۇراتبەكوۆ. ال, سايىننىڭ قارىنداسى مايرا مۇراتبەكوۆا اعاسىنىڭ جان دوسى اكىم تارازيدى ساحناعا شاقىرىپ شاپان جاپتى. «اعامنىڭ كوزىندەيسىز اعا, ءسىزدى كورەم دە اعامدى كورەم...» دەگەن ءسوزىنىڭ نۇكتەسىن كىرپىك ۇشىنداعى مونشاقپەن قويدى. اكىم اعا ءۇنسىز... ۇلاربەك نۇرعالىم ۇلى, «ەگەمەن قازاقستان»