سارسەنبىنىڭ ءساتى, 13 قاڭتاردا ۆەنا قالاسىنداعى تاريحي ورىنداردىڭ ءبىرى – حوفبۋرگ سارايىنىڭ كونتسەرت زالىندا قازاقستان رەسپۋبليكاسىنىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋ جاۋاپتى قىزمەتىنە كىرىسۋ سالتاناتىنا ارنالعان قازاقستان ونەر شەبەرلەرىنىڭ گالا-كونتسەرتى بولدى. كونتسەرتتى اۆستريادا تىركەلگەن شەتەلدىك ەلشىلىكتەردىڭ باسشىلارى مەن قىزمەتكەرلەرى, اۆستريانىڭ كورنەكتى تۇلعالارى, ەۋروپانىڭ بىرقاتار ەلدەرىندە تۇرىپ جاتقان قازاق قانداستارىمىز, سونداي-اق ۆەنا قالاسىنىڭ تالعامپاز تۇرعىندارى تاماشالادى. مەرەكەلىك ايتۋلى شارانى قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ پەن اۆستريانىڭ ەۋروپالىق جانە حالىقارالىق ىستەر جونىندەگى ءمينيسترى ميحاەل شپيندەلەگگەر ءسوز سويلەپ اشتى. گالا-كونتسەرت الدىندا قازاقستان ونەر شەبەرلەرى گالا-كونتسەرتىنىڭ باستالۋى كەشكى ساعات 19.00-گە بەلگىلەنگەن ەدى. كونتسەرت باستالۋعا تۋرا ءبىر ساعات قالعاندا وسى حوفبۋرگ سارايىنىڭ انتەكاممەر زالىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ اۆستريالىق نۇسقادا جارىق كورگەن “قازاقستاندىق جول” كىتابىنىڭ تۇساۋكەسەر ءراسىمى بولدى. راسىمدە قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ ءسوز سويلەپ, جينالعان جۇرتشىلىقتى كىتاپتىڭ مازمۇنىمەن, قازاقستان پرەزيدەنتىنىڭ باسشىلىعىمەن ەلىمىزدە جۇزەگە اسىرىلىپ جاتقان اۋقىمدى جۇمىستارمەن تانىستىرىپ ءوتتى. راسىمدە, سونداي-اق بىرقاتار اۆستريالىق تۇلعالار دا ءسوز الىپ, قازاقستان پرەزيدەنتىنىڭ “قازاقستاندىق جول” كىتابىنا جوعارى باعا بەردى جانە قازاقستان رەسپۋبليكاسىنىڭ ەقىۇ-عا توراعالىق ەتۋ قىزمەتىنە كىرىسۋىمەن قۇتتىقتاپ, تابىستار تىلەدى. تۇساۋكەسەر ءراسىمى اياقتالعان سوڭ, وعان قاتىسۋشىلار كەڭ دە جارىق فەست كونتسەرت زالىنان ورىن الا باستادى. بۇل كەزدە زال ءىشى قالىڭ قاۋىمعا لىق تولىپ تۇرعان ەدى. ساعات ءتىلى ءدال 19.00-ءدى سوققاندا, كونتسەرتتى جۇرگىزۋشىلەر جينالعان قاۋىمعا قازاق جانە اعىلشىن تىلدەرىندە قازاقستان رەسپۋبليكاسىنىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋ قىزمەتىنە كىرىسۋ سالتاناتىنا ارنالعان قازاقستان ونەر شەبەرلەرىنىڭ كونتسەرتىنە حوش كەلگەندەرىن حابارلاپ, مەملەكەتتىك حاتشى – سىرتقى ىستەر ءمينيسترى قانات ساۋداباەۆقا ءسوز بەردى. بۇگىن قازاقستان ءۇشىن جۇلدىزدى ءسات تۋدى, دەدى قانات ساۋداباەۆ گالا-كونتسەرتتى اشارداعى سويلەگەن سوزىندە. تاۋەلسىزدىك العانىنا 18 جىل تولعان ەلىمىز بەدەلدى حالىقارالىق ۇيىم – ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋ قىزمەتىن باستاپ وتىر. تاريح ءۇشىن ون سەگىز جىل ونشا ۇزاق ۋاقىت ەمەس. وسى جىلدار ىشىندە قازاقستان ساياسي-قوعامدىق جانە الەۋمەتتىك-ەكونوميكالىق رەفورمالاردى تابىستى جۇزەگە اسىردى. ۇلتتىق كوشباسشى رەتىندە تانىلعان پرەزيدەنت نۇرسۇلتان نازارباەۆتىڭ جۇرگىزگەن ساياساتىنىڭ ناتيجەسىندە قازاقستان الەمدىك قوعامداستىقتىڭ سەنىمدى ارىپتەسى بولىپ تانىلدى. مەملەكەتتىك حاتشى – سىرتقى ىستەر ءمينيسترىنىڭ اتاپ وتكەنىندەي, ەلباسىنىڭ ساياساتى مەن الەمگە تانىمال بەدەلىنىڭ ارقاسىندا قازاقستاندى 2007 جىلى ەقىۇ-عا مۇشە ەلدەردىڭ بارلىعى ءبىراۋىزدان قولداپ, ۇيىمنىڭ 2010 جىلعى توراعالىعىن سەنىپ تاپسىردى. توراعالىق قازاقستانعا زور جاۋاپكەرشىلىك جۇكتەيدى. ەلىمىز توراعالىق ەتۋ بارىسىندا بۇعان دەيىنگى توراعالاردىڭ قولعا العان ءىس-شارالارىن جالعاستىرا وتىرىپ, ۇيىمنىڭ قىزمەتىن دامىتۋعا كۇش سالاتىن بولادى. اۆستريا ءبىزدىڭ ەلىمىزدى ۇيىمعا توراعالىق ەتۋى كەزىندە دە قولداۋ بىلدىرەدى. ءسوزىنىڭ سوڭىندا قانات بەكمىرزا ۇلى قازاقتىڭ “قوناققا سىيلىقپەن بار” دەگەن ماتەلىن كەلتىرە كەلىپ, قوناقتاردى قازاقستاندىق ونەر شەبەرلەرىنىڭ كونتسەرتىن تاماشالاۋعا شاقىردى. ال اۆستريانىڭ ەۋروپالىق جانە حالىقارالىق ىستەر جونىندەگى ءمينيسترى ميحاەل شپيندەلەگگەر قازاقستان مەن اۆستريا اراسىنداعى بايلانىستارعا توقتالىپ ءوتىپ, ەقىۇ توراعالىعى قىزمەتىنە كىرىسكەن قازاقستاننىڭ بۇل جاۋاپكەرشىلىگى زور مىندەتتى ويداعىداي اتقاراتىنىنا جانە ەكى ەلدىڭ ءوزارا بايلانىستارى الداعى ۋاقىتتا دا دامي بەرەتىندىگىنە سەنىمدى ەكەنىن ءبىلدىردى. “كوڭىلاشاردان” “سارىارقاعا” دەيىن قازاقتىڭ ونەر شەبەرلەرى گاسترولدىك ساپارلارمەن الىس-جاقىن شەت ەلدەرگە شىعىپ ءجۇر. اسىرەسە, سوڭعى جەتى-سەگىز جىل بەدەرىندە قازاقستاندىق ونەرپازداردىڭ شەت مەملەكەتتەر ساحنالارىندا ونەر كورسەتۋلەرى جيىلەي ءتۇستى. مىسالى, وتكەن جىلدىڭ جەلتوقسانىندا قازاقستاندىق ونەر شەبەرلەرى بەرلين قالاسىندا بولىپ, نەمىس جۇرتىن ءوز ونەرلەرىمەن ءتانتى ەتىپ قايتتى. ەندى, مىنە, كارى قۇرلىقتاعى ىرگەلى ەلدىڭ ءبىرى – اۆستريا استاناسىنا ارنايى كەلىپ وتىر. بۇل كەلىستىڭ ورنى دا, ءجونى دە بولەك. بولەك بولاتىن سەبەبى, جوعارىدا اتاپ وتكەنىمىزدەي, بۇل جولى ولار ەلىمىزدىڭ ەقىۇ توراعالىعى قىزمەتىنە كىرىسۋ سالتاناتىنا ارنالعان كونتسەرتتىك ساپارمەن كەلدى. سونىمەن... زال تولى جۇرتشىلىققا بايقاتپاعان كەيىپتە قاراپ قويامىز. تالاي دۇلدۇلدەر مەن بۇلبۇلداردىڭ ءانىن تىڭداپ, ونەرىنە كۋا بولعان ديپلوماتيالىق ميسسيالاردىڭ وكىلدەرى مەن تالعامپاز ۆەنا تۇرعىندارى ساحنا تورىنە جايعاسقان قازاقتىڭ ۇلتتىق كيىمدەرىن كيىپ, قولدارىنا مۋزىكالىق اسپاپ-قۇرالدار ۇستاعان ونەرپازدارعا قىزىعا قارايدى. قارايدى دا, ءبىر-بىرىمەن كۇبىرلەسە سويلەسەدى. ال ءبىز بولساق, قايتا قارايمىز. سول كورىنىس... گالا-كونتسەرت تۇركەشتىڭ “كوڭىلاشار” كۇيىمەن باستالدى. ونى قازاقستان رەسپۋبليكاسىنىڭ ەڭبەك سىڭىرگەن قايراتكەرى دۇيسەن ۇكىبايدىڭ ديريجەرلىك ەتۋىمەن قازاق مەملەكەتتىك قۇرمانعازى اتىنداعى اكادەميالىق حالىق اسپاپتارى وركەسترىنىڭ ۇجىمى ورىندادى. دومبىرا ۇنىنە نەشە ءتۇرلى اسپاپتىڭ ءۇنى قوسىلعاندا, كەرەمەتتەي اسەردە بولاسىڭ, كوڭىل-كۇيىڭ بىرتە-بىرتە كوتەرىلىپ, شابىتتانا, شاتتانا تۇسەسىڭ. كۇي شەتەلدىك قوناقتارعا دا كەرەمەتتەي اسەر ەتكەن بولۋى كەرەك, ديريجەردىڭ تاياقشاسى جوعارى كوتەرىلىپ بارىپ توقتاعاندا, زال تولى كوپشىلىك دۋىلداتا قول سوعىپ, وركەستر ۇجىمىنا زور قوشەمەت كورسەتىپ جاتتى. كەلەسى كەزەكتە احمەت جۇبانوۆ پەن لاتيف ءحاميديدىڭ “اباي” وپەراسىنداعى “تويباستارىن” تانىمال انشىلەر ازامات جىلتىركوزوۆ پەن ايگۇل نيازوۆا جانە قۇرمانعازى اتىنداعى اكادەميالىق وركەستر مەن كۇلاش بايسەيىتوۆا اتىنداعى ۇلتتىق وپەرا جانە بالەت تەاترىنىڭ حورى ورىندادى. ەكى ءانشى دە قازىرگى كەزدە ناعىز بابىنا كەلىپ, ءان ونەرىنىڭ شىڭىنا ورلەپ بارا جاتقاندارىن وسى جولى تاعى ءبىر كورسەتتى. وركەستر دە, حور مۇشەلەرى دە ازامات پەن ايگۇلدىڭ تەبىرەنە ايتقان انىنە قاجەت جەرىندە قوسىلا كەتىپ, “تويباستاردىڭ” كوپشىلىك كوڭىلىنەن شىعۋىنا بارىنشا دەمەۋ كورسەتىپ وتىردى. بۇل قويىلىمنىڭ ءساتتى شىققانى سونشالىق, ءان اياقتالا سالىسىمەن دۋىلداتا قول سوعىلىپ, ونەر شەبەرلەرىنە بارىنشا ريزاشىلىق تانىتىلدى. كەيبىر شەتەلدىك قوناقتاردىڭ ورىندارىنان تۇرىپ, ولارعا ەرەكشە قۇرمەت كورسەتىپ جاتقاندارىن دا كورىپ قالدىق. “اباي” وپەراسىنداعى “تويباستار” ارياسىنىڭ ەۋروپا تورىندە, ونىڭ ىشىندە ەقىۇ-نىڭ شتاب-پاتەرى ورنالاسقان ۆەنا قالاسىندا ورىندالۋى جايدان-جاي بولماسا كەرەك. ءبىزدىڭ پايىمداۋىمىزشا, “تويباستاردىڭ” بۇل جەردە ورىندالۋى قازاقستاننىڭ ەقىۇ-عا توراعالىق ەتۋ تويىنىڭ باستالعانىن ءبىلدىرىپ تۇرعانداي. بەلگىلى كۇيشىلەر عالىم احمەدياروۆ, ايتولقىن توقتاعان جانە نۇركەن ءاشىروۆ ناعىز ناشىنە كەلتىرىپ ورىنداعان “كۇي شاشۋ” دا قالىڭ قاۋىمعا ۇلكەن اسەر قالدىردى. اسىرەسە, كۇيشىلەردىڭ ءبىرىنىڭ تارتقانىن ەكىنشىسى جالعاستىرىپ اكەتۋى كوپشىلىكتى ەرەكشە قىزىقتىرا ءتۇستى. ال ايگۇل قوسانوۆانىڭ ورىنداۋىنداعى مۇحيتتىڭ “اينامكوز” ءانى دە اسەرلى ءارى تاماشا شىقتى. ونەر اتاۋلىنى باعالاي بىلەتىن, ونى قادىر تۇتاتىن تالعامپاز ەۋروپا جۇرتشىلىعىنا ورىندالۋ ماقامىمەن دارالانا تۇسكەن ءاننىڭ ءبىرى – ءبىرجان سالدىڭ “ايتبايى” دەسەك, قاتەلەسە قويماسپىز. ونى ورىنداعان قۇرمانعازى اتىنداعى قازاق ۇلتتىق كونسەرۆاتورياسى حالىق ءانى كافەدراسىنىڭ ستۋدەنتى احات كەنجەباەۆ كەلەشەگىنەن ۇلكەن ءۇمىت كۇتتىرەتىن جاستىڭ ءبىرى ەكەن. قازىردىڭ وزىندە ول رەسپۋبليكالىق جانە حالىقارالىق كونكۋرستاردىڭ لاۋرەاتى اتانىپ ۇلگەرىپتى. وسى جولى ونىڭ داۋىسىنىڭ كەڭدىگى مەن سازدىلىعىنا كونتسەرتتى تاماشالاۋشىلار ابدەن-اق ءتانتى بولدى. جاسىل جەلەك جامىلعان كوكشەتاۋ ءوڭىرى, قاز-ۇيرەگى ۇشقان سەكسەن كول, جۇپار ءيىسى اڭقىعان سايىن دالا كوز الدىڭا كەلىپ, كەۋدەڭدى ساعىنىش پەن ماقتانىش كەرنەيدى. جالپى, اسحات كەنجەباەۆ شىرقاعان اتاقتى ءانشى ءبىرجان سالدىڭ “ايتبايى” ەۋروپالىقتاردى قازاقتىڭ ناعىز ونەرلى دە ونەرپاز, كەڭ تىنىستى حالىق ەكەنىن مويىنداتقانداي بولدى. گالا-كونتسەرتتىڭ ءبىرىنشى بولىمىندە كوپشىلىك قاۋىم, سونداي-اق قازاقتىڭ قۇرمانعازى اتىنداعى مەملەكەتتىك اكادەميالىق حالىق اسپاپتارى وركەسترى ورىنداعان ي.ءبرامستىڭ “ۆەنگر ءبيى” مەن وسى وركەستردىڭ ورىنداۋىنداعى قۇرمانعازىنىڭ “سارىارقا” كۇيىن جانە بەلگىلى انشىلەر ايگۇل نيازوۆا, بيبىگۇل جانۇزاق پەن ءجاميلا جارقىمباەۆانىڭ ورىنداۋىنداعى لاتيف ءحاميديدىڭ “قازاق ءۆالسىن” قىزىعا تىڭدادى. وركەستر دە, اتالعان ءۇش ءانشى دە ءوز نومىرلەرىن جوعارى دەڭگەيدە اسقان جاۋاپكەرشىلىكپەن ورىنداپ شىقتى. اسىرەسە, جينالعان قاۋىم “سارىارقا” كۇيىنىڭ ورىندالۋ مانەرىنە تامسانىپ وتىردى. بيبىگۇلدىڭ, ءجاميلانىڭ, ايگۇلدىڭ كەڭ تىنىستى اشىق داۋىسى دا ولاردى ءتانتى ەتتى. بۇعان كونتسەرتتى تاماشالاپ وتىرعان كوپشىلىكتىڭ قول سوعىپ, قۇرمەت كورسەتۋلەرى ناقتى دالەل بولادى. “قازاق ەلىندە جۇرگەندەي سەزىندىم” وسى گالا-كونتسەرتكە كەزىندە ءتۇرلى جاعدايلارمەن ەۋروپادا تۇراقتاپ قالعان ءبىراز قانداستارىمىز دا ارنايى كەلگەن ەكەن. ءساتى تۇسكەندە ولاردىڭ بىرنەشەۋىمەن اڭگىمەلەسكەن ەدىك. سولاردىڭ ءبىرى – قازىرگى كەزدە گوللانديانىڭ استاناسى – امستەردام قالاسىندا تۇراتىن قاباي قىران دەگەن ازامات. تانىستىقتان سوڭ ول ءوزىنىڭ جۇرەكجاردى قۋانىشىن بىلايشا جەتكىزدى: – ۆەنا قالاسىندا قازاقستان ونەر شەبەرلەرىنىڭ كونتسەرتى وتەدى دەگەندى ەستىگەندە تاعات تاۋىپ وتىرا المادىم. ۇشاققا الدىن الا بيلەت الىپ, كەشە وسى ۆەنا قالاسىنا كەلدىم. مىنە, بۇگىن ءوزىمىز كۇن سايىن ساعىناتىن اتاجۇرتىم – قازاقستاننان كەلگەن انشىلەر مەن كۇيشىلەردىڭ كونتسەرتىن تاماشالاپ, مارقايىپ جۇرگەن جايىم بار. جاڭا “سارىارقا” كۇيىن تىڭداپ وتىرىپ, كوزىمە جاس كەلدى. ءوزىمدى قازاق ەلىن, قازاق دالاسىن ارالاپ جۇرگەندەي سەزىندىم. اۆستريانىڭ مىنا تاريحي ورنىندا قازاقتىڭ ءانى مەن كۇيىن تىڭداتقان قازاقستان پرەزيدەنتى نۇرسۇلتان نازارباەۆقا زور العىس ايتامىن. سول كىسىنىڭ ارقاسىندا قازاق ەلىن بۇكىل دۇنيە ءجۇزى تانىدى. ەندى قازاقستان ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋدى باستادى. بۇل بيىك مارتەبە – اتاجۇرتتان الىستا جۇرگەن بىزدەرگە وتە ۇلكەن ماقتانىش. تاعى ءبىر جولىققان قانداسىمىز وسى ۆەنا قالاسىندا تۇراتىن قىزىرحان شولپان بولدى. ەلۋدى ەڭسەرىپ قالعان قىزىرحان ۆەنا قالاسىنداعى قازاق قوعامىنىڭ توراعاسى ەكەن. – سىرتتا جۇرگەن قازاقتارعا بۇل – اسا ۇلكەن قۋانىش, مەرەكە, – دەدى ول قۋانىشتى كوڭىل-كۇيدە. – كونتسەرت تاماشا ءوتىپ جاتىر. بايقاعان شىعارسىز, وعان جينالعاندار قازاقتاردىڭ ونەرىنە تامسانىپ, قايتا-قايتا قول سوعىپ وتىرعانىن. بۇل ءبىز ءۇشىن باقىت, زور قۋانىش. جاڭا قازاقستان پرەزيدەنتى نۇرسۇلتان نازارباەۆتىڭ “قازاقستاندىق جول” كىتابىنىڭ تۇساۋكەسەرىنە دە قاتىستىم. ونشاقتى داناسىن الدىم. ونى وسى قالادا تۇراتىن قازاقتارعا تاراتىپ بەرەمىن. وقىسىن, تانىسسىن. اتاجۇرتىمىزدىڭ قانداي دارەجەگە جەتكەنىن ءبىلسىن. قىزىرحان شولپاننىڭ ايتۋىنشا, تەك وسى ۆەنا قالاسىندا 30-دان استام قازاق وتباسى تۇرادى. بارلىعى جۇمىس ىستەپ جۇرگەن كورىنەدى. اۆستريانىڭ جوعارى وقۋ ورىندارىندا وقىپ جاتقان بالالارى دا بارشىلىق ەكەن. سونداي-اق ول وسى جىلدىڭ مامىر ايىندا, ۆەنادا ەۋروپا قازاقتارىنىڭ قۇرىلتايىن جانە فۋتبولدان تۋرنير وتكىزۋدى جوسپارلاپ وتىرعانىن ايتىپ قالدى. ونداعى ماقسات – ەۋروپادا تۇراتىن قازاقتاردىڭ ءبىر-بىرىمەن تانىسىپ-بىلىسۋلەرىنە جاعداي تۋعىزۋ. بۇرىن ەۋروپانىڭ 10 ەلىندە قازاقتاردىڭ قوعامى بولەك-بولەك جۇمىس ىستەگەن ەكەن. وتكەن جىلى ولار ءبىر ورتالىقتان باسقارىلاتىن ەۋروپاداعى قازاق دياسپوراسىنىڭ فەدەراتسياسى بولىپ قايتا قۇرىلىپتى. ونەردىڭ بيىك شىڭى – وپەرا قازاقستان رەسپۋبليكاسىنىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋ قىزمەتىنە كىرىسۋ سالتاناتىنا ارنالعان قازاقستان ونەر شەبەرلەرى گالا-كونتسەرتىنىڭ ەكىنشى ءبولىمى كۇلاش بايسەيىتوۆا اتىنداعى ۇلتتىق وپەرا جانە بالەت تەاترىنىڭ سيمفونيالىق وركەسترى مەن حورى جانە قازاقستان وپەرا شەبەرلەرىنىڭ ونەر كورسەتۋلەرىمەن ءارى قاراي جالعاستى. الدىمەن اتالعان تەاتردىڭ سيمفونيالىق وركەسترى كومپوزيتور تىلەس قاجىعاليەۆتىڭ “قىز قۋىن” الان بورىباەۆتىڭ ديريجەرلىك ەتۋى بويىنشا ورىنداپ, كوپشىلىككە قول سوقتىردى. بۇل دا ءبىر ءساتتى ورىندالعان شىعارمالاردىڭ ءبىرى بولدى. وسى تۇستا ايتا كەتەيىك, دارىندى ديريجەر الان بورىباەۆتىڭ ديريجەرلىك ەتۋى ەرەكشەلەنىپ تۇردى. قيمىل-قوزعالىسى, بارلىعى ءبىر-بىرىمەن استاسىپ, تولىسىپ شىعىپ وتىردى. قازىرگى كەزدە الان بورىباەۆ قازاقستاننىڭ, قازاقتىڭ اتىن الىس-جاقىن شەتەلدەرگە شىعارىپ جۇرگەن ونەر شەبەرلەرىنىڭ ءبىرى سانالادى. جاس تا بولسا جەتكەن جەتىستىكتەرى مەن باعىندىرعان بيىكتەرى از ەمەس. قازاقتىڭ دارىندى ديريجەرىنىڭ ونەرى الدىندا شۆەتسيا, نيدەرلاندىنىڭ سيمفونيالىق وركەسترلەرى ءبىر كورگەننەن-اق باس ءيىپ, ونىڭ دارىندىلىعىن مويىنداعان. بۇگىندە ول شۆەتسيانىڭ نورچەپينگ سيمفونيالىق وركەسترىنىڭ جانە نيدەرلاندى كورولدىگىندەگى بارابانت سيمفونيالىق وركەسترىنىڭ باس ديريجەرى بولىپ ىستەيدى. قازاقستاندىق ونەر شەبەرلەرىنىڭ الىس-جاقىن شەت ەلدەردەگى مادەني شارالارى قازاقستاننىڭ حالىق ءارتىسى الىبەك دىنىشەۆتىڭ قاتىسۋىنسىز ءوتۋى وتە سيرەك. ءبىرتۋار ءانشىنى كوپشىلىككە تانىستىرىپ جاتۋ شىنىندا دا ارتىقتاۋ. وعان قازاقستاندىقتار عانا ەمەس, شەتەلدىك تىڭدارمان قاۋىم دا باياعىدا باعاسىن بەرىپ قويعان. بۇل جولى الىبەك دىنىشەۆ ەكى ءان ورىندادى. العاشقىسى قازاقتىڭ حالىق ءانى “اقباقاي”, ال ەكىنشىسى يتاليالىق ل.دەنتسانىڭ “التىباقاندا” ءانى. ەكى ءاندى دە الىبەك دىنىشەۆ اسقان شەبەرلىكپەن, شىڭىنا جەتكىزە ورىنداپ, جينالعان قاۋىمعا ۇزاق قول سوقتىردى. ءتىپتى, ءبىراز ۋاقىتقا دەيىن ساحنادان جىبەرمەي تۇرىپ الدى. ءاننىڭ, ونى ورىنداعان ءانشى داۋىسىنىڭ قۇدىرەتتىلىگى بولسا كەرەك بۇل. كەزىندە ۇمىتىلۋعا شاق قالعان بايىرعى ۇلتتىق مۋزىكا اسپاپتارىمىزدىڭ ءبىرى – قوبىز ءۇنى قازىرگى كەزدە قايتا جاڭعىرا باستادى. دالىرەك ايتقاندا, قاسيەتتى قوبىز ءۇنى قايتا ەستىلە باستادى. ونىمەن قوبىزشىلارىمىز ەلىمىزدىڭ عانا ەمەس, شەتەلدەردىڭ دە ساحنالارىندا شىعارمالار ورىنداپ ءجۇر. قولدارىنا قوبىز ۇستاپ, قازاقتىڭ بۇرمەلى كويلەكتەرىن كيگەن ءۇش قىز – قوبىزشىلار تريوسى گۇلزيا ستامبەك, اسەل نۇركەنوۆا جانە ەلميرا احمەدياروۆا ساحنا تورىنە شىعا كەلگەندە, قول سوقپاعان ادام قالمادى. ولار ورىنداعان قازاقتىڭ جانە ەۋروپانىڭ تانىمال اسپاپتىق اۋەندەرى كومپوزيتسياسىن جينالعان قاۋىم اسا زەيىن قويىپ, زور ىقىلاسپەن تىڭدادى. وسىلايشا, ەۋروپالىقتار قازاقتىڭ قاسيەتتى قوبىزىنىڭ عاجايىپ ءۇنىن كوزدەرىمەن كورە وتىرىپ تىڭدادى, قوبىز سارىنىنا ەلتىدى. قوبىزشىلار تريوسىمەن قىسقاشا تانىستىرا كەتسەك, ارتىق بولماس. ول – حالىقارالىق جانە رەسپۋبليكالىق كونكۋرستاردىڭ لاۋرەاتتارىنان قۇرالعان بىرەگەي انسامبل. ونىڭ قۇرامىنا پريما-قوبىز اسپابىندا وينايتىن جوعارىدا اتى-جوندەرى اتالعان قوبىزشى-ارتىستەر ەنگەن. پريما-قوبىز – قازاقتىڭ ەجەلگى قىلقوبىز اسپابىنىڭ جاڭارتىلعان ۇلگىسى. ال ۇجىمنىڭ رەپەرتۋارىندا وتاندىق جانە باتىسەۋروپالىق كلاسسيكتەردىڭ شىعارمالارى بار. بۇدان كەيىن كوپشىلىك باريتون داۋىستاعى تانىمال انشىلەر تالعات مۇساباەۆ پەن جاننات باقتايدىڭ ورىنداۋىندا دج.ۆەرديدىڭ “ترۋبادۋر” وپەراسىنان گراف دي لۋنا مەن لەونارانىڭ دۋەتىن تىڭدادى. قوس انشىگە دە تىڭدارماندار تاراپىنان ەرەكشە قۇرمەت كورسەتىلدى. جاننات باقتاي دا, تالعات مۇساباەۆ تا ك.بايسەيىتوۆا اتىنداعى ۇلتتىق وپەرا جانە بالەت تەاترىنىڭ جەتەكشى ءسوليسى. تەاترداعى قويىلىمداردىڭ بارلىعى وسى ەكى ءانشىنىڭ قاتىسۋىنسىز وتپەيدى. جانناتتىڭ رەپەرتۋارىندا قازاق كومپوزيتورلارىنىڭ تۋىندىلارى مەن حالىق اندەرىنىڭ الاتىن ورنى بولەك. ال تالعاتتىڭ شىعارماشىلىعىندا وپەرا جانرى ەرەكشە ماڭىزعا يە. ونىڭ ەسىمى بۇگىندە قازاق وپەرا ونەرىنىڭ جارقىراپ كەلە جاتقان جارىق جۇلدىزدارىنىڭ بىرەگەيى سانالادى. جالپى, ەۋروپالىقتار وپەرانى ەرەكشە باعالاپ, ۇيىپ تىڭدايتىندارى قازاقستان ونەر شەبەرلەرىنىڭ كونتسەرتى بارىسىندا تاعى بايقالدى. مىسالى, سيمفونيالىق وركەستر مەن تەاتر حورى ۇجىمدارى ۇسىنعان ر.ۆاگنەردىڭ “تانگەيزەر” وپەراسىنان كورىنىستەر مەن قازاق مەملەكەتتىك كونسەرۆاتورياسىنىڭ تۇلەگى, بۇگىندە گەرمانيادا ونەر كورسەتىپ جۇرگەن ۇزدىك پيانيستەردىڭ ءبىرى ءامىر تەبەنيحين ورىنداعان ف.شوپەننىڭ “ۆالس Es dur op. 18” تۋىندىسى كوپشىلىكتى بارىنشا ءتانتى ەتتى. سونداي-اق بەلگىلى ديريجەر ابزال ءمۇحيتدينوۆتىڭ ديريجەرلىك ەتۋىمەن تانىمال ءانشى نۇرلان بەكمۇحامبەتوۆ ورىنداعان گ.دونەتسەتتيدىڭ “ماحاببات سۋسىنى” وپەراسىنداعى نەمورينو رومانسى دا كونتسەرتتى تاماشالاۋشىلار تاراپىنان جىلى قابىلداندى. ءانشىنىڭ ايتۋلى شەتەلدىك ساحنالاردان ءجيى كورىنىپ ءجۇرۋى وسى جولى دا ايقىن اڭعارىلدى. كونتسەرتتىڭ سوڭىنا تامان ءامىر بيسەنعاليەۆ, شەرنياز مۇساحان, ەرجان ك ۇلىباەۆ, نۇريا كارىمباەۆا جانە ينارا جۇمابەكوۆا سكريپكامەن ك.سەن-ءسانستىڭ “روندو كاپريچچيوزو” تۋىندىسىن ورىنداعان بولاتىن. ولاردىڭ ورىنداۋىنداعى شىعارما دا تىڭداۋشىلار تاراپىنان ريزالىقپەن قابىلداندى. بۇل بەس سكريپكاشى قازىرگى كەزدە انگليانىڭ, رەسەيدىڭ, يسپانيانىڭ, گەرمانيانىڭ ونەر وردالارىندا شىعارماشىلىقتارىن شىڭداپ جاتىر ەكەن. ولاردىڭ بەسەۋى دە مەملەكەتتىك “بولاشاق” باعدارلاماسى بويىنشا الەمنىڭ ەڭ ۇزدىك جوعارى وقۋ ورىندارىندا ءبىلىم العان جاستار. بولاشاقتا ولار ۇلتتىق ونەرىمىزدى الەمنىڭ وزىق تۋىندىلارىمەن ۇندەستىرىپ, ونى دۇنيە ءجۇزىنىڭ حالىقتارىنا تانىتادى دەگەن سەنىمدەمىز. الداعى ۋاقىتتا بۇل جاستار مارات بيسەنعاليەۆتىڭ, ايمان مۇساقوجاەۆانىڭ ءىزىن ءارى قاراي جالعاستىراتىن ونەر شەبەرلەرى بولاتىندارىنا سەنىم ارتقان ءجون شىعار. تالعامپاز ەۋروپا جۇرتشىلىعى, سونداي-اق باريتون داۋىستى ازامات جىلتىركوزوۆ, اندرەي ترەگۋبەنكو جانە ولەگ ءتاتاميروۆتىڭ ورىنداۋىنداعى دج.ءروسسينيدىڭ “سەۆيل شاشتارازى” وپەراسىنداعى فيگارو كاۆاتيناسىنا قول سوعىپ, ىقىلاس تانىتتى. بۇگىندە قازاق وپەراسىنىڭ جارىق جۇلدىزىنا اينالعان, ءپاريجدىڭ اتاقتى ساحنالارىندا ونەر كورسەتىپ, قازاق حالقىن الەمگە تانىتىپ جۇرگەن مايرا مۇحامەدقىزى ورىنداعان ي.كالماننىڭ “چاردوش حانشايىمى” وپەراسىنداعى سيلۆا ارياسى مەن قازاقتىڭ حالىق ءانى “گۇلدەرايىم” جينالعان جۇرتشىلىققا ەرەكشە اسەر ەتتى. كوپشىلىك ءانشىنى قول سوعىپ, ساحنادان تۇسىرمەي ءبىراز تۇردى. ال ەۋروپا تورىندەگى گالا-كونتسەرت ەسكەندىر حاسانعاليەۆتىڭ “اتامەكەن” انىمەن قورىتىندىلاندى. سوڭىنان قازاقستاندىق ونەر شەبەرلەرىنە ەقىۇ توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ اتىنان ىقىلاس گ ۇلى ۇسىنىلدى. جالپى, قازاقستان رەسپۋبليكاسىنىڭ ەقىۇ-عا توراعالىق ەتۋ قىزمەتىنە كىرىسۋ سالتاناتىنا ارنالعان شتراۋس پەن موتسارت ەلىندەگى قازاقستاندىق ونەر شەبەرلەرىنىڭ گالا-كونتسەرتى اسقان ۇيىمشىلدىقپەن تابىستى ءوتتى دەپ ايتۋىمىزعا ابدەن بولادى. ول كونتسەرتتىڭ ءوتۋ بارىسىندا ونى تاماشالاعان كوپشىلىك قاۋىمنىڭ كوڭىل-كۇيىنەن, شىعارمانى ورىنداعان ءانشى-ارتىستەرگە كورسەتىلگەن قۇرمەتتەن ايقىن كورىنىپ تۇردى. ەكىنشىدەن, كونتسەرتكە كەلۋشىلەردىڭ قاتارى مول بولعانى سونشالىق, وتىراتىن بوس ورىن بولمادى. ورىن جەتپەگەندىكتەن, ادامداردىڭ بىرقاتارى تۇرىپ كوردى. سولاردىڭ قاتارىندا ەلشىلىكتىڭ قىزمەتكەرلەرى مەن بىزدەر, جۋرناليستەر دە بارمىز. ال گالا-كونتسەرتتىڭ ويداعىداي وتۋىنە اتسالىسقان, ونى ۇتىمدى ۇيىمداستىرا بىلگەن مادەنيەت جانە اقپارات مينيسترلىگىنە, ونىڭ قۇرامىنداعى “قازاق اۋەندەرى” اكتسيونەرلىك قوعامىنا, قۇرمانعازى اتىنداعى وركەستردىڭ, ك.بايسەيىتوۆا اتىنداعى وپەرا جانە بالەت تەاترىنىڭ, تاعى باسقا ونەر ۇجىمدارىنىڭ باسشىلارىنا العىس ايتقان ورىندى. ءاليسۇلتان قۇلانباي.