بۇگىن استانادا ەرەسەكتەر اراسىندا بوكستان كەزەكتى قازاقستان چەمپيوناتى باستالادى. مۇنداعى بىرنەشە كۇننەن بەرى كەرىلىپ تۇرعان شارشى الاڭدا 23 قاڭتارعا دەيىن ەلىمىزدىڭ جەر-جەرىنەن جيىلعان بىلعارى قولعاپ شەبەرلەرى باق سىناساتىن بولادى.
قازىر ەكى ايدان بەرى ۇلتتىق قۇرامانىڭ باس باپكەرى قىزمەتىن وسى كەزگە دەيىن وڭتۇستىك قازاقستان وبلىسى بوكسشىلارىنىڭ تىزگىنىن ۇستاعان حالىقارالىق دارەجەدەگى سپورت شەبەرى مىرزاعالي ايتجانوۆتىڭ اتقارىپ كەلە جاتقانى بەلگىلى. بوكس فەدەراتسياسىنىڭ مالىمەتتەرىنە قاراعاندا, استانادا ءبىر اپتاعا سوزىلاتىن ايقاستاردا ايتجانوۆ كۇشتىلىگىمەن, ەپتىلىگىمەن كوزگە تۇسكەن بىلعارى قولعاپ شەبەرلەرىن قازاقستان ۇلتتىق قۇراماسىنىڭ ساپىنا جينايتىن بولادى. بۇل وسى سىندا قارا ءۇزىپ, چەمپيون اتانعان بوكسشىلار ەندى ۇلتتىق قۇراما ساپىنا قوسىلىپ, بيىلعى جىلى وتەتىن جازعى ازيا ويىندارى مەن كەلەسى جىلى كورەيانىڭ بۋسان قالاسىندا جالاۋىن كوتەرەتىن الەم چەمپيوناتىنا بارادى دەگەن ءسوز.
جالپى, دامير بۋدانبەكوۆتىڭ ورنىنا كەلگەن ماماننىڭ بوكسشىلاردى ءجيى كەزدەستىرىپ, قولعاپ تۇيىستىرگىزىپ جاتقانىن تەك جاقسىلىققا بالاۋ كەرەك سياقتى. ويتكەنى, مۇنداي ايقاستار ءبىر جاعىنان شارشى الاڭنىڭ شاڭىن قاعىپ جۇرگەن بوكسشىلاردىڭ شەبەرلىگىن ارتتىرسا, ەكىنشى جاعىنان ءالى ەل چەمپيوناتى سەكىلدى جاۋاپتى باسەكەلەرگە بارماعان جاستار ءۇشىن ناعىز تاجىريبە الاڭى بولاتىنى ءسوزسىز. بۇعان دەيىن ۇلتتىق قۇرامانىڭ تىزگىنىن ۇستاعان مىرزاعالي ايتجانوۆتىڭ كوزگە تۇسكەن بوكسشىلاردى ىرىكتەپ الىپ, قازاقستان كومانداسىن بىرنەشە باسەكەلەرگە اپارعانى بەلگىلى. ءسويتىپ, ەكى ايدا ءۇش توپقا ىرىكتەلگەن ۇلتتىق قۇرامانىڭ بوكسشىلارى ءۇش حالىقارالىق تۋرنيرگە قاتىسىپ قايتقان بولاتىن. ونىڭ ءبىرىنشىسى, ءازىربايجاننىڭ باكۋ قالاسىندا وتكەن ءاىۆا پرەزيدەنتىنىڭ كۋبوگى جولىنداعى تۋرنير بولسا, ەكىنشىسى رەسەيدىڭ حانتى-مانسي وكرۋگىندە مۇنايلى ەلدەردىڭ اراسىندا وتكىزىلگەن الەم كۋبوگى. ال ءۇشىنشىسى قاراعاندى قالاسىندا ۇيىمداستىرىلعان عالىم جارىلعاپوۆتى ەسكە تۇسىرۋگە ارنالعان حالىقارالىق تۋرنير. وسىلاردىڭ ىشىندە باكۋدە باق سىناعان بوكسشىلارىمىز ەلىمىزگە ءبىر التىن, ءبىر كۇمىس جانە ءبىر قولا مەدالدى الىپ كەلدى. وسى جەردە ايتا كەتەتىن نارسە, ءازىربايجان استاناسىندا وتكەن ايقاستا ايتجانوۆتىڭ ءتول شاكىرتى بىلتىر بەلگىسىز سەبەپتەرمەن الەم چەمپيوناتىنا بارا الماعان ءبىرجان جاقىپ التىننان القا تاعىنىپ قايتتى. ال حانتى-مانسيدە وتكىزىلگەن ءباسەكەدە ۇلتتىق قۇراما ءۇش قولا جۇلدەگە يە بولسا, قاراعاندىداعى سىندا وتانداستارىمىز قۇرمەت تۇعىرىنىڭ ەڭ بيىك ساتىسىنان كورىنە ءبىلدى. وندا 48, 54 كگ. جانە اسا اۋىر سالماقتاعى بوكسشىلاردان باسقالارىنىڭ ءبارى باس جۇلدەنى ولجالاعانىن اتاپ وتكەن ءجون. مۇندا كەزىندە كەنشىلەر قالاسىنىڭ شارشى الاڭىندا اتوي سالىپ, جەڭىمپاز اتانعان ەرماحان ىبىرايىموۆ, ۆاسيلي جيروۆ, گەننادي گولوۆكين, سەرىك ەلەۋوۆتىڭ جولىن 51 كگ. سالماقتاعى جاس تالانت جاندوس احمەتوۆ, الەمنىڭ ەكى دۇركىن چەمپيونى سەرىك ءساپيەۆ پەن باسقا دا بوكسشىلار جالعاستىردى.
مىنە, وسىنداي باسەكەلەرگە بارىپ, جاڭا تاعايىندالعان باس باپكەردىڭ قاراماعىندا جاتتىعىپ جۇرگەن بىلعارى قولعاپ شەبەرلەرى بۇگىن استانا تورىندە بىرنەشە جىلدان بەرى كەزەگىن كۇتىپ, كەرىلىپ تۇرعان شارشى الاڭنىڭ شاڭىن قاعۋ ءۇشىن ءوزارا كۇش سىناساتىن بولادى. “تويدىڭ بولعانىنان, بولادىسى قىزىق” دەمەكشى, بۇل باسەكەنى تاعاتسىزدانا كۇتكەن جانكۇيەرلەر كوپ. سوندىقتان بولار, چەمپيوناتتى ۇيىمداستىرۋشىلار ونىڭ بارىنشا قىزىقتى ءارى تارتىمدى وتۋىنە قولدا بار جاعدايدىڭ ءبارىن جاساپ وتىر. بوكس فەدەراتسياسىنىڭ ۆيتسە-پرەزيدەنتى جانبولات سارسەنوۆ سياقتى وسى سپورت ءتۇرىنىڭ اينالاسىندا جۇرگەن ماماندار بيىلعى چەمپيوناتتىڭ وتكەن جىلدارعا قاراعاندا, ەرەكشە بولاتىنىنا جانە جاقسى ناتيجەلەرمەن ءارى وتە قىزىقتى وتەتىنىنە سەنىمدى. قالاي بولعاندا دا, شىن مىقتىنى جەكپە-جەكتىڭ ءوزى كورسەتەدى. قازىر ەلىمىزدە سەرىك ساپيەۆ, ءبىرجان جاقىپ, عاني جايلاۋوۆ, ولجاس ءساتتىباەۆ, باقىتجان قوجابەكوۆ, مەرەي اقشالوۆ, باكۋدە وتكەن تۋرنيردە رەسەيلىك بوكسشىدان ون ءبىر ۇپاي ايىرماسىمەن ۇتىلىپ تۇرىپ, كەزدەسۋدىڭ اياقتالۋىنا ساناۋلى سەكونتتەر قالعاندا قارسىلاسىن ۇرىپ جىققان رۋسلان مىرساتاەۆ, ولاردىڭ ءىزىن باسىپ كەلە جاتقان ۆاسيلي لەۆيت, جاندوس احمەتوۆ, ەرجان ءومىرجانوۆ, دۋمان ءالىموۆ, ازامات بەلگىباەۆ, داۋرەن ەلەۋسىنوۆ سىندى جاس تالانتتار بارشىلىق.
ءسوز سوڭىندا استانادا وتەتىن رەسپۋبليكا چەمپيوناتىنىڭ جارتىلاي فينالدىق جانە اقتىق ايقاستارىن جانكۇيەرلەر 22-23 قاڭتار كۇندەرى “قازاقستان” ۇلتتىق تەلەارناسىنان تاماشالاي الاتىنىن ەسكەرتكىمىز كەلەدى.
داستان كەنجالين.