كەشە قىزىلوردا قالاسىنداعى دوستىق ۇيىندە «SarapTime» ساراپشىلار كلۋبىنىڭ «جاڭا كونستيتۋتسيالىق كەزەڭدەگى قازاقستان» تاقىرىبىنداعى كەزەكتى وتىرىسى ءوتتى. زاڭ عىلىمدارىنىڭ كانديداتى, «قر زاڭ ينستيتۋتى» گۋمانيتارلىق ۋنيۆەرسيتەتىنىڭ جەتەكشى عىلىمي قىزمەتكەرى مەرەكە عابدۋاليەۆ شارانىڭ باستى سپيكەرى بولدى, سونداي-اق ايماقتاعى ساراپتامالىق قوعامداستىق وكىلدەرى قاتىستى. ساراپشىلار كلۋبىنىڭ 2017 جىلعى العاشقى وتىرىسى بيلىك تارماقتارى اراسىنداعى وكىلەتتىكتەردى قايتا رەفورمالاۋ اياسىندا مەملەكەت باسشىسى نۇرسۇلتان نازارباەۆتىڭ باستاماسىمەن بولعان قازاقستان رەسپۋبليكاسىنىڭ كونستيتۋتسياسىنا ەنگىزىلگەن جاڭا تۇزەتۋلەردى تالقىلاۋعا ارنالدى.
- وزدەرىڭىز بىلەتىندەي, قازاقستاندا بۇكىلحالىقتىق كونستيتۋتسيالىق رەفورمانىڭ جوباسىن تالقىلاۋ اياقتالدى. بيلىك تارماقتارى اراسىنداعى وكىلەتتىلىكتەردى قايتا رەفورمالاۋ جونىندەگى جۇمىس توبىنا 6 مىڭ ازاماتتان ءوتىنىش كەلىپ ءتۇستى. ازاماتتاردىڭ پىكىرىن ەسكەرە وتىرىپ, پارلامەنت زاڭ جوباسىن بەكىتتى. 10 ناۋرىز كۇنى مەملەكەت باسشىسى كونستيتۋتسياعا ەنگىزىلگەن وزگەرىستەردى ماقۇلدادى. ساراپشىلار قاۋىمداستىعىنىڭ ەندىگى باستى ماقساتى – تۇسىندىرمە جۇمىستارىن جۇرگىزۋ. سوندىقتان ءبىز كونستيتۋتسيالىق قۇقىق بويىنشا تاجىريبەلى زاڭگەر مەرەكە عابدۋاليەۆتى شاقىردىق,- دەدى كىرىسپە سوزىندە وتىرىستىڭ مودەراتورى, قىزىلوردا وبلىسى اكىمىنىڭ كەڭەسشىسى ارتۋر نىعمەتوۆ.
سپيكەر مەرەكە عابدۋاليەۆ بيلىك تارماقتارىن قايتا بولۋدەگى نەگىزگى پۋنكتتەر مەن ونىڭ سالدارى تۋرالى ايتىپ بەردى.
- ۇزاق ۋاقىتتار بويى ءبىز پرەزيدەنتتىك رەسپۋبليكادا ءومىر سۇردىك جانە سونىڭ ارقاسىندا زاڭنامالىق رەفورمالاردىڭ تەرىس تۇسى بولعان جوق. بۇگىندە ءبىز ەلباسىنىڭ كونستيتۋتسيالىق دەڭگەيدە ءوز وكىلەتتىلىگىنەن باس تارتىپ, پارلامەنت پايداسىنا شەشىپ وتىرعانىن كورىپ وتىرمىز. سونىمەن قاتار باسقارۋ مودەلى پرەزيدەنتتىك بولىپ قالادى,- دەدى م.عابدۋاليەۆ.وسىدان كەيىن ساراپشى وتىرىسقا قاتىسۋشىلاردىڭ ساۋالدارىنا جاۋاپ بەردى.