وڭىرارالىق ىنتىماقتاستىقتى نىعايتۋ ايماقتار اراسىندا باسەكەلەستىكتى دامىتىپ قانا قويماي, ءوز كەزەگىندە تاۋار وندىرۋشىلەردىڭ دە تاجىريبە الماسۋىنا مول مۇمكىندىك تۋعىزادى. ءارى وندىرىلگەن تاۋارلاردى قولجەتىمدى باعامەن حالىق يگىلىگىنە ۇسىنۋ دا ەكىجاقتى ەكونوميكالىق, الەۋمەتتىك بايلانىستاردى نىعايتىپ, قالىپتاستىرادى.
وسى ماقساتتا تاياۋدا جامبىل وبلىسىنان ازىق-ت ۇلىك تيەلگەن اۆتوكەرۋەن اقتوبە قالاسىنا جول تارتتى. جامبىلدىق تاۋار وندىرۋشىلەر ءوز ونىمدەرىن 18-19 ناۋرىز كۇندەرى ارنايى ۇيىمداستىرىلعان جارمەڭكەدە اقتوبە حالقىنا ساۋدالايتىن بولادى.
اۋىلشارۋاشىلىق جارمەڭكەسىندە جالپى قۇنى 105,5 ميلليون تەڭگەنى قۇرايتىن 177 توننادان استام اۋىلشارۋاشىلىق تاۋارلارى ۇسىنىلادى. ونىڭ ىشىندە 25 تونناعا جۋىق جىلقى, تاۋىق, شوشقا ەتى ونىمدەرى, 10 توننا شۇجىق ونىمدەرى, 13 توننا ءسۇت ونىمدەرى, 5 مىڭ دانا جۇمىرتقا, 1,5 توننا كونديتەرلىك ونىمدەر مەن 6 توننا ماكارون ونىمدەرى, سونداي-اق, 10 توننا قانت, 0,5 توننا تۇز, 7 توننا بالىق, 2 توننا بال جانە 80 توننا جەمىس-جيدەك پەن كوكونىس ونىمدەرى بار. جارمەڭكەدە ۇسىنىلاتىن تاۋار باعالارى نارىق باعاسىنان 8-20 پايىزعا تومەن بولادى دەپ جوسپارلانىپ وتىر. بۇل دا تۇرعىندار اراسىندا قولجەتىمدىلىكتى ارتتىرىپ, باعا تۇراقتىلىعىن ساقتاۋعا وڭ اسەرىن تيگىزەتىنى ءسوزسىز.
حاميت ەسامان,
«ەگەمەن قازاقستان»
جامبىل وبلىسى