نۇر تامشىلارى توگىلىپ, اينالانى مەيىرىمگە بولەپ, جەر-جاھانعا جاسىل كويلەك كيگىزىپ, اق بۇلاقتار اقتارىلىپ, جىل قۇستارىنىڭ ءانى شالقىپ ناۋرىز كەلدى قازاق جەرىنە.
جىلدان-جىلعا ناۋرىز مەيرامىن اتاپ ءوتۋ ايرىقشا سيپات الىپ, كوركەيىپ كەلەدى. بەرەكە-بىرلىكتىن باستاۋى, جاڭالىقتىڭ جارشىسى, جىل باسى ناۋرىزدى سوزاق اۋداندىق ورتالىق كىتاپحاناسى بيىل تەرىسكەي جەرىندە العاشقىلاردىڭ ءبىرى بولىپ باستادى. ءوز وقىرماندارىنا ناۋرىز كوجە بەرۋدى ۇيعارعان كىتاپحاناشىلار «ناۋرىزناما: ناۋرىز – ءتىلەك, ناۋرىز – ءدام» اتتى كىتاپحاناشى قوناقجايىندا مەرەكەلىك داستارقان جايدى. قوناقجايدا ءمۇمكىندىگى شەكتەۋلى ازاماتتار, ەڭبەك ارداگەرلەرى, ارداقتى انالار, زيالى قاۋىم وكىلدەرى ءبىر-ءبىرىن جاڭا جىلمەن قۇتتىقتاپ, داستارحان ءۇستىندە ونەگەلى اڭگىمەلەر, باتا-تىلەكتەر ايتىلدى. قوناقتارعا ارنايى دايىندالعان كونتسەرتىك باعدارلاما ۇسىنىلىپ, ءان-جىر شالقىپ, مىڭ بۇرالعان بيشىلەر توبى ونەر كورسەتتى.
«سوزاققا بارساڭ كۇيشىمىن دەمە...» دەگەن ەدى ۇلى جازۋشى مۇحتار اۋەزوۆ وڭتۇستىككە جاساعان ساپارىندا. سونىڭ دالەلىندەي, كۇي توگىلگەن كۇن بولدى. دارىندى كۇيشى ەرعالي جۇزباەۆ, تالانتتى جاستار دينا بەكتاەۆا, گۇلنازيرا جەكسەنبيەۆا سۇگىردىڭ, ءتولەگەننىڭ كۇيلەرىن اسقان شەبەرلىكپەن ورىنداپ, مەرەكە شىرايىن اشا ءتۇستى. ۇلتتىق كيىمدەر كيىپ, ورامالدارىن ءتوگىلدىرە سالىپ قىزمەت جاساعان كىتاپحاناشىلار, ءىس-شارانى جۇرگىزۋشىلەر ناۋرىزدىڭ ۇلگى-ونەگەلىك سيپاتىنا ەرەكشە ءسان بەرگەنىن اتاپ وتكەنىمىز ءجون.
گۇلنار ومىربەك
وڭتۇستىك قازاقستان وبلىسى,
سوزاق اۋدانى