جۋىردا ەرەۆان مەملەكەتتىك ۋنيۆەرسيتەتىندە ەلباسى ن.نازارباەۆتىڭ قازاقستان حالقىنا ارناعان ءداستۇرلى جولداۋىن ناسيحاتتاۋعا جانە ەلىمىزدەگى كونستيتۋتسيالىق رەفورمالار تاقىرىبىنا ارنالعان دوڭگەلەك ۇستەل ءوتتى. بۇل تۋرالى ەلىمىزدىڭ سىرتقى ىستەر مينيسترلىگى حابارلادى.
دوڭگەلەك ۇستەلگە ارمەنيا پارلامەنتىنىڭ دەپۋتاتتارى, مەملەكەتتىك ورگاندارىنىڭ قىزمەتكەرلەرى, اكادەميالىق, ساراپشىلىق جانە ىسكەرلىك ورتانىڭ بەلدى تۇلعالارى, بۇقارالىق اقپارات قۇرالدارىنىڭ وكىلدەرى قاتىستى. الداعى ءساۋىر ايىندا ارمەنيادا پارلامەنتتىك سايلاۋ وتەتىنىن, سونىمەن قاتار, ەل كونستيتۋتسياسىنا ەنگىزىلگەن وزگەرىستەر بويىنشا بۇل ەلدىڭ پارلامەنتتىك باسقارۋعا كوشەتىنىن ەسكەرسەك, دوڭگەلەك ۇستەل تاقىرىبى وزەكتى بولعانى تۇسىنىكتى.
باسقوسۋدىڭ بەتاشارىندا قازاقستاننىڭ ارمەنياداعى ەلشىسى تيمۋر ورازاەۆ ءسوز الىپ, قاتىسۋشىلارعا ەلىمىزدىڭ سىرتقى جانە ىشكى ساياساتى تۋرالى, ونىڭ نەگىزگى باعىتتارى جونىندە باياندادى. ەل ەكونوميكاسىن كەشەندى جەتىلدىرۋ, جاھاندىق باسەكەگە قابىلەتتىلىكتى ارتتىرۋ ءۇشىن قولعا الىنعان جۇمىستار بارىسى تۋرالى ايتتى.
ارمەنيا پارلامەنتىنىڭ دەپۋتاتى ا.بابۋحانيان ءوز سوزىندە ساياسي, ەكونوميكالىق سالالارداعى جوسپارلار مەن ونى ءىس جۇزىنە اسىرۋدا قازاقستاندا وڭ ءۇردىس قالىپتاسقانىن تىلگە تيەك ەتتى. دەپۋتاتتىڭ پايىمداۋىنشا, ن.نازارباەۆتىڭ جولداۋىندا كورسەتىلگەن باستامالار تەك قازاقستان ءۇشىن عانا ەمەس, جاھاندىق تالاپتارمەن بەتپە-بەت كەلىپ وتىرعان باسقا دا دامۋشى ەلدەر ءۇشىن ماڭىزدى بولىپ تابىلادى. ارمەنيا اكىمشىلىك سوتىنىڭ توراعاسى ك.ماتەۆوسيان قازاقساننىڭ مەملەكەتتىك باسقارۋ جۇيەسىندەگى وزگەرىستەردىڭ ۋاقتىلى قولعا الىنعانىن ءارى ونىڭ وڭ ناتيجە بەرەتىنىن اتاپ ءوتتى.
جيىن سوڭىندا قاتىسۋشىلارعا كونستيتۋتسياعا ەنگىزىلگەن وزگەرىستەر مەن ەلباسى جولداۋىنىڭ ارميان تىلىنە ءتارجىمالانعان ءماتىنى, قازاقستان تۋرالى اقپاراتتار توپتاستىرىلعان باسقا دا كىتاپتار مەن ماتەريالدار تاراتىلدى.