قر پرەمەر-ءمينيسترى شىعىس قازاقستان وبلىسىنا جۇمىس ساپارى اياسىندا سەمەي قالاسىنىڭ سول جاق جاعالاۋىنداعى تۇرعىن-ءۇي جانە اكىمشىلىك عيماراتتاردىڭ 70%-ىن جىلۋمەن قامتاماسىز ەتەتىن جەو-1-ءدىڭ قايتا جوندەۋ جۇمىستارىن تەكسەردى, دەپ جازادى primeminister.kz.
سونداي-اق, ب. ساعىنتاەۆقا ءوڭىردىڭ باسىمدىقتى جوبالارىنىڭ ءبىرى بولىپ تابىلاتىن جەو-3-ءتىڭ قۇرىلىس جۇمىستارى تۋرالى ەسەپ بەرىلدى. قازىرگى ۋاقىتتا جوبا بويىنشا تەحنيكالىق-ەكونوميكالىق نەگىزدەمە ازىرلەنگەن جانە مەملەكەتتىك ساراپتامادان دايەكتەمە الىنعان. جوبانىڭ ماقساتى – تيىمدىلىگى مەن سەنىمدىلىگى تومەن كوپتەگەن قازاندىقتاردىڭ قۋاتتىلىقتارىن الماستىرۋ, جىلۋلىق جۇكتەمەلەردىڭ ءوسىمىن جابۋ, تەحنولوگياسى ءتيىمدى جىلۋ جانە ەلەكتر ەنەرگياسى ءوندىرىسىنىڭ ەكولوگيالىق تازا كوزىن قالىپتاستىرۋ.
سونىمەن قاتار باقىتجان ساعىنتاەۆ شىعىس قازاقستان وبلىسىنا جۇمىس ساپارى اياسىندا «نۇرلى جول» مەملەكەتتىك باعدارلاماسى اياسىندا جۇرگىزىلىپ جاتقان سەمەي قالاسىنىڭ حالىقارالىق اۋەجايىنىڭ قايتا جوندەلۋ جۇمىستارىمەن جانە جۇيەسىمەن تانىستى.
وبلىس اكىمىنىڭ ورىنباسارى س. اقتانوۆ قر پرەمەر-ءمينيسترى باقىتجان ساعىنتاەۆقا اۋەجايدىڭ قايتا جوندەلۋ جۇمىستارىنىڭ بارىسى تۋرالى ايتىپ بەردى. ونىڭ اياسىندا ۇشىپ-قونۋ جولاعى 2,7 شاقىرىمنان 3,3 شاقىرىمعا دەيىن ۇزارتىلاتىن بولادى, جاڭا اپاتتان قۇتقارۋ ستانساسى تۇرعىزىلادى, جانە كوممۋنيكاتسيانىڭ بارلىق ءتۇرى الماستىرىلاتىن بولادى. بۇدان وزگە, ب. ساعىنتاەۆقا اۋەجايدىڭ قاۋىپسىزدىك جۇيەسىنىڭ جۇمىستارى تۋرالى ەسەپ بەرىلدى.
ايتا كەتۋ كەرەك, سەمەي قالاسىنىڭ اۋەجايى ترانزيتتىك باعدارلار ءۇشىن وتە قولايلى گەوگرافيالىق جەردە ورنالاسقان جانە قايتا قۇرۋ جۇمىستارىنان كەيىن جۇك لاينەرلەرىنەن باستاپ, كەز-كەلگەن ۇشاق تۇرلەرىن قابىلداي الاتىن بولادى. بۇگىنگى تاڭدا اۋە ايلاعى جىلىنا شامامەن 70 مىڭ ادامعا قىزمەت كورسەتەدى.