تاعدىردىڭ جازۋىمەن دەرت تاۋقىمەتىن باستان كەشىپ, اۋرۋمەن ارپالىسىپ, قامكوڭىل كۇيدە ءومىر ءسۇرىپ جاتقان جاندار از ەمەس. ولاردىڭ قاتارىندا اسىرەسە, دۇنيە ەسىگىن اشقالى ءومىر ءۇشىن كۇرەسىپ كەلە جاتقان, ون ەكىدە ءبىر گ ۇلى اشىلماعان جەتكىنشەكتەردىڭ بولعانى جۇرەكتى اۋىرتادى-اق.
قازاقستان رەسپۋبليكاسى ۇلتتىق كىتاپحاناسىنىڭ قولداۋىمەن ە.تۇرسىنوۆ كينوكلۋبىندا الماتى قالاسىنىڭ بەلسەندى جاستارىنىڭ ۇيىمداستىرۋىمەن جانە قازاق ەسترادا جۇلدىزدارىنىڭ قاتىسۋىمەن «جاقسىلىق جاساپ جارىسايىق» اتتى قايىرىمدىلىق كونتسەرتى ءوتتى.
بۇل قايىرىمدىلىق كەشىنىڭ باستى كەيىپكەرى – 2003 جىلدىڭ 10 مامىرىندا تۋعان سلامبەك ءشارىپ. دۇنيە ەسىگىن اشقانىنا ءۇش اي تولعان شاعىندا «ەمبريونالدى رابدوميوساركوما» دەگەن دياگنوز قويىلعان سلامبەكتىڭ اۋىر دەرتپەن ءالى قانشا جىل الىساتىنىن ونىڭ اتا-اناسى دا, اتا-اجەسى دە, دارىگەرلەر دە ناقتى بىلمەگەن ەدى... نەبارى 13 جاسىندا 12 رەت وتا جاساتقان بالاسىنىڭ دەرتىنە داۋا ىزدەپ شىرىلداعان اتا-انانىڭ ەندىگى بار ارمانى – سلامبەكتى وڭتۇستىك كورەيا ەلىنە اپارىپ, ون ءۇشىنشى وتانى ءساتتى جاساتىپ قايتۋ ەكەن...
جارىق الەمنىڭ شاتتىعى مول كۇندەرىنەن ءۇمىتىن ەش ۇزبەگەن سلامبەك ءشارىپتىڭ شەت ەل اسىپ, ەم الىپ قايتۋىنا بارىنشا كومەك قولىن سوزعىسى كەلگەن جاندار كوپ جينالعان ءداستۇرلى ناقىشتاعى, قازاقي ءۇنى بار قايىرىمدىلىق كەشىندە ءانشى, سازگەر بايعالي ەسەناليەۆ: «ۇلكەن كونتسەرتتەرگە شىعىپ, ءان سالماي كەتكەنىمە كوپ بولىپ ەدى, دەگەنمەن, سلامبەك بالامىز ساۋىعىپ كەتسىن دەگەن نيەتپەن وسى قايىرىمدىلىق كونتسەرتىنە ارنايى قاتىسىپ وتىرمىن», – دەپ اعىنان جارىلدى.
ال جازۋشىلار وداعىنىڭ مۇشەسى, ق.ءساتباەۆ عىلىمي-تانىمدىق ورتالىعىنىڭ ديرەكتورى اسپانديار ادەن ۇلى: «ءبىز نەگە باتىسقا, كورەيا ەلىنە نەمەسە قىتايعا بارىپ ەمدەلۋىمىز كەرەك؟ ەلىمىزدە قانشاما مەديتسينالىق وقۋ ورىندارى مەن زەرتتەۋ ينستيتۋتتارى بار. سول وقۋ ورىندارىنان ءبىلىم العان قانشاما ءبىلىمدى جاستارىمىز بار. بىراق ولار العان ءبىلىمىن مەديتسيناسى دامىعان شەت ەلدەردە جالعاستىرعىسى كەلگەنمەن, قالتاسىنداعى قارجىسى جەتپەي, پۇشايمان كۇيدە ءجۇر. ەگەر ىنتا بىلدىرگەن دارىگەرلەرگە قولداۋ بەرىپ, شەت ەلدە تاجىريبەدەن ءوتىپ كەلۋىنە جاعداي جاساساق, سلامبەك ءتارىزدى دەرتىنە شيپا ىزدەگەن قانشاما ادام الىسقا ساپارلاتپاي-اق, ءوز ەلىندە-اق قاجەتتى ەمىن الىپ, ساۋىعىپ كەتەر مە ەدى دەگەن ويعا قالاتىنىمىز راس», دەگەن پىكىرىن ورتاعا سالىپ, ۇلكەن ماسەلەنىڭ شەتىن كوتەردى.
مارات وماروۆ, بايعالي ەسەناليەۆ, گۇلميرا اقۇرپەكوۆا, التىن اينيازوۆا سىندى بىرقاتار تانىمال انشىلەر ءۇش دۇركىن الەم چەمپيونى, سپورتشى ارداق نازاروۆ, «كلاسسيك» كوڭىلدى تاپقىرلار كلۋبى, كىتاپحانا قىزمەتكەرلەرى, ستۋدەنتتەر مەن باق وكىلدەرى قاتىسقان قايىرىمدىلىق كەشىندە ءسوز العان سلامبەكتىڭ اناسى ءلاززات تەمىربەكقىزى ۇلى جايلى بىلاي دەدى: «مەنى بالامنىڭ دەنساۋلىعى مەن بولاشاعى قاتتى الاڭداتادى. ول تۋىلعالى وزگە بالالارمەن اسىر سالىپ ويناماي, دەنساۋلىعىنا بايلانىستى ءوز ورتاسىنان شەتتەپ بارا جاتقانى جانىمدى جەگىدەي جەيدى. قازىر ءوزى دە ەسەيىپ قالدى, دەنساۋلىعىن ويلاپ قاتتى الاڭدايدى. كەيدە ىشكى كۇيىنىشىن دە ءبىلدىرىپ قويادى. وندايدا جانىمدى قويارعا جەر تاپپاي قالامىن. ومىرگە قۇشتار بالامنىڭ اۋىرىپ جىلاعانىن كورگەندە ەش شارام قالمايدى... ەم جاساعان دارىگەرلەردىڭ ارقايسىسىنا ارينە, العىسىم شەكسىز. ءوز بىلىمدەرى مەن تاجىريبەلەرىن بالامدى ەمدەۋ جولىندا ەش اياعان جوق. اۋەلى اللا, سودان سوڭ ءدارىگەرلەردىڭ ارقاسىندا بالام العاشقى ءمۇشەلىنە قادام باستى. ەندىگى ءۇمىتىم – بالامدى ساۋىعىپ كەتۋىنە مۇمكىندىگى بار شەت ەلدە ەمدەتۋ بولىپ تۇر. وڭتۇستىك كورەياعا بارىپ ەم الىپ قايتۋىمىزعا سەپتىگىن تيگىزەر جاندار تابىلىپ جاتسا, الدىن الا انالىق العىسىمدى بىلدىرەمىن. اۋرۋمەن ارپالىسقان بالام جازىلىپ كەتسە, ءۇمىتىمنىڭ اقتالعانى, ماقساتىمنىڭ ورىندالعانى بولار ەدى».
ءومىر سۇرۋگە دەگەن قۇشتارلىعىمەن قوسا, انشىلىك تالانتى دا ايرىقشا سلامبەك ءشارىپتىڭ بار ارمانى, البەتتە, دەرتىنەن ايىعىپ, قۇرداستارىمەن قاتار شاپقىلاپ ءجۇرۋ. «جاقسىلىق جاساي الماساڭ, جاقسىلىق جاساۋعا سەبەپكەر بول» دەگەن. سلامبەكتەي جاس ورەننىڭ ارمانىنىڭ ورىندالۋىنا سەبەپكەر بولعىسى كەلەتىن جاندار كوپ بولسا ەكەن دەيسىڭ.
ميرا بايبەك,
«ەگەمەن قازاقستان»
الماتى