كەشە پرەمەر-مينيستر باقىتجان ساعىنتاەۆ ەكى كۇندىك جۇمىس ساپارىمەن شىعىس قازاقستان وبلىسىنا كەلدى. ايتا كەتەيىك, بۇل ۇكىمەت باسشىسىنىڭ پرەزيدەنت تاپسىرماسى بويىنشا ەلىمىزدىڭ وڭىرلەرىنە جاساپ وتىرعان العاشقى جۇمىس ساپارى.
ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنىڭ ايماقتاعى ءىرى ونەركاسىپتىك-يندۋستريادىق جانە اۋىل شارۋاشىلىعى كاسىپورىندارىندا, دەنساۋلىق ساقتاۋ جانە ءبىلىم بەرۋ نىساندارىندا جۇزەگە اسىرىلۋ بارىسىمەن تانىسۋ ماقساتىندا ارنايى كەلگەن ۇكىمەت باسشىسى جۇمىس ساپارىن اياگوز اۋدانىندا ورنالاسقان اقتوعاي كەن بايىتۋ كومبيناتىنان باستادى.
از ۋاقىتتىڭ ىشىندە الەمدەگى ءىرى كاسىپورىنداردىڭ بىرىنە اينالىپ ۇلگەرگەن اقتوعايدا قازىرگى ۋاقىتتا 1500 ادام ەڭبەك ەتەدى. 2016 جىلى توتىقتاندىرىلعان كەندى قايتا وڭدەۋ بويىنشا كەشەندە 18,1 مىڭ توننا كاتودتى مىس ءوندىرىلدى. كاسىپورىن جىل سوڭىنا قاراي ءوندىرىس كولەمىن 20 مىڭ تونناعا دەيىن جەتكىزۋدى جوسپارلاپ وتىر. كومبينات باسشىلىعى پرەمەر-مينيسترگە كەن الۋ تەحنولوگياسى جايىندا اڭگىمەلەپ جانە ونى بايىتۋ تەحنولوگياسىن تانىستىردى.
مەملەكەت باسشىسى بيىلعى جولداۋىندا مىندەتتەگەن جاڭا تەحنولوگيالاردى وندىرىسكە ەنگىزۋ باعىتىندا وڭىردە باتىل ءارى قارقىندى جۇمىس ىستەپ كەلە جاتقان مەكەمەلەردىڭ ءبىرى – «مايلى داقىلدار تاجىريبەلىك شارۋاشىلىعى» جشس. گلۋبوكوە اۋدانىندا ورنالاسقان شارۋاشىلىق تەك ءداندى داقىلدار وسىرۋمەن عانا شەكتەلمەي, مال شارۋاشىلىعىمەن دە شىنداپ شۇعىلدانىپ كەلەدى. بىلتىر وسى جەردە 600 باسقا ارنالعان تاۋارلى-ءسۇت فەرماسى جۇمىسىن باستاعان-دى. باقىتجان ساعىنتاەۆ زاماناۋي تەحنولوگيالارمەن جاراقتاندىرىلعان فەرماعا ارنايى ات باسىن تىرەپ, مۇنداعى سيىر ساۋ زالى, ەمدەۋ-سانيتارلىق بەكەتتەرى, مال ازىقتاندىرۋ تسەحى مەن مال ازىعى قويمالارىنىڭ جۇمىسىمەن تانىستى. شىعىس قازاقستان وبلىسى اكىمىنىڭ ورىنباسارى دۇيسەنعازى مۋسين ۇكىمەت باسشىسىنا وڭىردە ءسۇتتى مال شارۋاشىلىعىن دامىتۋدىڭ 2015-2017 جىلدارعا ارنالعان باعدارلاماسى جايىندا باياندادى. ونىڭ ايتۋىنشا, 2014 جىلى وبلىستا 12 ءسۇت قابىلداۋ بەكەتى بولعان, 2017 جىلدىڭ اياعىنا دەيىن بۇل كورسەتكىشتى 60-قا دەيىن جەتكىزۋ كوزدەلىپ وتىر.
پرەمەر-مينيستر بۇل كۇنى وبلىس ورتالىعى – وسكەمەندەگى ارماتۋرا جانە ءۇلبى مەتاللۋرگيا زاۋىتتارىندا دا بولدى. سوڭعى ءوندىرىس ورنىن ارالاۋ ناتيجەسى بويىنشا وبلىس اكىمى د.احمەتوۆ, «قازاتومونەركاسىپ» ۇاك» اق باسقارما توراعاسى ا.جۇماعاليەۆ جانە «ءۇمز» اق باسقارما توراعاسى يۋ.شاحۆوروستوۆ ۇكىمەت باسشىسىنىڭ قاتىسۋىمەن ءوڭىردىڭ الەۋمەتتىك-ەكونوميكالىق دامۋى اياسىنداعى ىنتىماقتاستىق تۋرالى ۇشجاقتى مەموراندۋمعا قول قويدى.
باقىتجان ساعىنتاەۆ وبلىس ورتالىعىنداعى كوز ميكروحيرۋرگياسى ەمحاناسىنا دا ارنايى بارىپ, اق جەلەڭدى ابزال جاندارمەن جۇزدەستى. وبلىس اكىمىنىڭ ورىنباسارى اسەم ءنۇسىپوۆا وسى جەردە ۇكىمەت باسشىسىنا وڭىردە مەديتسينا كادرلارىن قايتا دايارلاۋدىڭ ءۇش دەڭگەيلى جۇيەسىن تانىستىرىپ, بۇل باعدارلاما ارقىلى 3 جىلدىڭ ىشىندە ايماقتىڭ 50 دارىگەرىن شەت ەلدە تاجىريبەدەن وتكىزۋ جوسپارلانىپ وتىرعاندىعىن جەتكىزدى.
پرەمەر-مينيستر جۇمىس ساپارى بارىسىندا وبلىستىڭ كاسىپكەرلەرىمەن دوڭگەلەك ۇستەل باسىندا جۇزدەسىپ, مەملەكەتتىك ساتىپ الۋلار جۇيەسىن ودان ءارى دامىتۋدىڭ وزەكتى ماسەلەلەرىن تالقىلادى. جيىندا ۇكىمەت باسشىسىنا تولعاندىرعان جايلارىن جاسىرماي جەتكىزىپ, ساۋال جولداپ, ۇسىنىسىن ايتقان كاسىپكەرلەر كوپ بولدى. باقىتجان ساعىنتاەۆ بارلىعىن مۇقيات تىڭداپ, وزىمەن ەرە كەلگەن مينيسترلەرگە سول جەردە تۇيتكىلدى ماسەلەلەرگە وراي جاۋاپ بەرگىزدى.
– ەلباسىنىڭ كاسىپكەرلىك سالاسىنداعى كەدەرگىلەردى جويۋ جونىندەگى تاپسىرماسى بار. ۇكىمەت «اتامەكەن» پالاتاسىمەن بىرلەسە وتىرىپ, بۇل باعىتتا بىرقاتار شارالاردى قولعا الاتىن بولادى.
بۇگىنگى جۇمىس ساپارى بارىسىندا شىعىس قازاقستاندا مەملەكەت باسشىسىنىڭ بيىلعى جولداۋدا جۇكتەگەن ءۇشىنشى جاڭعىرۋدى جۇزەگە اسىرۋ ماقساتىندا اۋقىمدى جۇمىستاردىڭ جۇرگىزىلىپ جاتقانىنا كۋا بولدىم. اياگوزدەگى اقتوعاي كەن بايىتۋ كومبيناتىندا ءبىر مەزگىلدە 350 ادام جۇمىس ىستەيدى ەكەن. بۇل دەگەنىڭىز عاجاپ قوي. سوندىقتان جاڭا تەحنولوگيالاردى ءوندىرىسكە ەنگىزۋ باعىتىنداعى جۇمىستاردى ودان ءارى جانداندىرا تۇسكەنىمىز ابزال, – دەدى ۇكىمەت باسشىسى.
باقىتجان ساعىنتاەۆ وسكەمەندەگى جۇمىس ساپارىن د.سەرىكباەۆ اتىنداعى شىعىس قازاقستان مەملەكەتتىك ۋنيۆەرسيتەتىندە ءتۇيىندەدى. مۇندا وڭىردەگى ماڭدايالدى وقۋ ورنىنىڭ عىلىمي ازىرلەمەلەرىمەن تانىسىپ, ايماقتاعى ءىرى كاسىپورىنداردىڭ وكىلدەرىمەن جۇزدەستى.
پرەمەر-ءمينيستردىڭ جۇمىس ساپارى بۇگىن سەمەي قالاسىندا جالعاسادى.
ازامات قاسىم,
«ەگەمەن قازاقستان»
وسكەمەن