گەرمانيانىڭ گاللە قالاسىندا ءوتىپ جاتقان «Chemistry Cup» حالىقارالىق تۋرنيرىندە 9 قازاق بوكسشىسى جارتىلاي فينالعا شىقتى. بۇل تۋرالى قازاقستان بوكس فەدەراتسياسىنىڭ ءباسپاسوز قىزمەتى حابارلادى.
64 كەلى سالماق دارەجەسىندە جۇدىرىقتاساتىن بەكداۋلەت يبراگيموۆ جارىس جولىن ەرتە اياقتاۋعا ءماجبۇر بولدى. دەگەنمەن, بايراقتى باسەكەنى 9 سپورتشىمىز جالعاستىرادى.
ناقتىراق ايتار بولساق, جارتىلاي فينالدا ادىلبەك نيازىمبەتوۆ (81 كگ) ۋكراينالىق ماكسيم كوتسپەن, قايرات ەراليەۆ (56 كگ) امەريكالىق ديۋك راحانمەن, ابىلايحان ءجۇسىپوۆ (69 كگ) پولشالىق دەميان كيۆيورمەن, ەرجان جومارت (49 كگ) ەكۆادورلىق كارلوس كۋپومەن, ازامات يساقۇلوۆ (52 كگ) امەريكالىق گيلبەرت رەنتەريمەن, ادىلەت قۇرمەتوۆ (60 كگ) امەريكالىق دەلانتە دجونسونمەن, ءابىلحان امانقۇل (75 كگ) گەرمانيالىق سيلۆيو شيرليمەن, ۆاسيلي لەۆيت (91 كگ) ۋكراينالىق كونستانتين پينچۋكپەن, سونداي-اق اسا اۋىر سالماقتاعى قامشىبەك قوڭقاباەۆ نەمىس بوكسشىسى ماكس كەللەرمەن جۇدىرىقتاسادى.
ايتا كەتەيىك, جارتىلاي فينالدىڭ جەكپە-جەكتەرى بۇگىن, ياعني 16 ناۋرىزدا وتەدى. «Chemistry Cup» تۋرنيرىنە بارلىعى 13 ەلدەن 75 بوكسشى قاتىسىپ جاتىر. قازاقستان قۇراماسى تولىق قۇرامدا (ون بوكسشى) كەلدى.