قر پرەمەر-ءمينيسترى باقىتجان ساعىنتاەۆ شىعىس قازاقستان وبلىسىنا جۇمىس ساپارى بارىسىندا ءۇلبى مەتاللۋرگيا زاۋىتىنىڭ جۇمىسىمەن تانىستى, دەپ حابارلايدى primeminister.kz.
ب. ساعىنتاەۆقا سىيىمدىلىعى جوعارى كوندەنساتورلى تانتال ۇنتاقتار وندىرىلەتىن كورپۋس قىزمەتى تانىستىرىلدى, ولار جوعارى ساپالى راديو-ەلەكتروندى اپپاراتۋرانىڭ اجىراماس قۇراۋشىسى. بۇگىندە ءۇمز الەمگە تانىلعان ۋران جانە تانتال ونىمدەرىن شىعارۋشىلاردىڭ ءبىرى. كاسىپورىن «قازاتومونەركاسىپ» ۇلتتىق اتوم كومپانياسىنىڭ قۇرامىنا كىرەدى. زاۋىت ءونىمىن ەكسپورتتاۋشىلار رەسەي, اقش, قىتاي, جاپونيا, گەرمانيا, فرانتسيا, اۆستريا. كاسىپورىن يادرولىق وتىندى قايتا وڭدەۋمەن اينالىسادى, سيرەك كەزدەسەتىن مەتالداردى جانە شالا وتكىزگىش ماتەريالداردى, حيميا ونەركاسىبى ءۇشىن مينەرال شيكىزاتتارىن جانە تىڭايتقىشتاردى, باسقا دا نەگىزگى بەيورگانيكالىق حيميالىق زاتتاردى وندىرەدى.
نەگىزگى ءونىم تۇرلەرى بويىنشا وندىرىستىك قۋاتتىلىعى جىلىنا 6 900 توننانى قۇرايدى. كاسىپورىندى ودان ءارى جاڭعىرتۋ جۇمىستارى جۇرگىزىلۋدە. جاڭا تەحنولوگيالار ەنگىزىلىپ, يندۋستريالاندىرۋ بويىنشا مەملەكەتتىك باعدارلاما جۇزەگە اسىرىلىپ جاتقان ءۇلبى مەتاللۋرگيا زاۋىتى ايماقتاعى عانا ەمەس, ەلىمىزدەگى جاڭا ەكونوميكالىق ءوسىم ۇلگىسىنىڭ نەگىزىنە اينالا الادى. ءوندىرىس نىسانىن ارالاۋ ناتيجەسى بويىنشا شقو اكىمى د. احمەتوۆ, «قازاتومونەركاسىپ» ۇاك» اق باسقارما توراعاسى ا. جۇماعاليەۆ جانە «ءۇمز» اق باسقارما توراعاسى يۋ. شاحۆوروستوۆ قر پرەمەر-ءمينيسترىنىڭ قاتىسۋىمەن ءوڭىردىڭ الەۋمەتتىك-ەكونوميكالىق دامۋى اياسىنداعى ىنتىماقتاستىق تۋرالى ۇشجاقتى مەموراندۋمعا قول قويدى.