مەن امىرمەن س.كيروۆ اتىنداعى قازاق مەملەكەتتىك ۋنيۆەرسيتەتىنىڭ قابىرعاسىندا تانىسقانمىن. ارالدىق جىگىتتەرمەن بىرگە جۇرەتىندىكتەن بىردەن تانىسىپ, اعالى-ءىنىلى بولىپ كەتتىك. تويعان قوزىداي تومپيعان باكەنە بويلى قارا بالا ماعان سالعان بويدا ۇنادى. ول ىنىلىك ىزەتتەن اۋمايتىن, الاڭعاسارلىق مىنەز كورسەتپەيتىن, جاس بولسا دا ءار ماسەلەگە وزىندىك ويى مەن كوزقاراسىن سول كەزدىڭ وزىندە اشىق ايتاتىن.
امىرمەن كەزدەسىپ, سويلەسكەن سايىن تاربيەلىلىكتىڭ, بىلۋگە, بىلىمگە قۇشتارلىلىعىن اڭعاراتىنبىز. شىنى كەرەك, ءبىرىنشى كۋرسقا جاڭا تۇسكەن ونىڭ كوپ نارسەدەن حاباردارلىعى دا اڭعارىلىپ تۇراتىن. اسىرەسە, سپورت سالاسىنا كەلگەندە شەشىلىپ جۇرە بەرەتىن. ونىڭ ءوزى تاڭداعان ماماندىعىنا دەگەن تالابىن, ومىرگە دەگەن كوزقاراسىن اڭعارىپ, سۇيسىنەتىنبىز. ءامىر قىسقا عانا عۇمىر كەشسە دە, ءوزىن ادامگەرشىلىگى مول ازامات, قالامى جۇيرىك جۋرناليست رەتىندە تانىتىپ كەتتى. ول 1959 جىلى قىزىلوردا وبلىسى, ارال اۋدانى, قامىستىباس اۋىلىندا دۇنيەگە كەلدى. اكەسى ابدۋللاعات وڭىرگە بەلگىلى ۇستاز, شەشەسى ءاميدا باۋىرىنان ورگەن بالالارىنىڭ تاربيەلى بولۋىن تىلەگەن اياۋلى انا, كەيىنگى نەمەرەلەرىنە اسىل اجە. تالاپتى جاس مەكتەپ بىتىرگەن بويدا سول كەزدەگى س.كيروۆ اتىنداعى قازاق مەملەكەتتىك ۋنيۆەرسيتى جۋرناليستيكا فاكۋلتەتىنە وقۋعا ءتۇستى. وسى جوعارى وقۋ ورنىن جاقسى تامامداعان ءامىر جۋرناليستىك ەڭبەك جولىن وكتيابر (قازىرگى مۇعالجار) اۋداندىق «وكتيابر تۋى» گازەتىندە تىلشىلىكتەن باستادى. كەيىن وسى گازەتتە رەداكتوردىڭ ورىنباسارى, وبلىستىق «كوممۋنيزم جولى» گازەتىندە ءبولىم مەڭگەرۋشىسى بولدى.
مىنە, وسى كەزدە ەكەۋمىزدىڭ جولىمىز تاعى دا توقايلاستى. ءبىز وسى ۇجىمدا اعالى-ءىنىلى بولىپ, تۇسىنىستىكپەن ەڭبەك ەتتىك. تابيعاتىنان بيازى ءامىر ۇجىمعا ەتەنە ءسىڭىسىپ, ارىپتەستەرىن تۋعانىنداي كورىپ كەتتى دەسەم ارتىق ايتقاندىق بولماس. سوندىقتان دا بولار, ۇجىمداعى اعا-اپالارىنا سىيلى, قۇرمەتتى بولدى.
ءبىز ونى 1986 جىلى رەسپۋبليكالىق «لەنينشىل جاس» گازەتىنىڭ اقتوبە, ورال جانە تورعاي وبلىستارىنداعى مەنشىكتى ءتىلشىسى قىزمەتىنە قيماي شىعارىپ سالعانىمىز دا ەسىمىزدە. جۋرناليستىك قالامى توسەلگەن جاس كوپ ۇزاماي 1990 جىلى رەسپۋبليكالىق «سوتسياليستىك قازاقستان» (قازىرگى «ەگەمەن قازاقستان») گازەتىنىڭ اقتوبە وبلىسى بويىنشا مەنشىكتى ءتىلشىسى بولىپ تاعايىندالدى. مەنشىكتى ءتىلشىنىڭ تىنىمسىز تىرشىلىگىندە دە قامشى سالدىرماي ەڭبەك ەتكەن ءامىر ءىنىمىز ءوڭىردىڭ تىنىس-تىرشىلىگىن جان-جاقتى كورسەتىپ قانا قويماي, وزەكتى ماسەلەلەردى كوتەردى. ونىڭ قالامىنان شىققان ماتەريالدارى قالىڭ وقىرماننىڭ كوڭىلىنەن شىقتى, ءوزىنىڭ ابىرويى اسىپ, بەدەلى كوتەرىلدى.
2004 جىلى وبلىستىق «اقتوبە» گازەتىنە باس رەداكتور بولىپ كەلگەندە ۇجىمنىڭ جىلى قارسى العانى كۇنى كەشەگىدەي ەسىمىزدە. ول كەلە وبلىستىق باسىلىمنىڭ بۇرىننان قالىپتاسقان ءداستۇرىن ادەمى جالعاستىرا وتىرىپ, وزىندىك قولتاڭباسىن دا ايقىن كورسەتتى. كوپتەن كوكەيدە جۇرگەن ويلارىن جۇزەگە اسىرۋ ءۇشىن ق.جۇبانوۆ اتىنداعى اقتوبە مەملەكەتتىك ۋنيۆەرسيتەتىنە وقىتۋشىلىق قىزمەتكە اۋىستى. الايدا, ول عىلىمي ىزدەنىستە جۇرسە دە جۋرناليستيكادان قول ۇزگەن جوق. وقىتۋشىلىق قىزمەتتىڭ قاربالاسىمەن, عىلىمي ىزدەنىستىڭ شارۋاسىمەن جۇرگەننىڭ وزىندە «نۇر-استانا» گازەتىنىڭ مەنشىكتى ءتىلشىسى قىزمەتىن قوسا اتقاردى. مۇنىڭ ءوزى ونىڭ ەڭبەكقورلىعىن, جۋرناليستيكاعا بەرىلگەندىگىنىڭ ايقىن ايعاعى دەر ەدىك. قاي تاقىرىپقا قالام تارتسا دا ۇلكەن دايىندىقپەن باراتىن ءامىر ورالبايدىڭ ازاماتتىق جانە كاسىبي ۇستانىمى كىم-كىمگە دە ونەگە بولعانداي. ونىڭ ىزدەنىستى ەڭبەكتەرى لايىقتى باعاسىن الدى. ول – قازاقستان جۋرناليستەر وداعى سىيلىعىنىڭ لاۋرەاتى, تولەۋباي ىدىرىسوۆ اتىنداعى سىيلىقتىڭ, قازاقستان رەسپۋبليكاسى تاۋەلسىزدىگىنىڭ جانە قر كونستيتۋتسياسىنىڭ 10 جىلدىعى مەدالدارىنىڭ يەگەرى. ونىڭ قالامىنان شىققان «ءاليا», «قۇدايبەرگەن جۇبانوۆ», «قۇدايبەرگەن جۇبانوۆ – پۋبليتسيست» كىتاپتارى قالىڭ وقىرماننىڭ كوڭىلىنەن شىققان تۋىندىلار, قازاق عىلىمىنا قوسىلعان سۇبەلى ۇلەس دەۋگە ابدەن بولادى.
ءامىر ءىنىمىز قىسقا عۇمىرىندا جۋرناليستيكا سالاسىندا تەر توگىپ قانا قويماي, عىلىمعا دا ەتەنە ەڭبەك ەتتى. «قۇدايبەرگەن جۇبانوۆ – پۋبليتسيست» اتتى تاقىرىپتا كانديداتتىق ەڭبەگىن ءساتتى قورعادى. وسى عىلىمي ەڭبەگى تۋرالى قۇدايبەرگەن جۇبانوۆتىڭ قىزى, پەداگوگيكا عىلىمدارىنىڭ كانديداتى ءمۇسليما جۇبانوۆانىڭ جۇرەكجاردى لەبىزىن كەلتىرۋدى ءجون سانادىق.
– بۇل ەڭبەك – جۇبانوۆ تانۋ ىلىمىنە قوسىلعان سۇبەلى ۇلەس. ويتكەنى, ق.جۇبانوۆ تۋرالى بۇرىنعى زەرتتەۋلەر ونىڭ قازاق ءتىلى عىلىمىنا سىڭىرگەن ۇلەسى جايلى بولسا, ءا.ورالباي تۇڭعىش رەت ق.جۇبانوۆتى پۋبليتسيست دەپ تانىتىپ وتىر,– دەيدى ءمۇسليما جۇبانوۆا.
شاپقان اتتاي شاپشاڭ ۋاقىتتىڭ دوڭگەلەگىن توقتاتۋعا شاما جوق. دەگەنمەن, كوڭىلگە مەدەۋ تۇتاتىنىمىز, ارىپتەس ءىنىمىز ءامىردىڭ ارتىندا ۇرپاعى بار. كەلىنىمىز مەڭدىگۇل وبلىسقا بەلگىلى ۇستاز, №38 ورتا مەكتەپتىڭ ماتەماتيكا ءپانىنىڭ مۇعالىمى, نەمەرەلەرىنە اسىل اجە. اكە ونەگەسىمەن بيازى وسكەن گۇلنۇرى №21 ورتا مەكتەپتى «التىن بەلگىمەن» ءبىتىرىپ, مارات وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىنىڭ ستاماتولوگيا فاكۋلتەتىن ءتامامدادى. قازىر اتىراۋ وبلىستىق بالالار ءتىس اۋرۋحاناسىندا دارىگەر بولىپ ەڭبەك ەتەدى. جولداسى ەرلان قيتانوۆ اتىراۋ قالاسىنداعى №5546 اسكەري بولىمىندەگى وركەستردە مۋزىكانت. ال ءامىر ءىنىمىزدىڭ ۇلى ەرنۇر م.تىنىشپاەۆ اتىنداعى قازاق كولىك جانە كوممۋنيكاتسيا اكادەمياسىن ءبىتىردى. كەلىنىمىز اقمەرەي دە وتباسىنىڭ ىنتىماعىن ۇيىتىپ كەلەدى. قازىر №27 مەكتەپ-ليتسەيىندە جۇمىس ىستەيدى. قىزىنان ءىنجۋ اتتى جيەن, ۇلىنان نۇرالي دەگەن نەمەرە ءسۇيىپ وتىرعان مەڭدىگۇل كەلىنىمىز ءامىردىڭ شاڭىراعىن ۇستاپ, ۇرپاعىن ۇلاعاتتى تاربيەلەپ, ونىڭ ارتىندا قالعان ەڭبەكتەرىن قۇراستىرىپ, كىتاپ شىعارۋعا تالاپتانۋدا.
اقتوبەلىك قالامداستارى كوزدەن كەتسە دە, كوڭىلدەن كەتپەيتىن ارىپتەسىن ۇدايى ەسكە الىپ وتىرادى. جىل سايىن بەلگىلى جۋرناليست ءامىر ورالبايدى ەسكە الۋعا ارنالعان بۇقارالىق اقپارات قۇرالدارى اراسىنداعى فۋتبولدان وبلىستىق تۋرنير وتكىزۋدى داستۇرگە اينالدىرىپ كەلەدى. ءبىزدىڭ مىندەتىمىز – دۇنيەدەن وزعانمەن, ونەگەلى ءومىر سۇرگەن ارىپتەس ءىنىمىز ءامىردىڭ ارقاشان اقتوبەلىكتەردىڭ ەسىندە ەكەنىن جەتكىزۋ.
ساتىبالدى ءساۋىرباي,
جۋرناليست
اقتوبە وبلىسى