“قوس قانات قۇسقا بىتكەن ماعان بىتسە...” دەپ انگە قوسىپ ارمانداۋشى ەدى-اۋ قايران اتالارىمىز. ءوزىم قىرىق جىلداي جاقسى بىلەتىن جاعاتتاس دوس, جامالدى ازامات, اقمولا وبلىستىق تىلدەردى دامىتۋ باسقارماسىنىڭ باستىعى عوسمان تولەعۇلدى قوس قاناتتى ەمەس, كوپ قاناتتى جانداي كورەتىنىم بار. ونىڭ قاناتتارى – قاي قياعا سالسا دا كوتەرە سامعاتاتىن ادامي قاسيەتتەرى, ءبىلىمى مەن بىلىگى, اقىل-پاراساتىنىڭ مولدىعى, جان-جاقتى ءتۋابىتتى دارىندىلىعى دەر ەدىم.
جەتپىسىنشى جىلداردىڭ باسىندا زەرەندى اۋداندىق گازەتىنىڭ اتاعى كۇللى كوكشەتاۋ وبلىسى بويىنشا دۇركىرەپ تۇردى, سول كەزدەگى پارتيالىق تىلمەن ايتقاندا, “كادرلار ۇستاحاناسى” اتالىپ, زەرەندىلىك جۋرناليستەر باسقا اۋداندىق گازەتتەرگە رەداكتورلىققا, وبلىستىق گازەتتەر مەن وبلىستىق پارتيا كوميتەتىندەگى جاۋاپتى قىزمەتتەرگە جيىرەك بارىپ جاتاتىن. ءتىپتى, رەسپۋبليكالىق باسپا جونىندەگى مەمكوم توراعاسىنىڭ تىكەلەي كومەكشىسى بولىپ كەتكەندەرى دە بار. سول تۇستاعى ورىسشا گازەتتەگى بەلدى جۋرناليسىمىز ع.تولەعۇلدى دا بىرەسە اۋداندىق كومسومول كوميتەتى, بىرەسە اۋپارتكوم اتتاي قالاپ الىپ كەتىپ, ول بولسا, “ات اينالىپ قازىعىن تابادى” دەگەندەي, كوڭىلى سۇيگەن جۋرناليستىككە ءبارىبىر قويماستان قايتىپ ورالاتىن.
اۋەلدە ورىس تىلدىگە بالاپ ونشا جۇعىسا قويماعان عوسمانىمىز جاقىنىراق بىلىسە كەلە, بايقاسام, قازاقشاڭىزدىڭ ءتۇبىن ءتۇسىرىپ, بۇلبۇلشا سايرايدى ەكەن. ءازىلى ادەمى, قالجىڭى قازاقى. اشىق-جارقىن مىنەزىمەن ورىس جىگىتتەرى اراسىندا دا كەۋدەسىن بيىك ۇستاپ, جارىعىن شاشىپ, جارقىراپ-جايناپ جۇرگەنىنە ءبىزدىڭ دە ايىزىمىز قانىپ, مەرەيىمىز ءوسىپ وتىراتىن. جۋرناليستيكاداعى ۇلاعاتتى ۇستازىمىز, مىسال جانرىندا وزىندىك ورنى بار جازۋشى, رەداكتورىمىز بايمۇرات اعا ازناباەۆ باس بولىپ زەرەندى كولىنىڭ قاراعايلى جىنىس جاعاسىنداعى “ورمانشى ۇيىندە” ءاربىر 5 مامىردا جۋرناليستەر كۇنىن مارە-سارە اتاپ وتكەندە, عوسمان تولەعۇل ۇلىنىڭ دومبىرامەن ءان دە سالاتىن, كۇي دە شەرتەتىن ونەرىن كورىپ, ءىشىم ودان سايىن جىلي تۇسكەن-ءدى. بىراق ول مەن ويلاعاننان الدەقايدا تەرەڭىرەك بولىپ شىقتى. ولەڭ جازادى ەكەن. قازاقتىڭ ادەبيەتىنەن دە, تاريحىنان دا حابارى مول. اۋداندىق قازاقشا گازەتتە اپتا سايىن ادەبيەت بەتىن بەرىپ جۇرگەن مەن ع.تولەعۇلدىڭ ولەڭدەرىن سۇراپ الىپ جاريالايىن. ونىمەن قويماي, اڭگىمە دە جازادى ەكەن. “كونەباي سىنىقشى” دەگەن اڭگىمەسى كوكشەتاۋدىڭ وبلىستىق گازەتىنىڭ بايگەسىن يەمدەنگەنى ەسىمدە. ءبىر-ەكى اڭگىمەسى كەيىنىرەك “جۇلدىز” جۋرنالىندا دا جاريالاندى.
جەر-جەردە حالقىمىزدىڭ ايتىس ونەرى قايتادان جاندانىپ-جاڭعىرا باستاعان جىلداردا “قازاقستاننىڭ 40 جىلدىعى” كەڭشارىندا پارتكوم حاتشىسى بولىپ جۇرگەن عوسەكەڭ پارتيا قىزمەتكەرىمىن دەپ بالسىنبەي, ۇكىلى دومبىراسىن قولعا الىپ, ايتىسكەر اقىن رەتىندە دە بەلسەنىپ شىقتى. اۋداندا وزا شاۋىپ, وبلىستا ءۇش-ءتورت مارتە جۇلدەگەر تانىلىپ, رەسپۋبليكامىزعا تانىمال بايانعالي ءالىمجانوۆ, قۇدايبەرلى مىرزابەكوۆ سىندى ايتىس جامپوزدارىمەن ۇزەڭگى قاعىستىرا جىر تولعادى, ءسويتىپ, قازاعى ازداۋ زەرەندى مەن كوكشەتاۋدا ۇلتتىق مادەنيەتتىڭ وركەن جايۋىنا جەكە باسىنىڭ ۇلگىسىمەن دە دەم-تىنىس بەردى. ءبىرجان سال مەن اقان سەرىنىڭ ونەرىن جالعاعان سول ءبىر سەرىلىك داۋرەننىڭ بەلگىسىندەي, كوبەي سەيدەحانوۆ قول قويعان قازاقستان اقىن-جىرشىلار وداعىنىڭ №88 مۇشەلىك بيلەتى ءبىزدىڭ ۇقىپتى دوسىمىزدىڭ جەكە ارحيۆىندە ءالى ساقتاۋلى تۇر.
ۇكىلى دومبىرا دەگەننەن شىعادى-اۋ, كەيىن بىلدىك قوي, دومبىرا ع.تولەعۇلدىڭ بالا جاسىنان بەرگى جان سەرىگى ەكەن. ونىڭ جۇرەگىندەگى نازىك يىرىمدەردى تانىتار ءبىر عاجاپ جاعدايدى ايتا كەتسەك, 1969-1971 جىلدارى رەسەيدىڭ گوركي (قازىرگى نيجني نوۆگورود) جانە اباكان قالالارىندا اسكەري بورىشىن وتەي ءجۇرىپ تۋعان ەل-جۇرتىن ساعىنعان جاس جىگىت ءوز قولىمەن ويىپ شاۋىپ, ءاپ-ادەمى دومبىرا جاساپ الادى. قازاعىنىڭ اندەرىن ايتىپ, قاراكوزدەردى ماڭايىنا ءۇيىرىپ, ساعىنىش ماۋقىن سولاي باسادى. قاراپ وتىرساق, بۇل دا كەز كەلگەننىڭ قولىنان كەلە بەرەتىن ءىس ەمەس-اۋ. كەزىندە اقان سەرى تالاي ات شالدىرىپ, انگە بولەگەن ەسكى سابەرلى, جاڭاشا ءالجان ءالى كۇنگە دەيىن قايماعى بۇزىلماعان قازاق اۋىلى. سودان دا بولار, اكەسى تولەعۇل التىنشى سىنىپتان كەيىن بالاسىنىڭ “بولاشاعىن ويلاپ”, قولتىعىنا قوسىمشا قانات بايلاماقشى بولىپ ورىس مەكتەبىنە اۋىستىرسا دا, تالاپتى جەتكىن ءوزىنىڭ نەگىزگى قاناتى – قازاق ءتىلىن جوعالتپادى. تۇپتەپ كەلگەندە, ونىڭ باعىن اشقان دا ءوزىنىڭ انا ءتىلى.
ءومىر عوسماندى ەرتە ەسەيتتى. مەكتەپتى بىتىرە سالا ءوزى ۇناتىپ تۇسكەن شوقان ءۋاليحانوۆ اتىنداعى كوكشەتاۋ پەداگوگيكالىق ينستيتۋتىنىڭ فيزيكا-ماتەماتيكا فاكۋلتەتىندەگى وقۋىن ەكىنشى كۋرستا ۇزۋگە تۋرا كەلگەن. ويتكەنى, اكەسى قايتىس بولعان, اعاسى اسكەرگە كەتكەن. اناسى اۋىلدا جالعىز قالىپ ەدى. ەتى ءتىرى بوزبالا بوزباستانباي ەڭبەككە ارالاستى. اۋەلدە تراكتورشى, سوسىن باعانالاردىڭ باسىنا ورمەلەپ بايلانىس مونتەرى بولدى. تۋعان اۋىلىنا راديو, تەلەفون جەلىسىن تارتۋعا قاتىستى. ءوستىپ ءجۇرىپ ءومىر كوردى, تاجىريبە توقىدى. تەحنيكاعا ءالى كۇنگە دەيىن قۇمار دوسىمىزدىڭ سونداعى ءۇش اياقتى “يج-يۋپيتەر” موتوتسيكلىمەن زەرەندىنىڭ تاۋ-تاسىن شارلايتىنىمىز دا, كەڭشاردىڭ كارتوبىن تەرىسۋگە دۋمانداتىپ باراتىنىمىز دا وزىنشە ءبىر داۋرەن ەكەن. شاعالالى اۋىل شارۋاشىلىعى تەحنيكۋمىندا سىرتتاي وقىپ ءجۇرگەندە بولاشاق جارى, بۇل كۇندە ءتاتتى نەمەرە-جيەندەرىن سۇيگىزىپ وتىرعان ەكى قىز, ءبىر ۇلىنىڭ اناسى كۇلزاعيلامەن تانىستى. سونداعى اۋداندىق گازەت ۇجىمى زەرەندىدەن ءالجان اۋىلىنا عوسمان تولەعۇل ۇلىنىڭ ۇيلەنۋ تويىنا جۇك ءماشينەسىمەن بارىپ, ايلى تۇندە اۋەلەتە ءان شىرقاپ قايتقانىمىز استە ەستەن كەتەر مە. سونىڭ الدىندا پەتيا فيدچەنكونى ۇيلەندىرگەنبىز. ع.تولەعۇلدان كەيىنگى كەزەك بىزگە كەلگەن.
ورىسشادان ەشكىمگە دە وڭايلىقپەن دەس بەرمەس دوسىمنىڭ باعىن اشقان قازاق ءتىلى دەۋىمىزدىڭ سەبەبى دە جوق ەمەس. 1991 جىلى كومپارتيا قۇلار شاقتا پارتكوم حاتشىسى تولەعۇلوۆ جولداستى جەبەۋشى قاناتىمەن كوتەرىپ الىپ ءبولىم مەڭگەرۋشىلىك قىزمەتىن ۇسىنعان وزگە ەمەس, وبلىستىق قازاق ءتىلدى “كوكشەتاۋ” گازەتى بولاتىن. وسىدان باستاپ ونىڭ دارىن-قابىلەتى بارلىق قىرىنان جارقىراپ كورىنە باستادى. ۇيىمداستىرۋشىلىق دەيسىز بە-اۋ. شىعارماشىلىق دەيسىز بە-اۋ. قايسىسىنان بولسىن قامشى سالعىزبادى. بۇدان كەيىنگى جيىرما جىلدىق ەڭبەك جولى وبلىس كولەمىندەگى جاۋاپتى قىزمەتتەرمەن تىكەلەي بايلانىستى. ال 2004 جىلدىڭ ساۋىرىنەن ءدال بۇگىنگى تاڭعا دەيىن وبلىستىق تىلدەردى دامىتۋ باسقارماسىن اسا ءبىر بايىپتىلىقپەن باسقارىپ كەلەدى.
البەتتە, ءبىز قازاق ءتىلدى “كوكشەتاۋ” گازەتى عوسمان تولەعۇل ۇلىن كوتەردى دەگەن ءسوزدى استە دە مانساپ تۇرعىسىنان ايتىپ تۇرعان جوقپىز. “كوكشەتاۋ” ونىڭ ازاماتتىق تولىسۋ, شىعارماشىلىق دارىنىن اشۋ باسپالداقتارىنا جول اشتى. ەڭ باستىسى سول, بيلىكتىڭ ءبىر شەتىندە جۇرگەن ول حالقىنىڭ كادەسىنە جاراي ءبىلدى, ۇلتتىڭ مۇرات-مۇددەسىنە قارلىعاش قاناتىمەن سۋ تامىزعانداي سەپتەسۋدەن جازبادى. اسىرەسە ەگەمەندىكتىڭ العاشقى جىلدارىندا ءتىل مايدانىندا ورىس تىلدىلەر دەيتىندەردىڭ وكىلدەرىمەن تولىپ جاتقان ماسەلەلەر بويىنشا تالاي-تالاي پىكىرتالاستار مەن ايتىس-تارتىستاردى باستان وتكەردى. مىنەزى ورنىقتى, ءبىلىمى تەرەڭ, ومىرلىك تاجىريبەسى باي, پاراساتى مول ع.تولەعۇل سونداي سىندارلى شاقتاردا ۇستانىمىنا بەرىك بولدى, ءوزىنىڭ نانىم-كوزقاراسىن قورعاۋدا تاباندى كۇرەسكەرلىكپەن قاتار, جان دۇنيەسىنىڭ زور مادەنيەتىن دە تانىتتى.
وسى رەتتە ءبىزدىڭ دوسىمىز تۋرالى قارسى مايداننىڭ قاس-قاباعىن ءبىلۋ ارتىق بولماس ەدى. كوكشەتاۋدا شىعاتىن تاۋەلسىز “كۋرس” گازەتىندە بەلگىلى جازۋشى, پۋبليتسيست ۆيكتور تەرەششۋك بىلاي دەپ جازدى: “...تىلدەر پروبلەماسى ءجونىندە باستى قارسىلاستار وبلىستىق تىلدەردى دامىتۋ باسقارماسىنىڭ باستىعى عوسمان تولەعۇل ۇلى جانە مەن بولىپ شىقتىق. قارسىلاسىم, بىلايشا ايتقاندا, بىردەن شابۋىلعا كوشىپ, وبلىس حالقىن مەملەكەتتىك ءتىلدى ۇيرەنۋگە تەزىرەك ءارى بەلسەندىرەك يكەمدەۋ ورايىنداعى ويلارىن ورتاعا سالدى. مەن بولسام ايدان انىق نارسەنى جوققا شىعارماي, ايتكەنمەن, وسى قاربالاستا ورىس ءتىلىنىڭ شەتكە قاعىلماۋىن ىزەرلەدىم. سول پىكىرتالاس بىرنەشە ساعاتقا سوزىلدى. كەيىننەن گازەت بەتىندە جالعاستى. پىكىرتالاس ەركىن, اشىق, تارتىسقا تولى, ءتىپتى, كەي رەتتەردە قىتىمىر, قاتاڭىراق بولسا دا, وعان قاتىسۋدان ءوز باسىم شىنايى ءلاززات الدىم. ماسەلەنىڭ ماڭىزدىلىعىنان عانا ەمەس. ونىڭ تاعى ءبىر سەبەبى سول, قارسىلاسىمنىڭ انشەيىن سىقيعان شەنەۋنىك ەمەس, ءوز ىسىنە ادال بەرىلگەن, ورەسى بيىك كاسىپقوي ەكەنىن ءبىردەن سەزىندىم. وي ءوربىتۋشى اسا مادەنيەتتى, زيالى ادام ەدى. پىكىرتالاستىڭ ەڭ ءبىر شيەلەنىسكەن تۇستارىنىڭ وزىندە دە قارسىلاسىم سابىرلى, بايسالدى قالپىنان جاڭىلمادى, بىردە-ءبىر نامىسقا تيەرلىك اۋىر ءسوز ايتپادى. ول تەك بالتالاسا بۇزىلماس “تەمىر” دالەلدەردى كەلتىردى دە وتىردى. سونىسىمەن ءبارىمىزدى ۇستامدىلىققا, مادەنيەتىمىزدىڭ ۇلكەن سالاسى – ءتىل تۋرالى ايتىسقاندا ۇلكەن مادەنيەتتىلىككە شاقىرعانداي بولدى. شىنىن ايتقاندا, وسى پىكىرتالاستى جانە سونداعى قارسىلاسىمدى ءالى كۇنگە دەيىن ءبىر جىلى سەزىممەن ەسكە الامىن. سول جەكپە-جەكتەن كەيىن عوسمان تولەعۇل ۇلى ەكەۋمىز جولىققان سايىن قۇشاقتاسىپ امانداسپاي وتكەن جەرىمىز جوق. مۇنداي ۇلكەن جۇرەكتى اداممەن باسقاشا بولۋى مۇمكىن دە ەمەس”.
مىنە, يدەيالىق قارسىلاسى بولعان ورىس ازاماتىنىڭ ءبىزدىڭ دوسقا بەرگەن باعاسى. ءوزىن مەملەكەتتىك قىزمەتتەگى قازاق ۇلتىنىڭ وكىلى رەتىندە وزگەلەرگە سىيلاتا ءبىلۋى, حالقىنىڭ مۇددەسىن كوزدەگەن ءوز پىكىرىمەن ساناستىرۋى, ۇياتقا قالدىرماس بيىك ورەدەن كورىنۋى ع.تولەعۇلدىڭ قاي دەڭگەيدەگى قايراتكەر ءۇشىن دە ۇلگى بولارلىق ونەگەسى دەر ەدىك. جانە دە وسىنداي ءجايتتەردىڭ ءبارى عوسمان تولەعۇل ۇلىنىڭ مەملەكەتتىك قىزمەتتەگى شەنەۋنىك شەكپەنىنە استە سىيماس قايراتكەرلىك تۇلعاسى مەن ازاماتتىق ءبىتىم-بولمىسىن اجارلاندىرىپ, ايشىقتاي تۇسەتىندەي. “مادەنيەت قايراتكەرى” جانە “قازاق ءتىلىنىڭ جاناشىرى” توسبەلگىلەرىمەن ماراپاتتالۋى وسى ءسوزىمىزدىڭ جانە ءبىر ايعاعى.
ماقالامىزدىڭ سوڭىنا قاراي سارى مايداي ساقتاپ وتىرعان تاعى ءبىر جايعا كەلەر بولساق, الاشتىڭ الىپ جازۋشىسى مۇحتار ماعاۋين: “الىس كوكشەتاۋدا جاتقان زيالى ازامات عوسمان...” دەپ ءىلتيفاتىنا الىپتى. تالابى قاتتى, تالعامپاز مۇحاڭنىڭ اۋزىنان سيرەك شىعاتىن لەبىز. ءتىپتى, اۋىزشا دا ەمەس, شىعارمالار جيناعىنىڭ 11 تومىنىڭ 431-بەتىندە تاسقا باسىپ تۇرىپ ايتقان. اتاقتى جازۋشىنىڭ العىسىنا عوسمان تولەعۇل ۇلى ەلدى ەلەڭ ەتكىزگەن “قازاق تاريحىنىڭ الىپپەسى” كىتابىن ورىس تىلىنە تاماشا تارجىمەلەپ شىققانى ءۇشىن بولەنىپ ەدى. قازاقشا قانىق بوياۋدى, استارلى دا اجارلى ماعىنانى ورىسشا ايقىن تاڭبالاپ جەتكىزە بىلگەن تىلەكتەس اۋدارماشى ءوز ىقىلاسىمەن قۇداي بەرىپ تابىلا كەتكەنىنە مۇحاڭنىڭ مەيىرلەنە قۋانعانىنا سول كەزدە ول كىسىنىڭ قاسىندا “جۇلدىز” جۋرنالىندا جۇرگەن ءوزىمىز دە كۋا بولعانبىز.
قانشاما جاۋاپتى قىزمەتتەر اتقارا جۇرگەندەگى ع. تولەعۇلدىڭ ءبىر دارا قاسيەتى – شىعارماشىلىقتان ءبىر ساتكە قول ۇزگەن ەمەس. قازاقشا, ورىسشا بىردەي جازادى. بۇل كۇنگە دەيىن قازاقشادان ورىسشاعا اۋدارعان ۇلكەندى-كىشىلى وننان اسا, ورىسشادان قازاقشاعا قوتارعان بەس كىتابى جارىق كوردى. رەداكتورلىق ەتكەن, قۇراستىرعان كىتاپتارىنىڭ بىرقانشالىعى دا ءبىراز سىردان حاباردار ەتكەندەي. ول كىمدەردى اۋداردى دەسەك, مەملەكەتتىك سىيلىقتىڭ لاۋرەاتتارى قويشىعارا سالعارا ۇلى, الىبەك اسقار, دۇكەنباي دوسجان ەسىمدەرىنىڭ الدان شىعۋىنىڭ ءوزى-اق ەڭبەكتىڭ تولىمدىلىعىن تانىتقانداي. سونىمەن بىرگە, كوكشەتاۋلىق قالامگەر, مارقۇم نۇرمۇحانبەت ىسقاقوۆتىڭ “كەنەسارى حاننىڭ جورىقتى جولدارىمەن” اتتى وتە قۇندى تاريحي-تانىمدىق كىتابىن ورىسشالاۋى دا ونىڭ ۇلتتىق رۋحقا ادالدىعىن جانە ءبىر پاش ەتكەندەي.
ء“الى جەتكەن الىپ تا جىعادى, شالىپ تا جىعادى” دەگەندەي, الەمدىك اقىل-وي الىپتارىن قازاقشا سويلەتتى. بۇلاردىڭ ىشىندە ورىس عالىمى ك.تسيولكوۆسكي, اعىلشىن فيلوسوفى ب.راسسەل, الەمدىك مارقاسقالار روبەرت وۋەن, كارل كلاۋزەۆيتس, ارتۋر شوپەنگاۋەر بار. “الەمدىك ساياساتتانۋ انتولوگياسىنىڭ” سەگىزىنشى تومىن مۇزداي قىپ اۋدارىپ بەرگەنى ءۇشىن عوسمانعا بەلگىلى باسپاگەر اعامىز, تالعام-تالابى مۇحتار ماعاۋيننەن ارتىق بولماسا, كەم ەمەس نۇرماحان ورازبەكتىڭ دە ريزاشىلىعى مول كورىندى.
ع.تولەعۇل ايتادى: “جالپى, ورىس تىلىنە اۋدارۋداعى باستى ماقساتىم – ەگەمەندىكتىڭ العاشقى جىلدارىندا قاۋلاپ جارىق كورە باستاعان قازاق تاريحىن, ونىڭ بۇعان دەيىن بەيمالىم بولىپ كەلگەن اسا كوپ اقتاڭداقتارىن, قازاقي ءور رۋحتى ءتولتۋما مادەنيەتتى كورسەتەتىن تاماشا كىتاپتاردى ورىس ءتىلدى وقىرمانعا جەتكىزۋ بولدى. مۇنى ومىرلىك مۇراتىما بالادىم”. ولاي بولسا, ءبىزدىڭ دوسىمىز مۇراتىنا جەتتى دەپ ەسەپتەيمىز. 1991 جىلى كوكشەتاۋدا ابىلاي حاننىڭ 280 جىلدىعى وتكىزىلەيىن دەپ جاتقاندا وسىناۋ ۇلى تۇلعا تۋرالى كورنەكتى تاريحشى رامازان سۇلەيمەنوۆتىڭ كولەمدى ەڭبەگىن ورىس تىلىنە تەزىنەن تارجىمەلەپ, وبلىستىق “ستەپنوي ماياك” گازەتىنىڭ تابانى كۇرەكتەي ون ءنومىرىنە جاريالاتىپ ەدى. وسىلاي باستالعان ءومىرلىك مۇراتتىڭ باستاۋ-بۇلاعى بىرتە-بىرتە كەڭەيە بەرگەن. 2008 جىلعى قاراشانىڭ سوڭعى كۇندەرىندە “ەگەمەن قازاقستاندا” مەملەكەتتىك حاتشى قانات ساۋداباەۆتىڭ “ەلباسى” اتتى ايتۋلى ماقالاسى جارىق كوردى. كەلەسى كۇنى “كازاحستانسكايا پراۆدا” دۇيسەنبىگە قاراماستان ارنايى ءنومىر شىعارىپ, جاڭاعى ماقالانىڭ ورىسشاسىن “ليدەر ناتسي” دەگەن اتپەن ۇلكەن ەكى بەت ەتىپ بەردى. وسىنى سوناۋ كوكشەتاۋدا وتىرىپ ۇزاقتى كۇن ورىسشاعا اۋدارىپ, استاناعا “ەلەكتروندى پوشتامەن” جەتكىزىپ بەرگەن دە عوسمان تولەعۇل ۇلى بولاتىن. ابىلاي حاننان تارتىپ, كەنەسارى حانعا جالعاعان, ودان قازاقتىڭ ارعى-بەرگى تاريحىن اداقتاي كەلىپ, بۇگىنگى ەل پرەزيدەنتىنىڭ تولاعاي ەڭبەگىن ورىس ءتىلدى وقىرمانعا جارقىراتىپ جەتكىزۋگە سەپتەسكەن, ءبىزدىڭ عانا ەمەس, “ەگەمەن قازاقستاننىڭ” دا ابزال دوسى, ءتىلەكتەسى ع.تولەعۇلدى ءوزىنىڭ وسىنداي ءومىرشەڭ قاناتتارى بيىك مۇراتتارىنا سامعاتا بەرگەي.
قورعانبەك امانجول.