شۆەتسيانىڭ بۋروس قالاسىندا ءوتىپ جاتقان Golden Girl تۋرنيرىندە قازاقستاننىڭ بوكسشى قىزدارى 3 التىن, 2 كۇمىس جانە 6 قولا مەدال الدى, دەپ حابارلايدى قازاقستان بوكس فەدەراتسياسى.
تۋرنيردە العاشقى التىنعا 80 كەلىگە دەيىنگى سالماق دارەجەسىندەگى ەلدانا ءتالىپوۆا يە بولدى. جاس بوكسشى فينالدا يرلانديالىق لورەن راياندى ءبىرىنشى راۋندتىڭ 90-سەكۋندىندا-اق تورەشىلەر شەشىمىمەن جەڭگەن بولاتىن.
جاسوسپىرىمدەر اراسىندا الەم چەمپيونى 16 جاستاعى نادەجدا ريابەتس (69 كەلى) اقتىق سىندا كانادالىق چارلي كاۆانونى جەڭدى. ال تۋرنيردە ءۇشىنشى التىنعا الماتى وبلىسىنان شىققان 16 جاستاعى گۇزاليا سادىقوۆا يە بولدى. فينالدا ول تاعى ءبىر جەرلىسىمىز سالتانات ەستاەۆامەن سىنعا ءتۇستى.
ريابەتس پەن سادىقوۆا 2018 جىلدىڭ قىركۇيەگىندە بۋەنوس-ايرەستە وتەتىن جاسوسپىرىمدەر اراسىنداعى وليمپيادا ويىندارىنا قاتىسۋعا ۇمىتكەر بولىپ سانالادى.
ايتا كەتەيىك, شۆەتسيانىڭ بۋروس قالاسىندا ءوتىپ جاتقان جارىسقا الەمنىڭ 22 ەلىنەن 254 سپورتشى قاتىستى.