شىمكەنت قالاسىنىڭ اكىمى عابيدوللا ءابدىراحىموۆ 2016 جىلى اتقارىلعان جۇمىستار جونىندە حالىق الدىندا ەسەپ بەردى. جيىنعا ءوڭىر باسشىسى جانسەيىت تۇيمەباەۆ قاتىستى. بۇل تۋرالى وقو اكىمىنىڭ ءباسپاسوز قىزمەتى حابارلادى.
شاھار باسشىسى اتاپ وتكەندەي, وتكەن جىلى «نۇرلى جول», «يندۋستريالدى-يننوۆاتسيالىق دامۋ», «وڭىرلەردى دامىتۋ» باعدارلامالارىن ىسكە اسىرۋ ارقىلى ءبىرشاما جاقسى كورسەتكىشتەرگە قول جەتكىزىلدى. ماسەلەن, ونەركاسىپ ءونىمىنىڭ كولەمى 327 ملرد.تەڭگەنى قۇراپ, 2015 جىلمەن سالىستىرعاندا 4 پايىزعا, اۋىلشارۋاشىلىق ءونىمىنىڭ كولەمى 3 پايىزعا, قۇرىلىس جۇمىستارىنىڭ كولەمى 23 پايىزعا, پايدالانۋعا بەرىلگەن تۇرعىن ءۇي 14 پايىزعا ءوستى. «نۇرلى جول» جانە «وڭىرلەردى دامىتۋ» باعدارلامالارى شەڭبەرىندە 3 777 پاتەرلى 64 كوپ قاباتتى تۇرعىن ءۇيدىڭ قۇرىلىسى جۇرگىزىلدى. ونىڭ ىشىندە, ەسەپتى جىلى 90 پاتەرلى 2 كوممۋنالدىق, 216 پاتەرلى جاس وتباسىلارعا ارنالعان, «قازاقستاننىڭ يپوتەكالىق كومپانياسى» جانە «بايتەرەك development» ارقىلى 996 پاتەرلى 32 تۇرعىن ءۇي پايدالانۋعا بەرىلدى. ناتيجەسىندە, 1 302 وتباسى تۇرعىن ۇيمەن, 35 وتباسى جاتاقحانامەن قامتاسىز ەتىلدى.
قالالىق بيۋدجەت 2016 جىلى 111 ملرد. تەڭگەنى قۇراپ, 2015 جىلمەن سالىستىرعاندا 28 ملرد. تەڭگەگە ۇلعايدى. قارجىنىڭ باسىم بولىگى, قالانىڭ ينجەنەرلىك جۇيەلەرىنە, وسى سالانى دامىتۋعا باعىتتالعان. 52 جوبانىڭ قۇرىلىسىنا 20 ملرد.تەڭگە قارجى بولىنسە, 27-ءسى پايدالانۋعا بەرىلدى. ترانسپورت سالاسىنا وتكەن جىلى 13 ملرد.تەڭگە قارجى باعىتتالىپ, 2015 جىلعا قاراعاندا قارجى كولەمى 6,7 ملرد.تەڭگەگە ۇلعايدى. قارجىنى ۇلعايتۋ ارقىلى بىرقاتار ماڭىزدى جوبالاردىڭ قۇرىلىسى جۇرگىزىلدى. ءتۋريزمدى دامىتۋ ماقساتىندا قالادا بىرقاتار جوبالار ىسكە اسىرىلدى.
اتاپ ايتقاندا, شىمكەنتتىڭ برەندىن قالىپتاستىرۋ ءۇشىن قالانىڭ لوگوتيپى قىزعالداق بەينەسىنە وزگەرتىلدى. وتباسىلىق دەمالۋعا ارنالعان «تۇلپار» كولى ماڭىندا جەكە ينۆەستور ەسەبىنەن «جايلاۋ كول» ويىن ساۋىق ورتالىعى اشىلدى. وندا, بيىكتىگى 50 مەتر «Altyn Eye» اتتى دوڭگەلەك شەڭبەر ورناتىلدى. اۋىل شارۋشىلىعى سالاسى. قالادا 4 مىڭعا جۋىق شارۋا قوجالىقتارى, 200-دەن استام جاۋاپكەرشىلىگى شەكتەۋلى سەرىكتەستىكتەر جۇمىس جاسايدى. بۇل سالانى قولداۋ ماقساتىندا «اگروبيزنەس 2020» باعدارلاماسى جۇزەگە اسىرىلۋدا. باعدارلاما شەڭبەرىندە كولەمى 11 گا قۇرايتىن جىلىجايلار اشىلدى (التىنتوبە, قايناربۇلاق, سايرام, جاڭاتالاپ, مارتوبە, اقجار تۇرعىن الابتارىندا). ونىڭ ىشىندە 5,5 گا ونەركاسىپتىك جىلىجاي. 200 گەكتار جەرگە تامشىلاتىپ سۋارۋ ءادىسى ەندىرىلدى. قارجى ۇيىمدارىمەن 825 ملن.تەڭگەگە 130 بيزنەس جوبا قارجىلاندىرىلدى. ءبىلىم ساپاسىن جاقسارتۋ باعىتىندا وقۋشىلار ۇلگەرىمىن اتا-اناسى باقىلاۋ ماقساتىندا 29 مەكتەپكە پيلوتتىق جوبا رەتىندە ەلەكتروندىق باقىلاۋ جۇيەسى ەنگىزىلدى.
ناقتىراق ايتساق, اتا-اناعا ۇيالى تەلەفون ارقىلى بالاسىنىڭ ۇلگەرىمى تۋرالى سمس نەمەسە ەلەكتروندىق پوشتا ارقىلى حابارلاما بەرىلىپ وتىرادى. سپورتشىلارىمىزعا جاعداي جاساۋ ءۇشىن وتكەن جىلى №12-ءشى سپورت مەكتەبى قايتا جاڭعىرتىلىپ, پايدالانۋعا بەرىلدى. بوكستان №5-ءشى سپورت مەكتەبىندە (فوك) قوسىمشا قۇرىلىس جۇمىستارى باستالىپ, وسى جىلدىڭ جازىندا قايتا ىسكە قوسىلادى. سالاۋاتتى ءومىر سالتىن ناسيحاتتاۋ ءۇشىن دەمەۋشىلەردىڭ ەسەبىنەن 4 جەرگە «Streetworkout» سپورت الاڭشاسى, تۇركىستان كوشەسى بويىنان كروسسفيت ورتالىعى اشىلدى. «سامۇرىق-قازىنا» ۇلتتىق ءال-اۋقات قورى ارقىلى قالامىزدا استانا قالاسىنان كەيىنگى «ShymkentBike» جوباسى ىسكە اسىرىلدى.