وبلىستا انا مەن بالانى قورعاۋ باعىتىندا جۇيەلى جۇمىستار جۇرگىزىلۋدە. بۇعان دەيىن اقتوبە قالاسىندا انالار مەن جاسوسپىرىمدەر ءۇيى جۇمىس ىستەيتىن ەدى. ەل تاۋەلسىزدىگىنىڭ 25 جىلدىعى قارساڭىندا «مەيىرىم» جاستاردى الەۋمەتتىك بەيىمدەۋ ورتالىعى پايدالانۋعا بەرىلسە, جاڭا جىل قارساڭىندا ايەلدەر مەن بالالارعا ارنالعان داعدارىس ورتالىعى اشىلدى.
جوبانى «اق-رۋنو» جشس مەملەكەت-جەكەمەنشىك ارىپتەستىگى اياسىندا جۇزەگە اسىردى. بۇل ماقساتقا قامقورشىلىق كەڭەس وكىلدەرى مەن مەتسەنات اسقاربەك مامىرباەۆ 300 ميلليون تەڭگە ءبولدى. كاسىپكەر مۇنىڭ الدىندا سپورت كەشەنىن پايدالانۋعا بەرىپ, اقتوبەلىكتەردىڭ شىنايى العىسىنا بولەنگەن بولاتىن. بۇل جولى اۋماعى 2980 شارشى مەتر بولاتىن ءۇش قاباتتى ءۇيدىڭ قۇرىلىسىن 2016 جىلعى قازان ايىندا اياقتاپ, جاڭا جىل قارساڭىندا تاعدىردان اۋىرتپالىق كورگەن انالار مەن بالالاردىڭ يگىلىگىنە ۇسىندى.
ورتالىقتا 60 ادامعا تۇراقتى جۇمىس ورنى اشىلدى. ولاردىڭ اراسىندا پسيحولوگ, الەۋمەتتانۋشى, زاڭگەر, ەڭبەك نۇسقاۋشىسى سەكىلدى ماماندار بار. ولار الەۋمەتتىك-پسيحولوگيالىق بولىمدەردە جۇمىس جاساماق. مۇندا ءتارتىپ ماسەلەسىنە ەرەكشە كوڭىل بولىنگەن. ورتالىقتا كىر جۋ ورنى, سپورت زال, اسحانا جۇمىس ىستەيدى.
ەندى پسيحولوگيالىق-تۇرمىستىق زورلىققا تاپ بولعان, جاقىندارىنان ايىرىلعان ايەلدەر, مۇگەدەكتەر, جالعىزباستى جانە كامەلەت جاسقا تولماعان بالالارى بار انالار, ءۇيى ورتكە ورانعان وتباسىلار, بالالار ءۇيى مەن مەكتەپ-ينتەرناتتارىنىڭ تۇلەكتەرى, قيىن جاعدايعا تاپ بولعان ءجاسوسپىرىم قىزدار جانە باسقالار وسى جەردەن پانا تابادى.
وبلىس اكىمى ب.ساپارباەۆتىڭ ايتۋىنشا, داعدارىس ورتالىعىنا كەلۋگە تەك انالار مەن بالالار عانا ەمەس, سونىمەن قاتار, توتەنشە جاعدايلاردان زارداپ شەككەندەرگە دە مۇمكىندىك بار.
داعدارىس ورتالىعىنداعى بولمەلەر كەڭ دە جارىق. ءار بولمەدە ءتورت ادامنان ورنالاسادى. سۋ جاڭا جيھازدار قويىلعان. ءبىر سوزبەن ايتقاندا, ءومىر سۇرۋگە قاجەتتى بارلىق جاعداي جاسالعان.
ساتىبالدى ءساۋىرباي,
«ەگەمەن قازاقستان»
اقتوبە