ءال-فارابي اتىنداعى قازۇۋ الەمنىڭ ەڭ ەكولوگيالىق تازا توپ-200 ۋنيۆەرسيتەتى قاتارىنا ەندى. بۇل تۋرالى اتالعان وقۋ ورنىنىڭ ءباسپاسوز قىزمەتىنەن حابارلادى. بەلگىلى بۇكىلالەمدىك «UI Green Metric Ranking of World Universities - 2016» رەيتينگىسىنە قازۇۋ العاش رەت قاتىسىپ, مىقتىلار توبىنان لايىقتى ورىن الدى. الەمنىڭ ەڭ ەكولوگيالىق تازا توپ-200 ۋنيۆەرسيتەتى قاتارىنا ەنۋى - ۇلتتىق ۋنيۆەرسيتەتتىڭ «جاسىل دامۋداعى» جوعارى جەتىستىكتەرى مەن ۇلكەن مۇمكىندىكتەرىنىڭ دالەلى.
«UI Green Metric» رەيتينگى ادىستەمەسىندە مىناداي كورسەتكىشتەر ەسەپكە الىنادى: ەكولوگيا سالاسىنداعى ءبىلىم بەرۋ جانە عىلىمي قىزمەت, ەنەرگيا مەن سۋ رەسۋرستارىن ۇنەمدى قولدانۋ, تابيعاتتى ءتيىمدى پايدالانۋ, قالدىقتاردى ساقتاۋ جانە قايتا وڭدەۋ, ەكولوگيالىق تازا كولىك قولدانۋ, ستۋدەنتتىك كامپۋس تەرريتورياسىنداعى جاس كوشەتتەر اۋماعى جانە ت.ب. الەم ۋنيۆەرسيتەتتەرىنىڭ «UI Green Metric» «جاسىل» رەيتينگى جىل سايىن ءار ەلدەگى ۇزدىك جوو-نى انىقتايدى.
قازاقستاندىق جوو-لار ىشىندە ءال-فارابي اتىنداعى قازۇۋ - الەمنىڭ 200-توپ «جاسىل» ۋنيۆەرسيتەتى قاتارىنا ەنگەن جالعىز وقۋ ورداسى, بۇل جوو-نىڭ عىلىم مەن تەحنيكا جەتىستىكتەرىن كامپۋستىڭ ەنەرگوتيىمدى ستراتەگياسى مەن قالانىڭ ەكوجۇيەسىنە ينتەگراتسيالاۋ بويىنشا بەلسەندى جۇمىسىن كورسەتەدى. ۋنيۆەرسيتەت حالىقارالىق دەڭگەيدەگى باستامالارعا زياتكەرلىك ۇلەس قوسۋدا كوشباسشى بولىپ تابىلادى جانە جاھاندىق ماسەلەلەردى شەشۋگە ارنالعان اۋقىمدى جوبالاردى بەلسەندى جۇزەگە اسىرۋدا. وسىلايشا, قازۇۋ قر پرەزيدەنتى نۇرسۇلتان نازارباەۆتىڭ «جاسىل كوپىر» جانە «G-Global» باستامالارىنىڭ ەنەرگوەكولوگيالىق ستراتەگياسىنا قولداۋ رەتىندە تمد ۋنيۆەرسيتەتتەرى ىشىندە جالعىز «RIO+20» الەمدىك سامميتىندە سەكتسيا اشۋ جوعارى مارتەبەسىنە يە بولدى.