قاراعاندى وبلىسىنداعى شاحان كەنتىندە بەس قاباتتى تۇرعىن ءۇيدىڭ ءبىر كىرەبەرىسى تۇگەلدەي وپىرىلىپ قالدى. قازىرگى ۋاقىتتا قۇتقارۋشى توپ بەس ادامدى, ونىڭ ىشىندە ەكى بالانى قيراندىنىڭ استىنان امان الىپ شىقتى.
سوڭعى دەرەكتەر بويىنشا, اپات سالدارىنان توعىز ادام قازا تاپقان. مارقۇمداردىڭ ءتىزىمى كەيبىر سايتتاردا جاريا بولىپ ۇلگەرگەنمەن, وبلىس اكىمىنىڭ ءباسپاسوز قىزمەتى بۇل اقپاراتتىڭ رەسمي ەمەستىگىن العا تارتىپ, جاڭساق دەرەكتەردىڭ بولۋى مۇمكىن ەكەندىگىن ەسكەرتتى.
اپات بولعان جەردە قۇتقارۋشىلار ءۇيىندىنى ارشىپ, زارداپ شەككەندەردى ىزدەستىرۋ جۇمىستارىن جۇرگىزىپ جاتىر. بۇل شاراعا قۇتقارۋشىلار, جەدەل جاردەم, پوليتسيا قىزمەتكەرلەرى, جەرگىلىكتى بيلىك ورگاندارىنىڭ وكىلدەرى, ۇلتتىق ۇلان ساربازدارى, بارلىعى 280-گە جۋىق ادام جانە اۋىر تەحنيكا جۇمىلدىرىلعان.
سونىمەن قاتار, اپاتتىڭ ناقتى سەبەپ-سالدارىن انىقتاۋ جۇمىستارىمەن ارنايى قۇرىلعان جەدەل شتاب اينالىسۋدا. ونى قاراعاندى وبلىسىنىڭ اكىمى نۇرمۇحامەد ابدىبەكوۆ باسقارادى.
ەسكە سالار بولساق, شاحان كەنتى اۋماقتىق-تەرريتوريالىق ءبولىنىس بويىنشا شاحتينسك قالالىق اكىمدىگىنە باعىنىشتى. ەلدى مەكەن وبلىس ورتالىعىنان 35 شاقىرىم جەردە ورنالاسقان. كەنتتە 8 مىڭنان استام ادام تۇرادى.
قايرات ءابىلدينوۆ,
«ەگەمەن قازاقستان»