وتكەن جىل ءبىزدىڭ ەلىمىزدىڭ ستراتەگيالىق ارىپتەسى – امەريكا قۇراما شتاتتارىمەن ەكىجاقتى قارىم-قاتىناسىندا كەزەكتى ايتۋلى وقيعامەن ايشىقتالدى, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى.
2016 جىلدىڭ 29 جەلتوقسانىنان باستاپ اقش-قا ىسكەرلىك, جەكە نەمەسە تۋريستىك ماقساتتارمەن باراتىن قازاقستاندىقتار كۇشى ون جىلعا دەيىنگى مەرزىمگە جەتەتىن امەريكالىق ۆيزا الا الاتىن بولدى. ۆيزالاردى ءوزارا بەرۋدىڭ جاڭا ءتارتىبى تۋرالى ۋاعدالاستىققا قازاقستان رەسپۋبليكاسى مەن امەريكا قۇراما شتاتتارىنىڭ سىرتقى ساياسات ۆەدومستۆولارى قول جەتكىزدى.
بۇل وزگەرىستەر ەندى قازاقستاندىقتاردى اقش-قا جەكە ساپارمەن بارۋ الدىندا جىل سايىن ۆيزالار رەسىمدەۋ ءۇشىن امەريكا كونسۋلدىكتەرىنە بارۋ قاجەتتىگىنەن قۇتقاراتىن بولدى. ءسويتىپ, ۆيزا 10 جىل مەرزىمگە بەرىلەدى, وندا ازاماتتاردىڭ ەكى مەملەكەتتىڭ اۋماعىندا بولۋ ۋاقىتىن, ىشكى زاڭنامالارعا سايكەس, ميگراتسيالىق قىزمەتتەر ايقىندايدى.
ەكى مەملەكەت ازاماتتارىنا ۆيزا مەرزىمىن 10 جىلعا دەيىن ۇزارتۋ تۋرالى كەلىسسوزدەر, حالىقارالىق-قۇقىقتىق ولشەممەن العاندا, اسا ۇزاققا سوزىلعان جوق. جانە دە بۇل مەرزىم اقش تاراپىنىڭ ۆيزا بەرۋدەگى ءىس جۇزىندە بارىنشا ەڭ ۇزاق مەرزىمى بولىپ تابىلادى. ال ءسوز ورايىندا كەلىسسوزدەر بارىسىندا بارلىق دەتالدار ءبىر جىل ىشىندە كەلىسىلىپ ۇلگەرىلگەنىن ايتا كەتەيىك.
ەندى قازاقستان رەسپۋبليكاسى امەريكا قۇراما شتاتتارى ءۇشىن قىتاي, ءۇندىستان, مەكسيكا سياقتى وتە ەكسكليۋزيۆتى ستراتەگيالىق ماڭىزدى مەملەكەتتەردىڭ ءبىرى بولىپ تابىلادى. ويتكەنى, مۇنداي ناتيجەگە جەتۋگە اقش-قا بارعان قازاقستاندىقتاردىڭ سول ەل زاڭدارىن قاتاڭ ساقتاپ, وزدەرىن اسا جاقسى جاعىنان كورسەتكەندەرى سەبەپ بولعانى انىق.
ۆيزالاردىڭ ۋاقىت مەرزىمىن ۇلعايتۋ ەكى ەل ازاماتتارىنىڭ ءوزارا ساپارلار الماسۋ جاعدايلارىن بارىنشا وڭتايلاندىرۋعا مۇمكىندىك بەرەدى جانە قازاقستان مەن امەريكا اراسىنداعى ساۋدا-ەكونوميكالىق, عىلىمي-تەحنيكالىق, مادەني-گۋمانيتارلىق, تۋريستىك جانە تاعى باسقا سالالارداعى ىنتىماقتاستىقتى دامىتۋعا باعىتتالىپ وتىر.
وتكەن جىلدىڭ 25 جەلتوقسانىندا قازاقستان مەن اقش ەكى ەل اراسىندا ديپلوماتيالىق قارىم-قاتىناس ورناعانىنىڭ 25 جىلدىعىن اتاپ وتكەنىن قاپەرگە سالايىق.