وبلىستىڭ بارلىق ەلدى مەكەندەرى تەلەفون بايلانىسىمەن جانە ينتەرنەتپەن قامتىلعان. الايدا, جىل سايىن بايلانىس قىزمەتىنە دەگەن سۇرانىس تا ارتا تۇسۋدە, اۋىلدىقتار جوعارى ساپالى بايلانىس قىزمەتىنىڭ كەڭ سپەكترىن پايدالانعىسى كەلەدى. وسىعان بايلانىستى اۋىلدا تەلەكوممۋنيكاتسيا جەلىلەرىن جاڭعىرتۋ جۇمىستارى جۇيەلى جۇرگىزىلۋدە. «قازاقتەلەكوم» اق وبلىستىق فيليالى وڭىردە تەلەكوممۋنيكاتسيا جەلىلەرىن جاڭعىرتۋ مەن دامىتۋ بويىنشا جۇمىستاردى جالعاستىرۋدا. جاقىندا ميالى (اتىراۋ وبلىسى), ويىل (اقتوبە وبلىسى) ۋچاسكەسىندە جاڭا بايلانىس قوندىرعىسى پايدالانۋعا بەرىلدى. بۇل ويىل اۋىلىندا ۇسىنىلاتىن بايلانىس قىزمەتتەرىنىڭ ساپاسىن ارتتىرۋعا مۇمكىندىك بەردى. «وپەراتورلىق قوسىلۋلار ءۇشىن جەلى رەسۋرستارىن كەڭەيتۋ» جوباسى اياسىندا «ميالى-ويىل» ۋچاسكەسىندە Pasolink 400 ساندىق راديورەلەلى جەلى ورناتىلدى. جاڭا بايلانىس قوندىرعىسى دەرەكتەردى بەرۋدىڭ وتكىزۋ قابىلەتىن 400 مبيت/س-كە دەيىن كەڭەيتۋگە مۇمكىندىك بەردى. اتالمىش جوبانى جۇزەگە اسىرۋ بوگدە وپەراتورلارعا ۇسىنىلاتىن ارنالاردىڭ وتكىزۋ قابىلەتىن كەڭەيتۋگە العىشارت جاسايدى جانە جاڭا قاجەتتىلىكتەردى قاناعاتتاندىرا الادى. جاڭا قوندىرعىنى ىسكە قوسۋ ابونەنتتەرگە ۇسىنىلاتىن ينتەرنەت جەلىسىنە كەڭ جولاقتى قوسىلۋ قىزمەتىنىڭ ساپاسىن جاقسارتۋعا جانە ويىل اۋىلىندا جوعارى جىلدامدىقتى ينتەرنەتكە جاڭا پايدالانۋشىلاردى قوسۋعا مۇمكىندىك بەرەدى. ءجۇرگىزىلگەن جۇمىستار ءناتيجەسىندە «Megaline Hit» تاريفتىك جوسپارىنىڭ دەرەكتەردى بەرۋ جىلدامدىعى بەكىتىلگەن 4096 كبيت/س جىلدامدىعىمەن سايكەستەندىرىلدى. تەلەكوممۋنيكاتسيا جەلىلەرىن جاڭعىرتۋ جانە دامىتۋ بويىنشا ويىلدا جۇرگىزىلگەن جۇمىستار «WLL CDMA-450» تەحنولوگياسى بويىنشا سىمسىز بايلانىس ساپاسىن جاقسارتۋعا دا ىقپال ەتتى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى