سينوپتيكتەر 2017 جىلدىڭ قاڭتار ايىنا ارنالعان اۋا رايى بولجامىن جاريا ەتتى, - دەپ حابارلايدى "قازگيدرومەت" رمك.
Cينوپتيكتەردىڭ مالىمەتىنشە, قىزىلوردا, وڭتۇستىك قازاقستان, جامبىل جانە الماتى وبلىستارىندا قاڭتاردا ورتاشا اۋا تەمپەراتۋراسى ساقتالادى, ال قالعان اۋماقتاردا نورمادان 1 گرادۋسقا جوعارى بولادى.
سونداي-اق, جاۋىن-شاشىننىڭ ايلىق مولشەرى وڭتۇستىك قازاقستان, قىزىلورا جانە جامبىل وبلىستارىندا نورمادا بولاتىنى, ال ەلىمىزدىڭ قالعان اۋماقتارىندا جاۋىن-شاشىننىڭ نورمادان كوپ جاۋاتىنى ايتىلادى.
"اتلانتيكالىق تسيكلونداردىڭ اسەرىنەن قار جاۋىپ, سەكۋندىنا 15-20 مەترگە جەتەتىن بوران بولادى. ەلىمىزدىڭ وڭتۇستىك اۋماقتارىندا تۇمان مەن كوكتايعاق كۇتىلەدى. سونداي-اق, 17-23 قاڭتار كۇندەرى جانە ايدىڭ سوڭىندا اياز بولادى", - دەلىنگەن حابارلامادا.
سونىمەن قاتار, الداعى بولجامعا سايكەس, 17-23 قاڭتاردا جانە ايدىڭ سوڭىندا اۋا تەمپەراتۋراسىنىڭ تومەندەۋى كۇتىلەدى. سينوپتيكتەردىڭ مالىمەتىنشە, ول كەزدە ەلىمىزدىڭ سولتۇستىك بولىگىندە تۇنگى ۋاقىتتا 30-35 گرادۋس اياز, ال كۇندىز 20-20 گرادۋس اياز; وڭتۇستىك اۋماقتاردا تۇنگى ۋاقىتتا 20-25 گرادۋس اياز, ال كۇندىز 20-25 گرادۋس سۋىق كۇتىلەدى.