ەكسپورتتىق الەۋەت ارتا ءتۇستى

بۇگىنگى تاڭدا قازاقستان الەمدەگى ءىرى ەكسپورتتاۋشى سانالاتىن 50 ەلدىڭ قاتارىنا كىرەدى. ەلىمىز تۇرىكمەنستانعا, تاجىكستانعا, ازەربايجانعا, قىرعىزستانعا ەلەكتروۆوزداردى, تەپلوۆوزداردى ەكسپورتتايدى. قازاقستاندىق كىلەمدەر گەر­ما­نيادا, انگليادا, ۋكراينادا, سون­داي-اق, IKEARUSSIA جەلىسىنىڭ 52 سۋپەرماركەتىندە ۇسىنىلعان, تەلە­كوممۋنيكاتسيا جابدىقتارى يران­عا, تۇرىكمەنستانعا ەكسپورتتالادى, MADEINKAZAKHSTAN تاۋىق جۇمىرتقالارى اۋعانستانعا, بىرىك­كەن اراب امىرلىكتەرىنە شىعا­رىلادى. وتاندىق كارتريدج ءوندى­رۋ­شىسى ءوز ءونىمىن بەلارۋسكە, تۇرىك­مەن­ستانعا جەتكىزەدى, ەرلەرگە ارنالعان قازاقستاندىق كوستيۋمدەر ماسكەۋدىڭ ساۋدا ورتالىعىندا ساۋدالانادى. بۇدان بولەك, نارىقتا قازاقستان ۋران ەكسپورتى بويىنشا – 1, ۇن ەكسپورتى بويىنشا – 2 جانە تيتان بويىنشا 3 ورىندا. مۇنىڭ بارلىعى – قازاقستاننىڭ 25 جىل ىشىندەگى ەكس­پورتتىق الەۋەتتى كوتەرۋگە باعىتتالعان ەرەن ەڭبەگىنىڭ جەمىسى. 2016 جىلدىڭ قورىتىندىلارى بويىنشا ەلىمىزدىڭ تاۋار اينالىمى 58 ملرد اقش دوللارىن قۇراپ وتىر. ونىڭ 35 ملرد دوللارى ەكسپورتتىڭ جانە 23 ملرد دوللارى يمپورتتىڭ ۇلەسىندە. بۇل ءبىزدىڭ سىرتتان ساتىپ العاننان گورى, كوبىرەك ساتىپ جاتقانىمىزدى اڭعارتادى. ەلىمىزدىڭ ەكسپورتتىق الەۋەتى, جانە ونى دامىتۋ مەن جىلجىتۋ ماسەلەلەرى بويىنشا «KAZNEX INVEST» اكتسيونەرلىك قوعامىنىڭ 2016 جىلى ات­قارعان جۇمىس قورىتىندىلارى ءجو­نىندە ورتالىق كوممۋنيكاتسيالار قىزمەتىندە وتكەن ءباسپاسوز ءماسلي­حاتىندا باسقارما توراعاسىنىڭ ورىن­باسارى مەيىرجان مايكەنوۆ اڭگى­مەلەدى. ونىڭ ايتۋىنشا, ەكسپورت كو­لە­مىندەگى وڭدەلگەن تاۋار ۇلەسى 24-تەن 35 پايىزعا ۇلعايعان. بۇل ەلىمىزدىڭ سىرتقى نارىقتىڭ سۇرانىسىنا يكەم­دەلىپ, تاۋاردى شيكىزات تۇرىندە ەمەس, وڭدەپ ەكسپورتتاۋعا بەيىمدەلىپ كەلە جاتقانىن بايقاتادى. «ەكسپورتتىق تاۋارلاردىڭ نومەنكلاتۋراسى 969 پوزيتسياعا دەيىن ۇلعايدى, مىسالى, 2008 جىلى ءبىز 880-گە جۋىق تاۋار پوزيتسيالا­رىن ەكسپورتتادىق. ەلىمىزدىڭ ەكسپورت گەوگرافياسى دا كەڭەيىپ كەلەدى, قا­زىر­گى تاڭدا قازاقستان الەمنىڭ 117 ەلىنە تاۋار ەكسپورتتايدى. ەلەۋلى دارەجەدە بۇعان يندۋستريالاندىرۋ باعدارلاماسىنىڭ شەڭبەرىندە جاڭا وندىرىستەردى ىسكە قوسۋعا, سون­داي-اق, مەملەكەت تاراپىنان وتان­دىق وندىرۋشىلەردى ەكسپورتتىق قول­داۋ قۇرالدارىمەن, كەڭىنەن قام­تۋعا ىقپال ەتىلدى. 2016 جىلدىڭ قورى­تىندىسى بويىنشا دايىن تاۋار­لاردىڭ ەكسپورتى 14%-عا ارتادى دەپ بولجاپ وتىرمىز», – دەپ اتاپ ءوتتى مەيىرجان مايكەنوۆ. سونداي-اق, ول شەتەل نارىعىنا ءونىم شىعارۋدى كوزدەيتىن وتاندىق كا­سىپكەرلەرگە ۇلكەن قولداۋ كورسەتىلىپ جاتقانىن جەتكىزدى. «جالپى, قازاقستاننىڭ ەكسپورتقا باعدارلانعان كومپانيالارىنا قولداۋ كورسەتۋ ءۇشىن بيىل 66 ءىس-شارا وتكىزىلدى, اتاپ ايتساق, وتاندىق 40 كاسىپورىننىڭ شەتەلدىك كورمەلەرگە قاتىسۋى ۇيىمداستىرىلدى, 17 ساۋ­دا ميسسياسى وتكىزىلدى, شەتەلدىڭ ءىرى كورمەلەرىندە قازاقستاننىڭ 4 ۇلتتىق ستەندى تانىستىرىلدى. جىل قورىتىندىسى بويىنشا «KAZNEX INVEST» قولداۋىمەن وندىرۋشىلەر 200 ملن اقش دوللارىنا ءدارى-دارمەك, مەديتسينالىق بۇيىمدار, تۇز, قۇرىلىس ماتەريالدارى, ەرلەردىڭ كوستيۋمى, بالالار كيىمى, ماكارون, ۇن, شىرىن, سۋسىن, كونديتەرلىك بۇيىمدار جەتكىزۋگە ەكسپورتتىق كەلىسىمشارتتار جاسادى. ەكسپورتتاۋشىلاردى قولداۋ باعدارلاماسىنىڭ تيىمدىلىگى تۋرالى ايتقاندا, وتاندىق كومپانيالاردى ەكسپورتقا جىلجىتۋعا جۇمسالعان 1 بيۋدجەتتىك تەڭگەنىڭ ەكسپورتتىق كەلىسىمشارتتار تۇرىندە 59 تەڭگە اكەلگەنىن اتاپ وتكەن ءجون», – دەپ قورىتىندىلادى «KAZNEX INVEST» باسقارما توراعاسىنىڭ ورىنباسارى. جالپى, «KAZNEX INVEST» ەكسپورت جانە ينۆەستيتسيالار ۇلتتىق اگەنتتىگى قىزمەت ەتۋ جىلدارى بارىسىندا ءوز ونىمدەرىن سىرتقى نارىققا شىعارۋ ءۇشىن قازاقستاننىڭ 1500-دەن استام وندىرۋشىلەرىنە ىقپال ەتتى, 500-دەن استام ءىس-شارالار ۇيىمداستىرىلدى, ولار بويىنشا جالپى سوماسى 2 ملرد اقش دوللارىنا كەلىسىمشارتتار جاسالدى. ايدار ورىسباەۆ, «ەگەمەن قازاقستان»