ورتالىق كوممۋنيكاتسيالار قىزمەتىندە قولونەر جانە قازاقستان ەكونوميكاسىن ءارتاراپتاندىرۋدىڭ الەۋەتىن ارتتىرۋعا ارنالعان ءباسپاسوز ءماسليحاتى ءوتتى.
وعان بىرىككەن ۇلتتار ۇيىمى دامۋ باعدارلاماسىنىڭ (بۇۇدب) تۇراقتى وكىلىنىڭ ورىنباسارى مۋنحتۋيا التانگەرەل, قازاقستان قولونەر شەبەرلەرى وداعىنىڭ ءتورايىمى ايجان بەكقۇلوۆا, «شەۆرون» كومپانياسىنىڭ وكىلى اينۇر سىدىقوۆا, «كواليتسيا «جاسىل ەكونوميكا» جانە G-Global»-دى دامىتۋ ءۇشىن» زتب ءتورايىمى سالتانات راحىمبەكوۆا قاتىستى.
مۋنحتۋيا التانگەرەل حانىمنىڭ ايتۋىنشا, قولونەر سالاسىن ناسيحاتتاۋ جانە شەبەرلەردىڭ مۇمكىندىكتەرىن ارتتىرۋ, قازاقستان ەكونوميكاسىن ارتاراپتاندىرۋعا ايتارلىقتاي ۇلەس قوسۋى مۇمكىن.
–بۇۇ دامۋ باعدارلاماسى قولونەر كاسىبىن كوپتەگەن جىلدار ىشىندە قولداپ كەلەدى. دەگەنمەن, ناعىز جۇيەلى جۇمىس شاماسىمەن ءۇش جىل بۇرىن بىرلەسكەن وڭىرلىك دامۋ باعدارلامالارىنىڭ اياسىندا شىعىس قازاقستان, قىزىلوردا جانە ماڭعىستاۋ وبلىستارىندا باستالدى. سونىمەن قاتار, ءبىز بۇكىل ەلدىڭ شەبەرلەرىن قولداۋعا مىندەتتىمىز دەپ سانايمىز. ءبىز 200 استام قولونەر شەبەرلەرىن قامتىپ, ولارعا قازاقستاندا جانە شەتەلدە گرانتتار مەن ارنايى ترەنينگتەردى ۇسىنامىز جانە ولاردىڭ بۇيىمدارىن شىعارماشىلىق جارمەڭكەلەردە ساتىلۋىنا ىقپال ەتەمىز. ءبىز قولداعان كەم دەگەندە 30 قولونەر شەبەرلەرى ەكسپو-2017 اياسىنداعى شارالارعا قاتىسپاق. بارلىق قوعام مۇشەلەرىن قولونەر شەبەرلەرىن قولداۋعا شاقىرامىز, ويتكەنى قازاقستاندا وسى ادەمىلىك جانە مادەني ماڭىزدىلىعى بويىنشا عاجايىپ سالانىڭ الەۋەتى ءالى مۇلدە جۇزەگە اسىرىلماعان. ماسەلەن, ينديادا كاسىپشىلىك سالاسى جۇمىس ورىندارىنىڭ 20 پايىزعا جۋىق كولەمىن قامتيدى. ونىڭ ايتارلىقتاي بولىگى – اۋىلدىق جەرلەردە, ال يراندا قولونەر شەبەرلەرى ءجىو 3 پايىز قامتاماسىز ەتەدى, - دەپ مالىمدەدى مۋنحتۋيا التانگەرەل.
ال «شەۆرون» كومپانياسىنىڭ وكىلى اينۇر سىدىقوۆانىڭ ايتۋىنشا, امەريكالىق كومپانيا ەلىمىزگە 1993 جىلى كەلىپ, جاس تاۋەلسىز مەملەكەتكە سەنىم جانە قولداۋ بىلدىرگەن العاشقى ءىرى باتىس ينۆەستورى بولدى.
–بۇگىنگى كۇنى «شەۆرون» قازاقستاندا ەنەرگورەسۋرستاردى وندىرۋدە ەمەس, جەرگىلىكتى قولونەر شەبەرلەرىن قولداۋ ماقساتىندا دا تىعىز بايلانىس جاساپ كەلەدى. 2006 جىلدان باستاپ ەلىمىزدىڭ تۇكپىر-تۇكپىرىنەن جينالعان 1000-نان استام شەبەر بيزنەس-جوسپارلاۋ, ماركەتينگ, ۇيىمداستىرۋ جانە كاسىبي دامۋ بويىنشا ترەنينگتەردەن ءوتتى. 2009 جىلدان باستاپ ءبىز «شەبەر» شەبەرلىك بايقاۋىن وتكىزەمىز, – دەدى ول.
ءباسپاسوز ءماسليحاتىنا قاتىسۋشىلار, سونداي-اق, 17-18 جەلتوقسان كۇندەرى «كەرۋەن» ساۋدا ويىن-ساۋىق ورتالىعىندا «شەبەر-كەرۋەن» فەستيۆالى وتەتىنى تۋرالى حابارلادى. فەستيۆال اياسىندا قازاقستاننىڭ 70 ۇزدىك قولونەر شەبەرلەرىنىڭ, ونىڭ ىشىندە مۇگەدەك شەبەرلەردىڭ بۇيىمدارى جارمەڭكەگە شىعارىلىپ, «شەبەر-2016» 8-ءشى رەسپۋبليكالىق شەبەرلەر بايقاۋى جەڭىمپازدارىن سالتاناتتى تۇردە ماراپاتتاۋ ءراسىمى, ەتنو-ستيل باعىتىندا ءسان ديزاينەرلەرىنىڭ كورسەتىلىمدەرى, تەگىن شەبەرلىك ساباقتار جانە باسقا دا مادەني شارالار ۇيىمداستىرىلادى.
داستان كەنجالين, «ەگەمەن قازاقستان».