«استانا» كومانداسىنىڭ جارتىلاي قورعاۋشىسى روحەر كانياس «سوۆەتسكي سپورت» باسىلىمىنا بەرگەن سۇحباتىندا يتاليانىڭ «ۋدينەزە» كومانداسىمەن اراداعى ءساتسىز ترانسفەرى, الماتىنىڭ «قايراتىمەن» قارسىلاستىعى جانە قازاقستاننىڭ داستۇرىنە دەگەن كوزقاراسى تۋرالى ايتىپ بەردى.
2009 جىلى كانياس كولۋمبيانىڭ چەمپيونى اتانعاننان كەيىن ءوز كۇشىن ەۋروپادا سىناپ كورمەك بولادى. بىراق ءتۇپتىڭ-تۇبىندە ۋادە ەتىلگەن ا سەرياسىندا ەمەس, «ءسىبىر» كومانداسىنا اۋىسۋعا تۋرا كەلەدى. ول رەسەيلىك كلۋبتا ءبىر ماۋسىم عانا ونەر كورسەتسە دە, جانكۇيەرلەردىڭ ىستىق ىقىلاسىنا بولەنگەن ويىنشىلاردىڭ ءبىرى بولدى. ال سوڭعى ءتورت جىلدا قازاقستاندا ونەر كورسەتىپ ءجۇر. مۇندا ول ءۇش مارتە ەل چەمپيونى اتانىپ ۇلگەردى. قاراعاندىنىڭ «شاحتەرىمەن» بۇل اتاققا ءبىر رەت قول جەتكىزسە, قالعان ۇشەۋىن «استانامەن» جەڭىپ الدى.
ول «استانا» مەن «قايرات» اراسىنداعى كەزدەسۋدى قازاقستاندىق ەل-كلاسسيكوعا تەڭەدى. ال «يانگ بويزدان» 0:3 ەسەبىمەن ۇتىلعانىنا قاراماستان ماۋسىمنىڭ ءساتتى اياقتالعانىن جاسىرمادى. «ءبىر جىلدا ەكى كۋبوكتى جەڭىپ الۋ – ەڭ جوعارعى كورسەتكىش. ءبارى-ءبىر شۆەيتسارلارمەن وتكەن كەزدەسۋ ەشنارسەنى شەشپەس ەدى. جالپى العاندا بۇل ماۋسىم ءبىز ءۇشىن ويداعىداي ءوتتى. ال كەلەر جىلى چەمپيوندار ليگاسىندا جاقسى ونەر كورسەتەتىن مۇمكىندىگىمىز بار», – دەدى كولۋمبيالىق فۋتبولشى.
رەسەي حالقى اناتولي تيموششۋك پەن اندرەي ارشاۆين وينايتىن «قايرات» جايلى جاقسىراق بىلەدى. الماتىلىق ۇجىممەن وتەتىن ويىندار قانشالىقتى قيىندىق تۋدىرادى دەگەن سۇراققا: «بۇل ماتچتاردى قازاقستاندىق ەل-كلاسسيكو دەپ اتاسام قاتەلەسپەگەن بولار ەدىم. بەينە-ءبىر «بارسەلونا» مەن «رەال» اراسىنداعى ماتچ سياقتى. ءبىر ەرەكشەلىگى – قازاقستاندا وتەدى. قايسى ءبىرىمىز جەڭىسكە جەتسەك, چەمپيوناتتى ۇتىپ العانداي سەزىمدە قالىپ جاتامىز» – دەدى ول.
جاسىل الاڭدا ەمەس اپپاق قاردىڭ ۇستىندە وتكەن قازاقستان كۋبوگىنىڭ فينالى ءبارىنىڭ ەسىندە بولار. كانياس ونى دا ۇمىت قالدىرماي, تىلگە تيەك ەتە كەتتى: «راسىمەن, اۋا رايى وتە قاتتى اسەر ەتتى. «قايراتتىڭ» جەرىندە وتكەندىكتەن بۇل جەڭىس ءبىز ءۇشىن ماڭىزدى بولدى. جانكۇيەرلەر «جان الىسىپ, جان بەرىسكەن» ويىننىڭ كۋاسى بولدى دەگەن ويدامىن», – دەدى 26 جاستاعى فۋتبولشى.
وتكەنگە قايتا ورالعان كولۋمبيالىق اياقدوپشى «ۋدينەزەمەن» اراداعى ءساتسىز ترانسفەرى جايلى اڭگىمەلەدى: «ەۋروپادا مەنى دايىن كەلىسىمشارت كۇتىپ تۇر دەپ سان سوقتىرىپ كەتكەن ادامدار بولدى. بۇل ۋاقىتتا ترانسفەر ۋاقىتىنىڭ اياقتالىپ قالعان ءساتى بولاتىن, سوندىقتان لاتۆياعا بارىپ, ءبىر-ەكى اي ويناۋ جونىندە ۇسىنىس الدىم. ءوز دەڭگەيىمدى تومەندەتىپ الماس ءۇشىن «ترانزيت» كومانداسىنان ءبىر-اق شىقتىم. مىنە, سول جاقتان رەسەيگە اۋىسۋ جاعىن قاراستىردىم», – دەدى.
ال «ءسىبىر» كومانداسىنا اۋىسقانداعى اسەرى مۇلدەم بولەك ەكەن: «وتە ادەمى جانە ۇلكەن قالا. ءبىر اۋىز ءسوز بىلمەيتىندىگىمە قاراماستان رەسەيدە مەنى جاقسى كۇتىپ الدى. كوماندا وتە ۇيىمشىل ەكەن. ارىپتەستەرىمنىڭ ارقاسىندا تەز ءسىڭىسىپ كەتتىم. ءبىر قيىندىعى بۇل جاقتا اۋا رايى وتە سالقىن, جىلىنۋ ءۇشىن ءجيى-ءجيى كوفە ءىشىپ ءجۇردىم (كۇلدى)», – دەدى روحەر.
رەسەيدەن كەيىن كانياس بىردەن قازاقستانعا كەلە سالعان جوق, پولشانىڭ «ياگەللونيا» كومانداسىنا اۋىستى. بۇل جونىندە ول: «مۇندا جاعداي قيىنداۋ بولدى. مەنى ساتىپ العان باسقا جاتتىقتىرۋشى بولاتىن. پولشاعا كەلگەنىمدە ول كىسىنى اۋىستىرىپ جىبەرىپ, جاڭا جاتتىقتىرۋشى كەلىپتى. ال جاڭا باپكەر ماعان سەنىم ارتپايتىنىن ايتىپ, ەل كۋبوگىندا ويناۋعا 45 مينۋت قانا ۋاقىت بەردى. بۇدان وزگە ەشنارسە بولمادى. مىنە, وسى تۇستا قاراعاندىنىڭ «شاحتەرىنەن» تۇسكەن ۇسىنىس مەنى ۇلكەن تىعىرىقتان شىعاردى. ال جاڭا كوماندامدا ءبارى العا قاراي باستى», – دەپ ەسىنە الدى.
«شاحتەر» ماتچ الدىندا قۇدايعا ارناپ, قوي سوياتىندىعىمەن الەمگە تانىلدى. بۇعان تەز ۇيرەنىسىپ كەتتىڭىز بە دەگەن سۇراققا: «ءار ۇلتتىڭ وزىندىك سالت-داستۇرىنە قۇرمەتپەن قاراي ءبىلۋ كەرەك دەپ ويلايمىن. بۇل ەرەكشە ءارى وزىندىك ءمانى بار ءداستۇر. بۇدان ومىرلىك تاجىريبە الدىم», – دەدى جارتىلاي قورعاۋشى.