بۇگىن ۇكىمەت وتىرىسىندا ۇلتتىڭ ەكونوميكا ءمينيسترى قۋاندىق بيشىمباەۆ تۇرعىن ءۇي قۇرىلىسى سالاسىنداعى بارلىق رەسۋرستاردى بىرىكتىرگەن «نۇرلى جەر» باعدارلاماسى تۇجىرىمداماسىن تانىستىرۋ بارىسىندا يپوتەكالىق قارىزداردى سۋبسيديالاۋ تۋرالى ايتتى.
مينيستر اتاپ وتكەندەي, تۇجىرىمدامانىڭ باسىم باعىتتارى: يپوتەكالىق قارىزداردى سۋبسيديالاۋ ارقىلى يپوتەكالىق نەسيە بەرۋدى قولداۋ; قۇرىلىس كومپانيالارى ءۇشىن قارىز مولشەرلەمەسىنىڭ ءبىر بولىگىن جابۋ جولىمەن جەكە قۇرىلىس سالۋشىلاردى ىنتالاندىرۋ; تۇرعىن ءۇي قۇرىلىس جيناق بانكىنىڭ سالىمشىلارى جانە اكىمدىكتەردە كەزەكتە تۇرعان ازاماتتار ءۇشىن «رەۆولۆەرلىك» قاعيداتى بويىنشا نەسيەلىك تۇرعىن ءۇي قۇرىلىسىنىڭ كولەمىن ۇلعايتۋ; حالىقتىڭ الەۋمەتتىك جاعىنان وسال توپتارى ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇيدىڭ وڭىرلىك قورىن قۇرۋ; قاجەتتى ينفراقۇرىلىم جۇرگىزۋ ارقىلى جەكە تۇرعىن ءۇي قۇرىلىسىن دامىتۋ.
«يپوتەكالىق نەسيەلەۋ نارىعىن جانداندىرۋ ماقساتىندا ازاماتتارعا باستاپقى ءۇي ساتىپ الۋعا ەكىنشى دەڭگەيلى بانكتەر بەرەتىن يپوتەكانىڭ پايىزدىق ستاۆكاسىنىڭ ءبىر بولىگىن مەملەكەتتىڭ سۋبسيديالاۋى ارقىلى حالىقتىڭ سۇرانىسىن ىنتالاندىرۋ كوزدەلىپ وتىر», دەدى ق.بيشىمباەۆ.
بانكتىڭ سىياقى ستاۆكاسىن جەتى جىل بويى جىلىنا 17%-دان ارتىق ەمەس مولشەردە سۋبسيديالاۋ بولجانۋدا. تۇپكىلىكتى قارىز الۋشىنىڭ يپوتەكاسىن 10%-عا دەيىن تومەندەتۋ ءۇشىن مەملەكەت سىياقى قۇنىنىڭ 7%-نا دەيىن جابۋدى قامتاماسىز ەتەتىن بولادى. سۋبسيديا قاراجاتىن ءتيىمدى پايدالانۋ ءۇشىن استانا جانە الماتى قالالارىنداعى حالىققا نەسيە بەرۋدىڭ شەكتى سوماسى 20 ملن. تەڭگەگە جانە وڭىرلەردە 15 ملن. تەڭگەگە دەيىن 15 جىل مەرزىمگە بەلگىلەنەتىن بولادى. وسىنداي شارتپەن يپوتەكا بەرۋ كەزىندە نەسيە بويىنشا اي سايىنعى ورتاشا تولەم استانا جانە الماتى قالالارىندا 158 مىڭ تەڭگە, وڭىرلەردە 116 مىڭ تەڭگە بولادى.
جوسپارعا ساي, 15 جىل ىشىندە 14,7 ملن. شارشى مەتر نەسيەلىك تۇرعىن ءۇي سالىنادى, بۇل 245 مىڭ وتباسىن تۇرعىن ۇيمەن قامتاماسىز ەتەدى.
دينارا بiتiكوۆا, "ەگەمەن قازاقستان".