قازاقستاندىقتار «نۇرلى جەر» جاڭا باعدارلاماسى اياسىندا تۇرعىن ءۇي الۋ ءۇشىن جەڭىلدەتىلگەن نەسيە الا الادى. بۇل تۋرالى بۇگىن قر ۇكىمەت وتىرىسى بارىسىندا تۇرعىن ءۇي ساتىپ الۋ ءۇشىن نەسيەلىك مولشەرلەمەسىن سۋبسيديالاۋدى قاراستىراتىن «نۇرلى جەر» جاڭا باعدارلاماسىنىڭ جوباسىن تالقىلاۋ بارىسىندا بەلگىلى بولدى.
ۇكىمەت وتىرىسىندا ۇلتتىق ەكونوميكا ءمينيسترى قۋاندىق بيشىمباەۆ يپوتەكالىق نەسيەلەندىرۋ نارىعىن جانداندىرۋ ماقساتىندا ازاماتتارعا ءبىرىنشى رەتتىك تۇرعىن ءۇيدى ساتىپ الۋعا ەكىنشى دەڭگەيلى بانكتەر بەرەتىن يپوتەكانىڭ پايىزدىق مولشەرلەمەسىن مەملەكەتتىڭ سۋبسيديالاۋى قاراستىرىلىپ جاتقانىن باياندادى. ماسەلەن, 7 جىل بويى بانكتەردىڭ جىلىنا 17% جوعارى ەمەس سىياقى مولشەرلەمەسىن سۋبسيديالاۋ قاراستىرىلۋدا. سوڭعى قارىز الۋشىنىڭ يپوتەكاسىن 10% تومەندەتۋ ءۇشىن, مەملەكەت سىياقى قۇنىنىڭ 7% دەيىن جابۋدى قامتاماسىز ەتەتىن بولادى.
سۋبسيديالار بويىنشا قاراجاتتى ءتيىمدى پايدالانۋ ءۇشىن استانا جانە الماتى قالالارىندا تۇرعىنداردى نەسيەلەندىرۋدىڭ 15 جىلعا دەيىن 20 ملن. تەڭگەگە دەيىنگى, ال ايماقتاردا - 15 ملن. تەڭگەگە دەيىنگى شەكتى سوماسى بەلگىلەنەتىن بولادى. وسى شارتتارمەن نەسيە بويىنشا ورتاشا اي سايىنعى تولەم استانا جانە الماتى قالالارىندا – 158 مىڭ, ايماقتاردا – 116 مىڭ تەڭگەنى قۇرايتىن بولادى. سونىمەن قاتار جەكە قۇرىلىس سالۋشىلاردى ىنتالاندىرۋ ءۇشىن قولجەتىمدى نەسيەلىك رەسۋرستاردى پايدالانۋ ماقساتىندا مەملەكەت بانكتەر بەرەتىن نەسيەلەر بويىنشا پايىزدىق مولشەرلەمەنىڭ ءبىر بولىگى سۋبسيديالاناتىن بولادى.
ەسكە سالايىق, «نۇرلى جەر» باعدارلاماسىنىڭ نەگىزگى ماقساتى جەكە تۇرعىن ءۇي قۇرىلىسىن دامىتۋ, تۇرعىن ءۇي قۇرىلىسى سالىمدارى جۇيەسى ارقىلى كوپپاتەرلى تۇرعىن ءۇي قۇرىلىسىن ودان ءارى سالۋ, يپوتەكالىق نەسيەلەندىرۋدى دامىتۋ جانە جەكە قۇرىلىس سالۋشىلاردى ىنتالاندىرۋ بولىپ تابىلادى.
ارنۇر اسقار, "ەگەمەن قازاقستان".