كەشە استاناداعى «سارىارقا» رەسپۋبليكالىق ۆەلوترەگىندە مەملەكەت باسشىسى نۇرسۇلتان نازارباەۆتىڭ قاتىسۋىمەن ەل تاۋەلسىزدىگىنىڭ 25 جىلدىعىنا ارنالعان قازاقستان حالقى اسسامبلەياسى ەتنومادەني بىرلەستىكتەرىنىڭ «بەيبىتشىلىك پەن كەلىسىمنىڭ 25 جىلى» اتتى فەستيۆالى ءوتتى.
ايتۋلى شاراعا قحا مۇشەلەرى مەن ارداگەرلەرى, بارلىق وڭىردەن كەلگەن رەسپۋبليكالىق جانە وڭىرلىك ەتنومادەني بىرلەستىكتەردىڭ جەتەكشىلەرى مەن بەلسەندىلەرى, پارلامەنت دەپۋتاتتارى, ورتالىق اتقارۋشى ورگانداردىڭ, ساياسي پارتيالاردىڭ, ءدىني بىرلەستىكتەردىڭ, ۇكىمەتتىك ەمەس ۇيىمداردىڭ باسشىلارى, جوعارى وقۋ ورىندارىنىڭ رەكتورلارى, ديپلوماتيالىق كورپۋستىڭ وكىلدەرى, قوعام قايراتكەرلەرى, زيالى قاۋىم, ستۋدەنتتەر قاتىستى. جيىنعا كەلگەن ازاماتتاردىڭ جالپى سانى 10 مىڭ ادامدى قۇرادى.
«قۇرمەتتى وتانداستار! بارشاڭىزدى قازاقستان حالقى اسسامبلەياسىنىڭ ەل تاۋەلسىزدىگىنىڭ 25 جىلدىعىنا ارنالعان بۇگىنگى فەستيۆالىنىڭ اشىلۋىمەن شىن جۇرەكتەن قۇتتىقتايمىن! بۇگىن وسى ارەناعا قازاقستاننىڭ تۇكپىر-تۇكپىرىنەن ەتنومادەني بىرلەستىكتەردىڭ وكىلدەرى, جۇرەگىندە پاتريوتتىق سەزىمى, بويىندا جاستىق قۋاتى تاسىعان جاستار جينالىپ وتىر. تاۋەلسىزدىكتىڭ ەڭ باستى تىرەگى – بەيبىتشىلىك پەن كەلىسىم, تىنىشتىق پەن تۇراقتىلىق. وسىنىڭ ارقاسىندا ءبىز 25 جىلدا مەملەكەت قۇردىق, دەڭگەيىن كوتەردىك, xالىقتىڭ ءال-اۋقاتىن جوعارىلاتتىق. ال اسسامبلەيا – وسى قاسيەتتى تىرەگىمىزدىڭ مىزعىماس تۇعىرى. ءبىزدىڭ تىلەگىمىز ءبىر, جۇرەگىمىز ءبىر, بىلەگىمىز ءبىر, ءبىزدىڭ تاعدىرىمىز ورتاق, وتانىمىز ورتاق, «ماڭگىلىك ەلىمىزدىڭ» گۇلدەنە بەرۋى ءۇشىن ءبارىمىز ەڭبەك ەتەمىز. وسى جولدا زور تابىس تىلەيمىن!» – دەدى سالتاناتتى شارانىڭ اشىلۋىندا ءسوز سويلەگەن نۇرسۇلتان نازارباەۆ.
ەلباسى رەسپۋبليكا بويىنشا 1332 ەتنومادەني بىرلەستىك جۇمىس جاسايتىنىن, بۇل قازاقستاننىڭ وسىنداعى بارلىق ازاماتتاردىڭ وتانى ەكەندىگىن بىلدىرەتىنىن جەتكىزدى. «ولار ءبىر ءۇيدىڭ بالالارىنداي, وتانىمىزدىڭ كوركەيۋىنە جانىن سالىپ, تاعدىرىن ارناپ جاتىر. بۇل تۇرعىدا, مەملەكەتتىڭ دامۋى مەن ءوسىپ-وركەندەۋى جولىندا قازاقستان حالقى اسسامبلەياسى ايرىقشا ءرول اتقارىپ وتىر. وسى جىلدار ىشىندە قازاقستان حالقى اسسامبلەياسى ۇلتى مەن ءدىنى ءارتۇرلى ادامداردى ءوزارا جاقىنداستىرا ءتۇستى, سان الۋان مادەنيەت پەن سالت-داستۇردەگى جاقسى نارسەلەردى پاش ەتىپ, كورسەتە ءبىلدى. ءبىز ءبىر-بىرىمىزگە باۋىرمال بولدىق, ءوزىمىزدىڭ ورتاق ەلىمىزدە ءومىر ءسۇرىپ جاتقان ءبىرتۇتاس xالىققا اينالدىق. ءتۇرلى ەتنوستاردىڭ سالت-داستۇرلەرى, ادەت-عۇرىپتارى, ءبىر قاراعاندا, ءبىر-بىرىنە ۇقسامايتىن سەكىلدى. بىراق ولاردىڭ بارلىعى ءبىر ماعىنا بەرەدى, ءبىز ولاردى تۇرلىشە اتاساق تا, ەتنوستىق مەيرامداردىڭ ۋاقىتتارى مەن سەبەپتەرى ءبىر-بىرىمەن ءتۇيىسىپ جاتادى. قازاقستاننىڭ بىرلىگى جاراسقان xالقى رەتىندە ءبىز بارلىق ەتنوستاردىڭ مەرەكەلەرىن قۋانا اتاپ وتەمىز, ولارعا قاتىسامىز. سەبەبى, ءبىز تۇراقتىلىق پەن بىرلىكتىڭ ەرەكشە رۋxىن قالىپتاستىرا بىلدىك. ءبىز بارشامىزدى بىرىكتىرەتىن ايرىقشا رۋx جاساي الدىق. قازاقستاندا ءومىر ءسۇرۋ, وقۋ, جۇمىس ىستەۋ, بالالارعا تاربيە بەرۋ بارلىق ازاماتتارىمىز ءۇشىن جايلى ءارى قولايلى. بەيبىتشىلىك پەن كەلىسىم – ەڭ قاستەرلى قازىنامىز. بۇل – تاۋەلسىزدىگىمىزدىڭ 25 جىلىندا قول جەتكىزگەن باستى بايلىعىمىز», – دەدى مەملەكەت باسشىسى.
مەملەكەت باسشىسى سونىمەن قاتار, قازىرگى الەمدە مەملەكەتتىڭ ەتنومادەني بىرلەستىكتەرگە قولداۋ ءبىلدىرۋى ەرەكشە تاجىريبە بولىپ وتىرعانىن ايتتى. «بۇل – قازاقستانداعى ناقتى شىندىق. مەملەكەت بارلىق ەتنومادەني بىرلەستىكتەرگە تۇراقتى تۇردە جانە كەڭ اۋقىمدى قولداۋ كورسەتىپ, بالالاردى انا تىلىنە وقىتاتىن مەكتەپتەردى قارجىلاندىرىپ كەلەدى. گازەت-جۋرنالدار 15 تىلدە شىعادى, تەاترلارىمىز 7 تىلدە سويلەيدى. ءدال مۇنداي جاعداي وزگە ەلدىڭ ەشقايسىسىندا جوق», – دەدى ەلباسى.
فەستيۆال بارىسىندا نۇرسۇلتان نازارباەۆ كورەي, نەمىس جانە ۇيعىر ۇلتتىق تەاترلارىنا اكادەميالىق مارتەبە بەردى. «بۇگىن وسى فەستيۆالدە 3 ۇلتتىق تەاترعا اكادەميالىق مارتەبە بەرۋ جونىندەگى شەشىمىمدى جاريالايمىن. بۇل شەشىم ءبىزدىڭ ەلدىڭ بارشا تەاتر ونەرىنە ۇلكەن سەرپىن بەرەدى دەپ سەنەمىن. تەاتر ۇجىمدارىن وسىناۋ كەرەمەت وقيعامەن قۇتتىقتايمىن. جوعارى شىعارماشىلىق تابىس تىلەيمىن!» – دەدى ن.ءا.نازارباەۆ.
«بۇگىنگى فەستيۆالگە وسىدان 20 جىلدان استام ۋاقىت بۇرىن قازاقستان xالقى اسسامبلەياسىن قۇرۋعا اتسالىسقان مەنىڭ قاناتتاستارىمنىڭ بالالارى دا قاتىسۋدا. بۇل – ۇرپاق جالعاستىعىنىڭ بەلگىسى. مەن وسى شاراعا قاتىسىپ وتىرعان جاستارعا سالەم جولدايمىن. سىزدەر بىزدەردەن دە جاقسى ءومىر ءسۇرۋ ءۇشىن, سىزدەردىڭ بالالارىڭىز, سىزدەردەن دە جاقسى ءومىر ءسۇرۋ ءۇشىن 25 جىلدا جاساعان بارلىق ىستەر سىزدەرگە ارنالدى. ءبىزدىڭ قىزمەتىمىزدىڭ ءمانى مەن وزەگى, مىنە, وسىندا. سوندىقتان, قازاقستان حالقى اسسامبلەياسىنىڭ جاس بەلسەندىلەرىنە ايرىقشا ءسوز ارناعىم كەلەدى. «ماڭگىلىك ەل» جالپىۇلتتىق يدەياسىنىڭ ماڭىندا توپتاسقان ورتاق بولاشاق ۇلت – سىزدەرسىزدەر. ءبىزدىڭ قازاقستانىمىزدىڭ كوركەيۋى جولىندا ادال ەڭبەك ەتىڭىزدەر. وتاندى سۇيىڭدەر. ءبىر-بىرىڭە قولداۋ كورسەتىڭدەر, ءبىر-ءبىرىڭدى باعالاڭدار. ءبىز ءاردايىم, ەلىمىزدىڭ ورتاق, تاعدىرىمىزدىڭ دا ورتاق ەكەنىن ايتىپ كەلەمىز. بۇل شىن مانىسىندە دە, سولاي. ءبىزدىڭ ۇستانعان باعىتىمىز بارلىق ەتنوس وكىلدەرىنىڭ بىرلىگىمەن تىعىز بايلانىستى», – دەدى ەلباسى فەستيۆال اياسىندا ەتنومادەني فورۋمعا قاتىسىپ وتىرعان جاس بۋىنعا قاراتا ايتقان سوزىندە.
ءسوزىنىڭ قورىتىندىسىندا مەملەكەت باسشىسى ءىس-شاراعا قاتىسۋشىلاردى قازاقستان تاۋەلسىزدىگىنىڭ 25 جىلدىعىمەن قۇتتىقتاپ, بارشاعا يگىلىك پەن باق-بەرەكە تىلەدى.
«بەيبىتشىلىك پەن جاسامپازدىقتىڭ 25 جىلى» فەستيۆالى بارىسىندا قازاقستان حالقى اسسامبلەياسىنىڭ ۇيىمداستىرۋىمەن وتكىزىلگەن قايىرىمدىلىق شارالارى جونىندە ەرەكشە ايتىلدى. سونداي-اق, قازاقستان xالقى اسسامبلەياسى توڭىرەگىنە توپتاسقان قازاقستاندىق مەتسەناتتار تانىستىرىلدى.
وسى ورايدا «قايىرىمدىلىق كەرۋەنى» اكتسياسى اياسىندا 595 000 ادامعا 6 ميلليارد 542 ميلليون تەڭگە كولەمىندە كومەك كورسەتىلگەنى, «قازاقستان حالقى اسسامبلەياسى – 20 ىزگى ءىس» شاراسى ۇيىمداستىرىلعانى, «قامقور» اكتسياسى كەزىندە ارداگەرلەر مەن الەۋمەتتىك كومەككە مۇقتاج جاندارعا 648 ميلليون تەڭگە اۋدارىلعانى, ال «قازاقستان» تەلەارناسىنىڭ باستاماسىمەن قولعا الىنعان «شىن جۇرەكتەن» تەلەمارافونىندا 65 ميلليون تەڭگە جينالعانى, «قورجىن» اكتسياسى اياسىندا 243 ميلليون تەڭگە جينالىپ, 91 بالاعا اسا كۇردەلى ءارى قىمبات دارىگەرلىك جاردەم بەرىلگەنى, «اق ورامال» اكتسياسىنىڭ قورىتىندىسى بويىنشا كوپبالالى جانۇيالارعا 3 ملن 371 مىڭ تەڭگە بولىنگەنى, سونداي-اق, قان ونكولوگياسىمەن اۋىراتىن 300 بالاعا 40 ميلليون تەڭگە كولەمىندە كومەك ۇسىنىلعانى اتاپ ءوتىلدى.
اۋقىمدى شارا بارىسىندا ءسوز العان كوپبالالى انا ايناش ساعىندىقوۆا ەلىمىزدە قايىرىمدى جاندار كوپ ەكەنىن, ىزگىلىك جولىنا ءتۇسىپ, ءوز وتانداستارىنا كومەك قولىن سوزۋدىڭ جارقىن ۇلگىسىن كورسەتىپ جۇرگەن قازاقستاندىق جومارت جانداردىڭ ارقاسىندا تالاي ءسابيدىڭ ءومىرى باياندى تۇردە جالعاسقانىن جەتكىزدى.
– مەن – ءتورت بالانىڭ اناسىمىن. ءبارىمىز دە قازاقستاندى قايىرىمدىلىق پەن ىزگىلىكتىڭ مەكەنى دەپ تانيمىز. مەنىڭ ۇلىم – الياسقار ءوز اناسىنىڭ داۋىسىن, اينالاداعى دىبىستاردى ەستي المايتىن ەدى. وعان اسا قىمبات تۇراتىن ەستۋ اپپاراتى كەرەك بولعان. ونى ساتىپ الۋعا قارجىمىز بولمادى. سول كەزدە, ياعني, قىسىلعان ساتتە قازاقستان xالقى اسسامبلەياسى كەلىپ, بىزگە كومەك قولىن سوزدى. وسىلايشا, مەنىڭ ۇلىم اناسىنىڭ داۋىسىن ەستي باستادى. مەنىڭ بالام ەرتەڭ وسكەننەن كەيىن ەلىمىزدىڭ وزىنە جاساعان وسىناۋ قايىرىمدى ءىسىن ۇمىتپايتىن بولادى. قازاقستان حالقى اسسامبلەياسى ۇيىمداستىرعان مۇنداي ىزگى ىستەر وتە كوپ. سونىڭ ارقاسىندا تالاي وتباسىنىڭ, تالاي قازاقستاندىقتىڭ كەلەشەككە دەگەن ءۇمىتى ويانىپ, بويلارىندا ءوز وتانىنا دەگەن سەنىمى نىعايدى, – دەدى ايناش ساعىندىقوۆا.
اسسامبلەيا توڭىرەگىنە توپتاسقان قازاقستاندىق مەتسەناتتار اتىنان ءسوز العان بەكزات التىنبەكوۆ ءوز كەزەگىندە بۇگىنگى قازاقستاندا قايىرىمدىلىق ىستەرىنە, ءوزارا كومەك پەن باۋىرلاستىقتى, بىرلىكتى نىعايتۋعا باعىتتالعان اۋقىمدى شارالار ءجيى ۇيىمداستىرىلاتىنىن, مۇنىڭ بارلىعى ەلباسى نۇرسۇلتان نازارباەۆتىڭ ءجۇرگىزىپ وتىرعان ساليقالى ساياساتىنىڭ اياسىندا قولعا الىنىپ كەلە جاتقانىن ءسوز ەتتى.
– تاۋەلسىزدىكتىڭ تۋى 25 جىلدان بەرى جەلبىرەپ كەلەدى. وسى ارالىقتا قازاق ەلى قايىرىمدى ەل اتاندى. قايىرىمدىلىق – ءبىزدىڭ اتا ءداستۇرىمىز, قايىرىمدىلىق – ءبىزدىڭ قانىمىزداعى اسىل قاسيەت. قايىرىمدىلىق بىرلىگى جاراسقان, ىنتىماقتى ەلدە قانات جايادى. ءبىزدىڭ حالقىمىزدىڭ بويىنداعى وسىنداي كيەلى قاسيەت تاۋەلسىزدىك جىلدارىندا جارقىراي كورىندى.
اسسامبلەيا توڭىرەگىنە توپتاسىپ, مۇقتاج جاندارعا قول ۇشىن سوزۋدىڭ ۇلگىسىن كورسەتىپ جۇرگەن ازاماتتار وزدەرىنىڭ جاساعان قايىرىمدىلىقتارىن ەشقاشان مىندەتسىنگەن ەمەس. ولار بۇل ىستەرىن ازاماتتىق بورىشىمىز دەپ بىلەدى. وسىنداي يگىلىكتى ىستەردىڭ ارقاسىندا ەلىمىزدە قانشاما جاننىڭ ءۇمىتى جانىپ, كەلەشەككە دەگەن سەنىمى ارتتى, وزدەرىنىڭ ارقا سۇيەيتىن ىرگەلى ەلى بار ەكەنىن تەرەڭ ۇعىنا ءتۇستى. ۇلى دالانىڭ مۇراتتارىنا, زاڭدارىنا ادال, قايىرىمدىلىقتى مۇرات ەتكەن بارشا ازاماتتاردىڭ اتىنان بۇگىن مەن بارشا قازاقستاندىقتاردى ەل تاۋەلسىزدىگىنىڭ 25 جىلدىعىمەن قۇتتىقتايمىن, – دەدى.
فەستيۆال بارىسىندا بالالار ءۇيىنىڭ تاربيەلەنۋشىسى, پاۆلودارلىق الەكسەي لودوچنيكوۆ قولىنا دومبىرا الىپ, «الاۋ» توبى جانە ءانشى ديماش قۇدايبەرگەنمەن بىرگە «بالقاديشا» ءانىن ورىنداپ بەردى. وسى ارادا ءبىز ونىڭ وسى فەستيۆالدا ءان شىرقاۋىنا مۇمكىندىك الۋىنىڭ سىرىن ايتا كەتەيىك. حالىقتار دوستىعىنا ارنالعان ءبىر جيىندا الەكسەي لودوچنيكوۆ مەملەكەت باسشىسى نۇرسۇلتان نازارباەۆپەن كەزدەسىپ, «اسا قۇرمەتتى ەلباسى, مەنىڭ ەسىمىم – الەكسەي لودوچنيكوۆ. مەن تاعدىردىڭ جازۋىمەن اۋداندىق بالالار ۇيىندە تاربيەلەندىم. قازىر مۋزىكالىق كوللەدجدە وقيمىن. ايگىلى اتامىز امىرە قاشاۋباەۆ 1925 جىلى پاريجدە وتكەن ەكسپو كورمەسىندە «بالقاديشا» ءانىن ورىنداعان. كەلەر جىلى استانا ەكسپو-دا مەن دە سول ءاندى ورىنداعىم كەلەدى», – دەيدى لودوچنيكوۆ. سول كەزدە پرەزيدەنت: «جاقسى, ورىنداساڭ, تاۋەلسىزدىكتىڭ 25 جىلدىعىنا ارنالعان كونتسەرتكە شاقىرامىز», – دەيدى. مىنە, سونىڭ ءناتيجەسىندە ول اتالعان شارادا ءان سالدى.
فەستيۆالدا كەڭەس وداعىنىڭ باتىرى, ينگۋشەتيا رەسپۋبليكاسىنىڭ تۇڭعىش پرەزيدەنتى, رەسەيدىڭ مەملەكەت جانە قوعام قايراتكەرى, سولتۇستىك قازاقستان وبلىسى ساۋمالكول اۋىلىنىڭ تۋماسى, رۋسلان اۋشەۆ, گيمناستيكادان وليمپيادانىڭ بەس دۇركىن چەمپيونى, كسرو-نىڭ بىرنەشە مارتە جەڭىمپازى نەللي كيم, رەسەيدىڭ حالىق ءارتىسى, كومپوزيتور الەكساندر زاتسەپين ساحنا تورىنە شىعىپ, وزدەرىنىڭ قازاقستانعا دەگەن جۇرەكجاردى لەبىزدەرىن ءبىلدىردى.
رۋسلان اۋشەۆ ەلىمىزدىڭ بۇگىنگى جەتكەن جەتىستىكتەرى مەملەكەت باسشىسى نۇرسۇلتان نازارباەۆتىڭ قاجىرلى ەڭبەگىمەن تىكەلەي بايلانىستى ەكەنىن ايتا كەلىپ, ءوزىنىڭ ومىرىندە قازاقستاننىڭ الار ورنى ەرەكشە ەكەنىن جەتكىزدى.
«1944 جىلى مەنىڭ اتا-انام كوپتەگەن ينگۋش پەن شەشەندەر سياقتى قازاقستانعا قونىس اۋداردى. قيىن-قىستاۋ كەزەڭدە باۋىرلاس قازاق حالقى قول ۇشىن بەرىپ, كومەكتەرىن اياعان جوق. ءبىز ونى ۇمىتقان جوقپىز. قازاقستان – ءبىزدىڭ ءبىر وتانىمىز. قازىرگى تاڭدا بارلىعى وزگەرىپ, قازاقستان دامىعان ەلگە اينالدى. 1989 جانە 1990 جىلدارداعى قازاقستان مەن قازىرگى قازاقستاننىڭ جاعدايىن سالىستىرۋعا كەلمەيدى. مەن استانا مەن الماتى قالالارىندا ءجيى بولامىن. سول ساتتەردە قازاقستاندا اتقارىلىپ جاتقان جاسامپاز ىستەرگە كۋا بولىپ, كوڭىلىم مارقايادى», – دەدى ر.اۋشەۆ.
فەستيۆال بارىسىندا جۋرناليستەر قاۋىمىمەن تىلدەسكەن بىرقاتار ازاماتتار وزدەرىنىڭ ەل بىرلىگىنە قاتىستى پىكىرلەرىن ءبىلدىرىپ, ويلارىمەن ءبولىسكەنىن دە ايتا كەتەيىك. ماسەلەن, استاناداعى بەلارۋس مادەني ورتالىعىنىڭ ءتورايىمى الەكساندرا رومانوۆا قازاقستاندا ۇلتارالىق دوستىق پەن تاتۋلىقتىقتىڭ نىعايا بەرۋىن بارشا وتانداستارىمىزدىڭ قالايتىنىن, سوندىقتان ەلباسى نۇرسۇلتان نازارباەۆتىڭ جۇرگىزىپ وتىرعان ساياساتىن بارشا قازاقستاندىقتاردىڭ قولداپ وتىرعانىن جەتكىزدى. سول سياقتى, وزگە دە ازاماتتار ەتنوسارالىق ءبىرلىك پەن تاتۋلىق قازاقستاننىڭ باعا جەتپەس بايلىعى, ماقتانىشى ەكەنىن ءسوز ەتتى.
مەرەكەلىك شارادا قازاقستاننىڭ بارلىق وڭىرلەرىنەن ەتنومادەني ءبىرلەستىكتەر ۇجىمدارىنىڭ تەاترلانعان, ۆوكالدىق-حورەوگرافيالىق قويىلىمدارى مەن كومپوزيتسيالارى ۇسىنىلدى. ولاردا قازاقستاننىڭ تاۋەلسىزدىك جىلدارىنداعى تاريحي جەتىستىكتەرى, قازاقستان حالقى اسسامبلەياسى جالپىحالىقتىق ينستيتۋتىنىڭ بىرەگەيلىگى, قوعامنىڭ ۇيلەسىمدى دامۋىنىڭ حالىقارالىق ەتالونى رەتىندە تانىلعان پرەزيدەنت نۇرسۇلتان نازارباەۆتىڭ قوعامدىق كەلىسىم جانە جالپىۇلتتىق بىرلىك مودەلى ايقىن كورىنىس تاپقان.
ايتا كەتەيىك, بۇگىنگى فورۋم بارىسىندا قازاقستان xالقى اسسامبلەياسىنىڭ باستاماسىمەن قولعا الىنعان بىرقاتار بايقاۋلاردىڭ قورىتىندىسى شىعارىلادى.
وسىلايشا, قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «بەيبىتشىلىك پەن جاسامپازدىقتىڭ 25 جىلى» اتتى فەستيۆال جوعارى دەڭگەيدە ۇيىمداستىرىلدى. اسىرەسە, ونىڭ ءتاربيەلىك ءمان-ماڭىزىنىڭ جوعارى بولعانى, جاستاردى وتانسۇيگىشتىككە باۋلۋ باعىتىندا وتكىزىلگەنى كوپشىلىكتى رازى ەتتى.
جولدىباي بازار,
ءلايلا ەدىلقىزى,
«ەگەمەن قازاقستان»
سۋرەت پرەزيدەنتتىڭ ءباسپاسوز قىزمەتىنەن الىندى
سۋرەتتەردى تۇسىرگەن
ەرلان وماروۆ, «ەگەمەن قازاقستان»