الماتىداعى ءو.جولداسبەكوۆ اتىنداعى ستۋدەنتتەر سارايىندا قازاق ۇلتتىق اگرارلىق ۋنيۆەرسيتەتىنىڭ ۇيىمداستىرۋىمەن ەل تاۋەلسىزدىگىنىڭ 25 جىلدىعى, الماتى قالاسىنىڭ 1000 جىلدىعى مەن تۇڭعىش پرەزيدەنت كۇنىنە وراي «تاۋەلسىز ەلدىڭ جاستارى – ۇلى دالا ەلىنىڭ تىرەگى» اتتى سالتاناتتى كەش ۇلكەن تابىسپەن ءوتتى.
ءبىلىم جانە عىلىم مينيسترلىگىنىڭ, الماتى قالاسى مەن الماتى وبلىسى اكىمدىكتەرىنىڭ وكىلدەرى, كورنەكتى مەملەكەت جانە قوعام قايراتكەرلەرى, بەلگىلى قالامگەرلەر, جوو جەتەكشىلەرى جانە ءبىلىم مەن عىلىم, مادەنيەت سالالارىنىڭ ءۇزدىك قىزمەتكەرلەرى مەن ارداگەرلەرى قاتىسقان مەرەكەلىك ءىس-شارادا ەلىمىزدىڭ جانە اتالعان وقۋ ورنىنىڭ تاۋەلسىزدىك جىلدارىنداعى قول جەتكىزگەن جەتىستىكتەرى تۋرالى تەاترلاندىرىلعان تاريحي كورىنىستەر, سونداي-اق, ۋنيۆەرسيتەت جانىنداعى ستۋدەنتتەر اسسامبلەياسى مەن الماتى قالاسى ۇلتتىق مادەني ورتالىعىمەن ۇزاق جىلدار ءبىرلەسە اتقارعان جۇمىستارىنىڭ ءناتيجەلەرى كورىنىس تاپتى.
رۋحاني تاعىلىمى مول مەرەكەلىك باعدارلاما انۇرانمەن باستالىپ, ۋنيۆەرسيتەت جانىنداعى ا.جۇبانوۆ اتىنداعى حالىق اسپاپتار وركەسترىنىڭ ورىنداۋىنداعى قۇيقىلجىعان كۇيگە ۇلاستى. ودان ءارى 1-كۋرس ستۋدەنتتەرىنىڭ ساحنالاۋىمەن اتالعان وقۋ ورنىنىڭ تەلەستۋدياسىندا دايىندالعان ەگەمەندىككە جەتۋ جولىندا حالقىمىزدىڭ باسىنان وتكەن ءار جىلداردى باياندايتىن كوركەمسۋرەتتى جانە دەرەكتى فيلمدەردەن ۇزىندىلەر تەاترلاندىرىلعان كورىنىستەرمەن ءورىلىپ وتىردى.
– عاسىرلار بويى اتا-بابامىز اڭساعان تاۋەلسىزدىككە بۇگىنگى ۇرپاقتىڭ قولى جەتتى, – دەدى 1-كۋرس ستۋدەنتتەرىنە «ءبىلىم كىلتىن» تاپسىرىپ, ساتتىلىك تىلەگەن قازۇاۋ رەكتورى, ۇعا ۆيتسە-پرەزيدەنتى, اكادەميك تىلەكتەس ەسپولوۆ. – تاۋەلسىزدىكتىڭ ارقاسىندا ىرگەمىز ءبۇتىندەلىپ, ەڭسەمىز كوتەرىلدى. قازاقستان وركەنيەتتى مەملەكەتتەر قاتارىنا قوسىلدى. ۇلى دالا ءتوسىندە ىنتىماق پەن بەرەكە ورنادى. ەلىمىزدى الەم مويىندادى. بۇگىنگى جەتىستىكتەرىمىزدىڭ ءبارى – ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ جۇرگىزىپ وتىرعان سارابدال ساياساتىنىڭ ناتيجەسى. ەندىگى ماقساتىمىز – قاسيەتتى تاۋەلسىزدىكتىڭ تۇعىرىن بەرىك, كەلەشەگىن كەمەل ەتۋ. ال ەلىمىزدىڭ كەمەل كەلەشەگى جاستاردىڭ قولىندا. زامانعا ساي دامۋ ءۇشىن جاڭا تەحنولوگيالاردى يگەرگەن, جاڭاشا ويلايتىن ءبىلىمدى جاستار قاجەت. سوندىقتان, مەملەكەت باسشىسى ەل جاستارىنا الەمدىك دەڭگەيدە ءبىلىم الۋىنا بارىنشا جاعداي جاساپ كەلەدى. وزىق ءبىلىم مەن عىلىمدى يگەرگەن جاستار – ەلىمىزدىڭ ەرتەڭگى تىرەگى.
مەرەكەلىك كەشتىڭ جوعارى دەڭگەيدە وتۋىنە قازاق ەستراداسىنىڭ تانىمال انشىلەرى ءا.كارىموۆ, س.يبراگيموۆ, ا.الەكەشوۆ, ە.قۇدايبەرگەنوۆ اتسالىسىپ, اننەن شاشۋ شاشسا, ۋنيۆەرسيتەت جانىنداعى «گۇلبانۋ» ءان-بي ءانسامبلى, «ەسترادا» ءۇيىرمەسىنىڭ تالانتتى جاستارى دا اۋەلەتە ءان شىرقاپ, مىڭ بۇرالا بيلەدى. ستۋدەنتتەر ارنايى دايىنداعان زاماناۋي فلەشموب-بي فورماتىندا وقۋ ورنىنىڭ ءانۇرانىن ورىندادى.
گۇلزەينەپ سادىرقىزى,
«ەگەمەن قازاقستان»
الماتى