ءماجىلىس پرەزيدەنتتىڭ كەي وكىلەتتىكتەرىن ۇكىمەت پەن پارلامەنتكە بەرۋدى ماقۇلدادى

قازاقستاننىڭ ادىلەت ءمينيسترى مارات بەكەتاەۆ ارنايى جۇمىس توبىنىڭ قايتا بولىنەتىن وكىلەتتىكتەردى بەلگىلەگەنىن ايتتى. ول پرەزيدەنتتىڭ ەكونوميكالىق-الەۋمەتتىك سالانى رەتتەۋگە قاتىستى وكىلەتتىكتەرى بولماق. مينيستر پرەزيدەنت وكىلەتتىكتەرىنىڭ ءۇش باعىت بويىنشا قايتا بولىنەتىنىن ايتتى.

ءبىرىنشى باعىتقا سايكەس, مەملەكەت باسشىسىنىڭ ەكونوميكالىق پروتسەستەردى رەتتەۋگە قاتىستى مىناداي وكىلەتتىكتەرى ۇكىمەتكە بەرىلەتىن بولادى:

· ەكونوميكانىڭ يندۋستريالدىق-يننوۆاتسيالىق دامۋدى قولداۋ سالاسىنداعى باسىم سەكتورلارىن ايقىنداۋ;

· ارنايى ەكونوميكالىق ايماقتار قۇرۋ;

· ۇلتتىق بانك پەن ءتيىستى وكىلەتتى ورگانداردىڭ بىرلەسىپ جاساعان ۇسىنىسى نەگىزىندە ارنايى ۆاليۋتالىق رەجىم ەنگىزۋ;

· مەملەكەت-جەكە ارىپتەستىك ماقساتتارى ءۇشىن بەرۋگە بولمايتىن نىساندار ءتىزىمىن ايقىنداۋ.

«زاڭ جوباسىنا سايكەس, تەڭىزدە, ىشكى سۋ قويمالارىندا, توتەنشە ەكولوگيالىق احۋال ايماقتارىندا, ايرىقشا قورعالعان تابيعي تەرريتوريالاردا مۇناي وپەراتسيالارىن جۇرگىزۋ مۇمكىندىكتەرى تۋرالى شەشىمدى بۇدان بىلاي ۇكىمەت ءوزى قابىلدايتىن بولادى» دەدى مارات بەكەتاەۆ.

مىنانداي وكىلەتتىكتەردى ۇكىمەت پرەزيدەنت جانە پرەزيدەنت اكىمشىلىگىمەن بىرلەسە وتىرىپ ورىندايدى:

· مەملەكەتتىك جوسپارلاۋ جۇيەسىن ايقىنداۋ;

· جەكە كاسىپكەرلىك سۋبەكتىلەرىن تەكسەرۋدى بەلگىلى ءبىر ۋاقىتقا توقتاتۋ تۋرالى شەشىم قابىلداۋ;

· مەملەكەتتىك ورگان تۋرالى تيپتىك ەرەجەنى بەكىتۋ;

· مەملەكەت مەنشىگىندەگى جانە كۆازيمەملەكەتتىك سەكتور مەنشىگىندەگى يەلىكتەن شىعارۋعا بولمايتىن سۋبەكتىلەر ءتىزىمىن بەكىتۋ.

ەكىنشى باعىت بويىنشا, پرەزيدەنتتىڭ الەۋمەتتىك ماڭىزعا يە وكىلەتتىكتەرىن بەرۋ قاراستىرىلعان. «مىسالى, «قازاقستان رەسپۋبليكاسىنىڭ مەرەكەلەر تۋرالى» زاڭىندا مەرەكەلىك داتالار ءتىزىمىن بەكىتۋدى ۇكىمەتكە بەرۋ ۇسىنىلدى. سونىمەن قاتار بونۋستار تولەۋ, ماتەريالدىق جاردەم جاساۋ, مەملەكەتتىك قىزمەتكەرلەرگە ۇستەمە اقى تولەۋ ءتارتىبىن ايقىنداۋدى ۇكىمەت پرەزيدەنت اكىمشىلىگىمەن كەلىسىم بويىنشا ورىندايدى» دەدى مينيستر.

ءۇشىنشى باعىت بويىنشا, پرەزيدەنتتىڭ كەيبىر ۇيىمداستىرۋ وكىلەتتىكتەرىن بەرۋ ۇسىنىلعان. وعان سايكەس ۇكىمەتكە وبلىستار مەن رەسپۋبليكالىق ماڭىزعا يە قالالاردىڭ شەكاراسىن بەلگىلەۋ, ايرىقشا ستراتەگيالىق ماڭىزعا يە سۋ شارۋاشىلىعى قۇرىلىستارىنىڭ ءتىزىمىن بەكىتۋ سياقتى وكىلەتتىكتەر بەرىلۋى مۇمكىن.

ەرجان ءابدىرامان, "ەگەمەن قازاقستان"