ايت ۇلى ۇلت پوەزياسىنا كولدەنەڭنەن قوسىلعان جۇيرىك ەمەس. اۋەلدەن ەر-تۇرمانى ءبۇتىن, كونەنىڭ كوركەم قازىناسىن تال بويىنا سىڭىرگەن, جاڭانىڭ جاسامپاز ۇلگىسىنەن ونەگە العان دارىن. كەزىندە اقىننىڭ ولەڭدەرىن العاش وقىعان مۇقاعالي ماقاتاەۆ: «نەسىپبەكتىڭ ولەڭدەرىنەن جاساندىلىق بايقالمايدى, جاستىققا ءتان وت بار. اعىنان جارىلىپ, تاۋسىلا تالاپتانۋ, ىزدەنىس بار» دەسە, قازاق پوەزياسىنىڭ ءىرى وكىلى فاريزا وڭعارسىنوۆا: «...ءۇش ۇيىقتاساڭ دا تۇسىڭە كىرمەيتىن نەبىر اسىل تەڭەۋلەر, وقىس ويلار, ات باسىنداي التىنعا بەرگىسىز وقشاۋ وبرازدار, ەڭ باستىسى, وسىنىڭ ءبارى ۇلتتىق پوەزيانىڭ جورگەگىندە بولەنىپ, بەسىگىندە تەربەلۋى نەسىپبەكتى قالامداستارىنان دارالاي تۇسەدى», – دەگەن ەكەن.
بۇل جولعى تۇساۋى كەسىلگەن تۋىندىنىڭ ەرەكشەلىگى – اقىننىڭ شىعارماشىلىعى جايلى پىكىر جازعان, جىرلارىنا ادەبي تۇرعىدان باعا بەرگەن اۆتورلاردىڭ ەڭبەگى تۇگەلدەي توپتاستىرىلۋىندا. عۇلاما عالىمدار راحمانقۇل بەردىباەۆ, سەرىك قيراباەۆتى ايتپاعاندا, اقىنىڭ الدىڭعى تولقىن اعالارى تۇمانباي مولداعاليەۆ, مىرزاتاي جولداسبەكوۆ جانە وزىمەن بىرگە جۇرگەن قاتارلاس قالامگەرلەر – جاركەن بودەش ۇلى, ءجۇرسىن ەرمان, تۇرسىن جۇرتباي, سەرىك تۇرعىنبەكتىڭ كەڭگە كوسىلگەن كەمەل ويلارى رەت-رەتىمەن بەرىلگەن.
تۋىندىنىڭ تاعى ءبىر ارتىقشىلىعى – كىتاپتا جازىلعان سوقتالى قالامگەرلەردىڭ سۇبەلى ويلارى كەيىنگى ادەبيەت زەرتتەۋشىلەرى ءۇشىن تاپتىرمايتىن قۇرال دەسەك, تۋىندىنىڭ «بوستاندىق جىرىنىڭ بوزجورعاسى» دەپ اتالۋى اقىننىڭ بولمىس-ءبىتىمىن بويىنا سىڭىرگەن شىعارماشىلىق تاعدىرى تارىزدەس.
تۇساۋكەسەر ءراسىمى كەزىندە اعىنان جارىلا وي-پىكىر ايتۋ ءۇشىن ساحناعا كوتەرىلگەن قالامگەرلەر تۇگەلدەي تۋىندىعا جوعارى باعا بەردى. سولاردىڭ ءبىرى «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالى كىتاپتىڭ عىلىمي قۇندىلىعىنا تەرەڭنەن توقتالا وتىرىپ: «اقىننىڭ پوەمالارى تۇتاس ءداۋىردىڭ ەپيكالىق ەنتسيكلوپەدياسىنداي, اسىرەسە قازاقتىڭ قارا ولەڭى مەن شىعىس شايىرلارىنىڭ ءنارلى شۋماقتارى قاتار ءورىلىپ, تۇتاسىپ تۇرعانداي ۇندەسەدى», دەدى.
بەكەن قايرات ۇلى, «ەگەمەن قازاقستان»
سۋرەتتى تۇسىرگەن
ەرلان وماروۆ, «ەگەمەن قازاقستان»